नेपालगन्ज उपमहानगरपालिका–१५ सुइयापिप्रहवास्थित नेपाल राष्ट्रिय आधारभूत विद्यालयले विद्यालयको शैक्षिक गुणस्तर सुधार र विद्यालय–अभिभावक सम्बन्ध सुदृढ गर्ने प्रतिबद्धतासहित ‘मेरो विद्यालय, मेरो प्रतिबद्धता’ पत्रमा सामूहिक हस्ताक्षर गरेको छ।
विद्यालयमा आयोजित अभिभावक भेलामा शिक्षक कर्मचारी, विद्यार्थी प्रतिनिधि, विद्यालय व्यवस्थापन समिति, अभिभावक, स्थानीय जनप्रतिनिधि तथा विभिन्न सरोकारवालाले विद्यालयको शैक्षिक, भौतिक र सामाजिक विकासमा आफ्नो भूमिका प्रभावकारी बनाउने प्रतिबद्धता जनाउँदै पत्रमा हस्ताक्षर गरेका हुन्।
विद्यालय र अभिभावकबीचको सहकार्य बढाएर विद्यार्थीको सिकाइ उपलब्धि सुधार गर्ने तथा विद्यालयको समग्र विकासमा समुदायको सहभागिता बढाउने उद्देश्यले सामूहिक प्रतिबद्धता गरिएको विद्यालयले जनाएको छ। विद्यालयले यस अभियानलाई केवल हस्ताक्षरमा सीमित नराखी विद्यालयको विकासमा सबै पक्षको जिम्मेवारी स्थापित गर्ने आधारका रूपमा अघि बढाउने जनाएको छ।
‘मेरो विद्यालय, मेरो प्रतिबद्धता’ अभियानले विद्यालयलाई सबैको साझा जिम्मेवारी र साझा सम्पत्तिका रूपमा विकास गर्ने लक्ष्य लिएको छ। विद्यार्थीको नियमित उपस्थिति र सिकाइमा अभिभावकको भूमिका बढाउने तथा विद्यालयको शैक्षिक वातावरण सुधारका लागि समुदायसँग सहकार्य गर्ने उद्देश्य पनि अभियानमा समेटिएको छ।
कार्यक्रमका प्रमुख अतिथि नेपालगन्ज उपमहानगरपालिका–१५ का वडाध्यक्ष मदन विक्रम शाहले विद्यालयको विकासका लागि शिक्षक, अभिभावक, विद्यार्थी, स्थानीय सरकार र समुदायबीच निरन्तर सहकार्य आवश्यक रहेको बताए। उनले विद्यालयको सुधार कुनै एक पक्षको प्रयासबाट मात्र सम्भव नहुने भन्दै सबै सरोकारवाला आफ्नो जिम्मेवारीप्रति प्रतिबद्ध हुनुपर्ने धारणा राखे।
कार्यक्रममा नेपालगन्ज उपमहानगरपालिका–१४ का वडाध्यक्ष मजहर अलि शाह र वडा नम्बर १६ का वडाध्यक्ष कलीम अहमद अन्सारी पनि सहभागी थिए।
त्यस्तै, नेपालगन्ज उपमहानगरपालिकाको शिक्षा, युवा तथा खेलकुद महाशाखाका वरिष्ठ शिक्षा अधिकृत लोकेन्द्र बहादुर शाही, इलाका प्रहरी जमुनहाका प्रतिनिधि, माध्यमिक विद्यालय महेन्द्रनगरका प्रधानाध्यापक मो. शमिम कुरैसी, हनुमान आधारभूत विद्यालय जमुनहाका प्रधानाध्यापक समरबहादुर खत्री र हनुमान आधारभूत विद्यालयका विद्यालय व्यवस्थापन समिति अध्यक्ष मधई सिंह सरदारको सहभागिता थियो।
स्थानीय समाजसेवी जाविर अलि बेहना, नगर शिक्षा समितिका निवर्तमान सदस्य रमेश प्रसाद श्रीवास्तवलगायत शिक्षा तथा सामाजिक क्षेत्रमा क्रियाशील व्यक्तिहरू पनि कार्यक्रममा सहभागी थिए।
सामूहिक हस्ताक्षरपछि सहभागीहरूले विद्यालयको विकासलाई विद्यालय प्रशासनको मात्र जिम्मेवारीका रूपमा नलिई अभिभावक, शिक्षक, विद्यार्थी र समुदाय सबैको साझा दायित्वका रूपमा अघि बढाउनुपर्ने बताएका थिए। उनीहरूले सामूहिक प्रतिबद्धताले विद्यालयप्रति अपनत्वको भावना बढाएको धारणा राखे।
‘विद्यालय हाम्रो हो, यसको विकासमा हाम्रो पनि जिम्मेवारी छ’ भन्ने भावना अभिभावक, शिक्षक, विद्यार्थी र समुदायमा थप बलियो बनाउने अपेक्षासहित कार्यक्रम सम्पन्न भएको विद्यालयले जनाएको छ।
कार्यक्रमको अध्यक्षता विद्यालय व्यवस्थापन समिति अध्यक्ष चन्द्रिका प्रसाद कहारले गरेका थिए। सञ्चालन विद्यालयका प्रधानाध्यापक मनोज राजा श्रीवास्तवले गरेका थिए।
