‘सुरक्षामा थप समन्वय आवश्यक’
सशस्त्र प्रहरी बल नेपालका महानिरीक्षक नारायणदत्त पौडेलले नेपालगन्ज–रुपईडीहा नाकामा दैनिक ठूलो संख्यामा हुने आवागमनलाई व्यवस्थित र सुरक्षित बनाउन नेपाल र भारतका सुरक्षा निकायबीचको समन्वय थप सुदृढ गर्नुपर्ने बताएका छन् । सीमा क्षेत्रमा सूचना आदानप्रदान, सहकार्य र संयुक्त प्रयासलाई बलियो बनाए मात्रै सम्भावित चुनौतीको प्रभावकारी सामना गर्न सकिने उनले बताएका हुन् ।
सोमबार बिहान नेपालगन्ज–रुपईडीहा सीमा क्षेत्रको अनुगमनका क्रममा महानिरीक्षक पौडेलले दुवै देशका सुरक्षा अधिकारीसँग सीमा सुरक्षाको अवस्थाबारे जानकारी लिएका थिए । उनले सीमा क्षेत्रमा हुने अपराध नियन्त्रण, अवैध गतिविधिको निगरानी र सुरक्षाको वर्तमान अवस्थाबारे छलफल गरेका थिए ।
‘नेपालगन्ज–रुपईडीहा नाकाबाट दैनिक ठूलो संख्यामा नेपाली र भारतीय नागरिकको आवागमन हुन्छ,’ महानिरीक्षक पौडेलले भने, ‘यस्तो अवस्थामा दुवै देशका सुरक्षा निकायको जिम्मेवारी थप चुनौतीपूर्ण हुन्छ । सूचना आदानप्रदान, आपसी समन्वय र सहकार्यलाई अझ बलियो बनाउन आवश्यक छ ।’
अनुगमनका क्रममा एपीएफको नम्बर ३० गण, बागेश्वरी हेडक्वार्टरका सशस्त्र प्रहरी उपरीक्षक भीमबहादुर चन्दले सीमा सुरक्षाको अवस्थाबारे महानिरीक्षक पौडेललाई जानकारी गराएका थिए । सीमा क्षेत्रको सुरक्षा, आवागमन व्यवस्थापन तथा चुनौतीका विषयमा छलफल भएको थियो ।
भारतको सीमा सुरक्षा बल एसएसबी ४२ औँ वाहिनीका कमान्डेन्ट गिरीशचन्द पाण्डेयले नेपालगन्ज–रुपईडीहा नाकाबाट दैनिक औसत ६० हजार मानिसको आवागमन हुने जानकारी दिए । उनले यति ठूलो संख्याको आवागमनलाई सहज र सुरक्षित बनाउन दुवै देशका सुरक्षा निकायबीच प्रभावकारी सहकार्य आवश्यक रहेको बताए ।
‘सीमा सुरक्षा मात्रै होइन, नागरिकको सहज आवागमन पनि उत्तिकै महत्वपूर्ण विषय हो,’ कमान्डेन्ट पाण्डेयले भने, ‘सीमालाई सुरक्षित राख्न र कुनै पनि चुनौतीको संयुक्त रुपमा सामना गर्न दुवै देशका सुरक्षा निकाय प्रतिबद्ध छन् ।’
अनुगमनका क्रममा एसएसबी ४२ औँ वाहिनीका कमान्डेन्ट गिरीशचन्द पाण्डेयले महानिरीक्षक पौडेललाई अंगवस्त्र ओढाएर तथा फूलको गुच्छा र प्रतीक चिह्न प्रदान गरेर स्वागत गरेका थिए ।
कार्यक्रममा लुम्बिनी प्रदेशस्थित सशस्त्र प्रहरी बल नेपालका नायब महानिरीक्षक दीपक अधिकारीसहित नेपाल र भारतका सुरक्षा अधिकारीको उपस्थिति थियो । रुपईडीहा बिओपीका सहायक कमान्डेन्ट अभिषेक कुमार तथा इन्स्पेक्टर अभिषेक त्रिपाठी पनि कार्यक्रममा सहभागी रहेको भारतीय पत्रकार सुरेन्द्र मधेसियाले जानकारी दिए ।
नेपालगन्ज–रुपईडीहा नाका नेपाल र भारतबीचको प्रमुख आवागमन बिन्दुमध्ये एक मानिन्छ । यस नाकाबाट दैनिक हजारौं नागरिक, व्यापारी तथा यात्रु ओहोरदोहोर गर्ने भएकाले सुरक्षा व्यवस्थापन, अपराध नियन्त्रण र नागरिकको सहज आवागमनलाई दुवै देशका सुरक्षा निकायले प्राथमिकतामा राखेका छन् ।
