नेपालले एसीसी मेन्स प्रिमियर कप–२०२६ को उपाधि जितेको छ । मलेसियाको बायुमास ओभलमा शनिबार भएको फाइनलमा युएईलाई ४४ रनले पराजित गर्दै नेपाल च्याम्पियन बनेको हो। उपाधिसँगै नेपालले एसिया कपमा स्थानसमेत पक्का गरेको छ ।
३ सय १४ रनको लक्ष्य पछ्याएको युएईले पूरा ५० ओभर पनि खेल्न सकेन। ४९.१ ओभरमै सबै विकेट गुमाएको युएई २ सय ६८ रनमा रोकियो । नेपालका बलरले लगातार विकेट निकाल्दै युएईलाई लक्ष्यसम्म पुग्न दिएनन् ।
युएईको पारीमा राहुल चोपराले शतकीय इनिङ्स खेले। उनले १ सय ५ बल सामना गर्दै १०० रन बनाए। ओपनर तनिश सुरीले ४२ रन थपे । कप्तान हरप्रित भटियाले ३३ रन बनाए। शोहाइब खानले ५२ रनको अर्धशतकीय पारी खेले । खुजाइमा बिन तनविरले १५ रन जोडे ।
नेपालका लागि करण केसी सबैभन्दा प्रभावकारी बलर बने । उनले ३ विकेट लिए। ललित नारायण राजवंशीले २ विकेट हात पारे। सन्दीप लामिछाने, दीपेन्द्र सिंह ऐरी, रोहित पौडेल र गुल्सन झाले समान १ विकेट लिए ।
त्यसअघि टस जितेर नेपालले पहिले ब्याटिङ रोजेको थियो । निर्धारित ५० ओभरमा ९ विकेट गुमाउँदै नेपालले ३ सय १३ रनको बलियो योगफल तयार पारेको थियो । यही स्कोर नेपालको जितको आधार बन्यो ।
नेपालको पारीमा आसिफ शेख चम्किए । उनले १ सय ६ बलमा ८ चौका र ४ छक्का प्रहार गर्दै १ सय २ रन बनाए । उनको शतकीय पारीले नेपालको स्कोर उकास्न महत्वपूर्ण भूमिका खेल्यो ।
गुल्सन झाले पनि आक्रामक ब्याटिङ गरे । उनले ३८ बलमा ३ चौका र ४ छक्काको मद्दतमा ५२ रन बनाए। रोहित पौडेलले ४४ बलमा २ चौका प्रहार गर्दै ४० रन जोडे ।
नेपालको सुरुवात भने अर्जुन कुमाल र आसिफ शेखले बलियो बनाएका थिए। यी दुईले पहिलो विकेटका लागि ९७ रनको साझेदारी गरे । कुमाल ४३ रन बनाएर रनआउट भए। उनले ६३ बलमा ६ चौका प्रहार गरेका थिए ।
नेपालले बनाएको ३ सय १३ रनको लक्ष्य युएईका लागि सुरुवातदेखि नै दबाबपूर्ण बन्यो। केही ब्याटरले राम्रो योगदान दिए पनि नेपाली बलिङसामु उसको पारी लामो समय टिक्न सकेन। अन्ततः २ सय ६८ रनमै सीमित भएपछि नेपाल ४४ रनले विजयी भयो ।
यो जितसँगै नेपालले एसीसी मेन्स प्रिमियर कप–२०२६ को उपाधि आफ्नो नाममा गरेको छ । प्रतियोगिताको च्याम्पियन बनेसँगै नेपालले आगामी एसिया कपका लागि समेत छनोट हुने अवसर प्राप्त गरेको छ ।
