एसियन पेन्टस च्याम्पीयन्स कप यु–१८ अल नेपाल इन्टर–स्कुल फुटबल च्याम्पीयन्समा युनाइटेड एजुकेशनल एकेडेमीले फराकिलो जित निकाल्दै प्रतियोगिताको सुरुवात गरेको छ । महेन्द्र रंगशालामा सोमबारदेखि औपचारिक रूपमा सुरु भएको प्रतियोगिताको उद्घाटन खेलमा युनाइटेडले सिद्धार्थ विद्याशदन, फुल्टेक्रालाई ५–० गोलले पराजित गरेको हो ।
युनाइटेडको जितमा जर्सी नम्बर ९ का प्रसिद्ध कँडेलले उत्कृष्ट प्रदर्शन गरे । उनले मात्रै चार गोल गरे । प्रसिद्धले खेलको ३२औँ, ३९औँ, ४१औँ र ६४औँ मिनेटमा गोल गर्दै टोलीलाई फराकिलो जिततर्फ अघि बढाएका थिए । जर्सी नम्बर १० का शैलेन्द्र बीसीले ५०औँ मिनेटमा थप एक गोल गरे ।
प्रतियोगिताको पहिलो दिन नै युनाइटेडले पाँच गोलको अन्तरमा जित निकाल्दै बलियो दाबेदारी प्रस्तुत गरेको छ । उद्घाटन खेलमा देखिएको खेलाडीको प्रदर्शनले विद्यालय तहमा फुटबलको प्रतिस्पर्धा र प्रतिभाको अवस्था पनि देखाएको आयोजकको भनाइ छ ।
दोस्रो खेलमा भने जेनिथ इङ्लिस सेकेन्डरी बोर्डिङ स्कुल विजयी भएको छ । जेनिथले अरुणोदय माध्यमिक विद्यालयलाई २–० गोलले हरायो । जेनिथका जर्सी नम्बर ६ का कवि रावतले खेलको २४औँ मिनेटमा पहिलो गोल गरे । खेलको ५४औँ मिनेटमा जर्सी नम्बर ८ का सुवास बीसीले अर्को गोल थपे । त्यसपछि अरुणोदयले खेलमा फर्किने अवसर पाएन र जेनिथले २–० को जित सुरक्षित ग¥यो ।
नेपालगन्जमा विद्यालय तहका खेलाडीलाई लक्षित गरेर आयोजना गरिएको प्रतियोगितामा १८ वर्षमुनिका विभिन्न विद्यालयका खेलाडी सहभागी छन् । विद्यालयबाटै फुटबल प्रतिभाको पहिचान गर्ने र उनीहरूलाई थप अवसर दिने उद्देश्यले प्रतियोगिता सञ्चालन गरिएको हो । यसले खेलाडीलाई आफ्नो क्षमता देखाउने मैदान उपलब्ध गराउनुका साथै अनुशासन, नेतृत्व क्षमता र प्रतिस्पर्धात्मक भावना विकासमा समेत सहयोग पुग्ने आयोजकको अपेक्षा छ ।
नेपालगन्ज–११ स्पोर्टिङ क्लबका स्पोट्र्स कोअर्डिनेटर घनश्याम थापाले विद्यालय तहमा रहेका खेलाडीलाई प्रतिस्पर्धाको अवसर दिएर उनीहरूको प्रतिभालाई राष्ट्रियस्तरसम्म पु¥याउने लक्ष्य रहेको बताए । ‘युवा खेलाडीलाई प्रतिस्पर्धात्मक वातावरण प्रदान गर्दै उनीहरूको प्रतिभा राष्ट्रियस्तरसम्म पु¥याउने लक्ष्यसहित प्रतियोगिता आयोजना गरिएको हो,’ उनले भने ।
प्रतियोगिता सुरु भएसँगै महेन्द्र रंगशालामा युवा खेलाडीको उत्साह र प्रतिस्पर्धा देखिएको छ । पहिलो दिनका दुई खेलले नै विद्यालय तहमा फुटबलप्रतिको आकर्षण र नयाँ प्रतिभाको सम्भावना देखाएको आयोजकले जनाएको छ । प्रतियोगिताले नेपालगन्जको स्थानीय खेलकुद गतिविधिलाई थप चलायमान बनाउने र आगामी दिनमा नयाँ फुटबल प्रतिभा उत्पादनमा सहयोग पुग्ने अपेक्षा गरिएको छ ।
नेपालगन्ज–११ स्पोर्टिङ क्लबको समन्वय तथा एसियन पेन्टसको मुख्य प्रायोजनमा प्रतियोगिता सञ्चालन भइरहेको छ । उद्घाटन समारोहमा क्लबका स्पोट्र्स कोअर्डिनेटर घनश्याम थापा, फुटबल प्रशिक्षक, विभिन्न विद्यालयका प्रतिनिधि, प्रशिक्षक, खेलाडी तथा खेलप्रेमी सहभागी थिए ।
प्रतियोगिताको उद्घाटन नेपालगन्ज उपमहानगरपालिका शिक्षा, युवा तथा खेलकुद महाशाखाका प्रमुख गोरख बहादुर थापाले गरेका हुन् । उनले रेफ्रीलाई बल हस्तान्तरण गर्दै प्रतियोगिता औपचारिक रूपमा सुरु गराएका थिए ।
