एथर नेपालले नेपालगन्जमा आफ्नो १५औँ ‘एक्सपेरियन्स सेन्टर’ सञ्चालनमा ल्याएको छ ।
‘सेन्टरबाट ग्राहकले एथरका विद्युतीय स्कुटरको प्रविधि, डिजाइन र प्रदर्शन प्रत्यक्ष बुझ्न पाउने भएका छन्,’ नेपालगन्जस्थित सेन्टरका सञ्चालक दीपेन्द्र विष्टले दैनिक नेपालगन्जसँग भने । सेन्टरमा टेस्ट राइड तथा बिक्रीपछिको सेवासम्बन्धी जानकारीसमेत उपलब्ध हुने कम्पनीले जनाएको छ ।
विष्टका अनुसार, सेन्टरमा एथर ४५० र एथर रिज्टा मोडल उपलब्ध छन् । ग्राहकले स्कुटरको प्रविधि बुझ्नुका साथै प्रडक्ट डेमोन्स्ट्रेसन हेर्न र टेस्ट राइड गर्न सक्नेछन् ।
आइतवार सेन्टर उद्घाटनको अवसरमा एथर नेपालले नेपालगन्जका ग्राहकलाई लक्षित गर्दै विशेष ‘ओपनिङ स्कीम’ समेत सार्वजनिक गरेको छ । एथर नेपालका मार्केटिङ म्यानेजर सलमान खानले विद्युतीय स्कुटरमा राइडरको सहजता र सुरक्षालाई ध्यानमा राखेर विभिन्न स्मार्ट प्रविधि समावेश गरेको बताए ।
नेपालगन्जमा सेन्टर विस्तार गर्नुको उद्देश्य पश्चिम नेपालको विद्युतीय मोबिलिटीलाई थप स्मार्ट र दिगो बनाउनु रहेको एथर नेपालले जनाएको छ । नयाँ सेन्टरसँगै कम्पनीको सोरुम तथा एक्सपेरियन्स सेन्टर सञ्जाल काठमाडौँ, पोखरा, चितवन, इटहरी, बुटवल, जनकपुर, बिर्तामोड, वीरगन्ज, धरान र विराटनगरलगायत देशका प्रमुख सहरमा पुगेको छ ।
कम्पनीले नेपालभर विद्युतीय सवारीको प्रयोग बढ्दै गएको अवस्थामा ग्राहकलाई चार्जिङ र सर्भिसिङको सुविधा पनि विस्तार गर्दै आएको जनाएको छ । हाल एथरका स्कुटर प्रयोगकर्ताका लागि देशभर ५० भन्दा बढी फास्ट–चार्जिङ स्थान सञ्चालनमा छन् । त्यस्तै १० भन्दा बढी अधिकृत सर्भिस सेन्टरमार्फत बिक्रीपछिको सेवा उपलब्ध गराइएको कम्पनीले जनाएको छ ।
नेपालगन्जस्थित सेन्टरका सञ्चालक विष्टले ग्राहकको सन्तुष्टिलाई आफूहरूको पहिलो प्राथमिकता बनाएको बताए । उनले सेन्टरमा ग्राहकले स्कुटर खरिदअघि आवश्यक जानकारी लिन, प्रविधि बुझ्न र टेस्ट राइड गर्न सक्ने बताए। उद्घाटनका अवसरमा नेपालगन्जका ग्राहकका लागि विशेष योजना ल्याइएको जानकारी पनि उनले दिए ।
सेन्टरको उद्घाटन लुम्बिनी प्रदेश सरकारका भौतिक पूर्वाधार विकासमन्त्री रत्न खत्रीले रिबन काटेर गरेका थिए । उद्घाटन कार्यक्रममा बोल्दै खत्रीले जलवायु परिवर्तनको समस्या बढ्दै गएको अवस्थामा वातावरणमैत्री विद्युतीय सवारी साधनले बजारमा थप स्थान पाउने विश्वास व्यक्त गरे ।
