भदौ १५ देखि ब्रोडगेज रेल सेवा
नेपाल–भारत सीमावर्ती क्षेत्रका यात्रुका लागि रेल यात्रा थप सहज हुने भएको छ । भारतको रूपैडिहास्थित नेपालगन्ज रोड रेल स्टेसनबाट वाराणसी र गोन्डासम्म ब्रोडगेज रेल सेवा भदौ १५ गतेदेखि नियमित सञ्चालनमा आउने भएको छ ।
आमान परिवर्तन र विद्युतीकरणको काम पूरा भएपछि नयाँ रेल सेवा सञ्चालनको तयारी गरिएको हो । नेपालगन्ज रोडसहित बाबागन्ज, नानपारा, मटेरा, रिसिया र बहराइच रेल स्टेसनको पुनर्निर्माण तथा स्तरोन्नतिको कामपछि सीमावर्ती रेल कनेक्टिभिटी थप विस्तार हुने भएको हो ।
नयाँ सेवाअन्तर्गत नेपालगन्ज रोडबाट वाराणसीसम्म दुईवटा रेल सेवा सञ्चालन हुनेछन् । नेपालगन्ज रोड–वाराणसी इन्टरसिटी एक्सप्रेस बिहान ४ बजे नेपालगन्ज रोडबाट छुट्नेछ । रेल दिउँसो १ बजेर ३५ मिनेटमा वाराणसी पुग्नेछ ।
सोही सेवाको वाराणसीबाट फर्किने रेल दिउँसो २ बजे छुट्नेछ । उक्त रेल राति ११ बजे नेपालगन्ज रोड आइपुग्नेछ । यस सेवाका लागि १४२१४ डाउन र १४२१३ अप नम्बर तोकिएको छ ।
दिइएको जानकारी अनुसार, नेपालगन्ज रोडबाट वाराणसी सिटीसम्म अर्को एक्सप्रेस सेवा पनि सञ्चालन हुनेछ । १५१३१ अप नम्बरको रेल नेपालगन्ज रोडबाट साँझ ४ बजेर १५ मिनेटमा छुट्नेछ । यो रेल अर्को दिन बिहान ५ बजेर ३० मिनेटमा वाराणसी सिटी पुग्नेछ ।
वाराणसी सिटीबाट फर्किने १५१३२ डाउन नम्बरको रेल राति १० बजेर ३५ मिनेटमा छुट्नेछ । अर्को दिन बिहान ११ बजेर २० मिनेटमा उक्त रेल नेपालगन्ज रोड आइपुग्नेछ ।
गोन्डा र नेपालगन्ज रोडबीच पनि दुई चरणमा मेमू तथा यात्रुवाहक रेल सेवा सञ्चालन हुने भएको छ । पहिलो सेवाअन्तर्गत ७५१०९ नम्बरको रेल गोन्डाबाट बिहान ५ बजे छुट्नेछ । बिहान ७ बजेर ५० मिनेटमा नेपालगन्ज रोड पुग्नेछ ।
त्यसपछि ७५११० नम्बरको रेल नेपालगन्ज रोडबाट बिहान ८ बजेर २० मिनेटमा गोन्डातर्फ छुट्नेछ। उक्त रेल बिहान ११ बजेर १० मिनेटमा गोन्डा पुग्नेछ ।
यस्तै, दोस्रो सेवाअन्तर्गत ७५१११ नम्बरको रेल गोन्डाबाट दिउँसो १२ बजेर ३० मिनेटमा छुट्नेछ। यो रेल दिउँसो ३ बजे नेपालगन्ज रोड आइपुग्नेछ । नेपालगन्ज रोडबाट फर्किने ७५११२ नम्बरको रेल दिउँसो ३ बजेर ३० मिनेटमा छुट्नेछ। उक्त रेल साँझ ६ बजेर १५ मिनेटमा गोन्डा पुग्नेछ ।
रेल सेवा सञ्चालनसँगै नेपालगन्ज र आसपासका नेपाली यात्रुलाई भारतका विभिन्न प्रमुख शहरसम्म पुग्न सहज हुने अपेक्षा गरिएको छ । विशेषगरी भारतका बजार, धार्मिक तथा पर्यटकीय गन्तव्य र व्यापारिक केन्द्रमा आवतजावत गर्ने यात्रुलाई यसको प्रत्यक्ष लाभ पुग्ने देखिएको छ ।
बहराइचका सांसद डा. आनन्द कुमार गोन्डले साझा गरेको जानकारीअनुसार ब्रोडगेजमा आमान परिवर्तन र विद्युतीकरणपछि सञ्चालनमा आउन लागेको रेल सेवाले नेपाल–भारत सीमावर्ती क्षेत्रको व्यापार, पर्यटन तथा यात्रु आवतजावतमा ठूलो राहत पुग्ने अपेक्षा गरिएको छ ।
नेपालगन्ज रोड, बाबागन्ज, नानपारा, मटेरा, रिसिया र बहराइच स्टेसनको पुनर्निर्माण तथा स्तरोन्नतिले सीमावर्ती रेलमार्गको पूर्वाधारसमेत सुधारिएको छ। त्यससँगै नेपालगन्जबाट भारतीय रेल सञ्जाल हुँदै टाढाका शहरसम्मको पहुँच विस्तार हुने भएको छ ।
‘भदौ १५ गतेदेखि नियमित हुने यी सेवाले सीमावर्ती क्षेत्रका नागरिकको दैनिक आवतजावतसँगै व्यापारिक गतिविधिलाई समेत सहज बनाउने अपेक्षा गरिएको छ, भारतीय पत्रकार सन्तोषकुमार शुक्लले दैनिक नेपालगन्जसँग भने । लामो समयदेखि आमान परिवर्तन र विद्युतीकरणको प्रक्रियामा रहेको रेलमार्गमा नयाँ सेवा थपिएपछि नेपालगन्ज रोड हुँदै भारततर्फ जाने यात्रुलाई थप विकल्प उपलब्ध हुने भएको छ ।
