लागुऔषध कारोबारमा संलग्न रहेको आशंकामा नेपालगन्जका एक युवा सुनचाँदी व्यवसायीलाई प्रहरीले नियन्त्रणमा लिएर अनुसन्धान अघि बढाएको छ । सम्बन्धित प्रहरी स्रोतका अनुसार ती व्यवसायीलाई ब्राउनसुगरसहित नियन्त्रणमा लिइएको हो ।
प्रहरीका अनुसार ती व्यवसायीले ब्राउनसुगर लिएर जाँदै गरेको सूचना प्राप्त भएपछि प्रहरीले खानतलासी गरेको थियो । खानतलासीका क्रममा ब्राउनसुगरजस्तो पदार्थ फेला परेपछि उनलाई नियन्त्रणमा लिएर घटनाबारे थप अनुसन्धान अघि बढाइएको प्रहरीको भनाइ छ ।
तर, पक्राउ परेका व्यवसायीको यसअघि लागुऔषधको अवैध कारोबारसँग कुनै सम्बन्ध वा कनेक्सन देखिएको थिएन । त्यसैले प्रहरीले घटनालाई सामान्य रूपमा नलिई पक्राउ परेका व्यक्तिको पृष्ठभूमि र सम्भावित कनेक्सनबारे समेत अनुसन्धान गरिरहेको एक प्रहरी अधिकारीले बताए ।
अनुसन्धानमा खटिएका एक प्रहरीका अनुसार कहिलेकाहीँ प्रहरीलाई नै म्यानुपुलेट गरेर निर्दोष व्यक्तिलाई फसाउने प्रयास भएका घटना पनि आउने गरेका छन् । उनले दैनिक नेपालगन्जसँग भने, ‘कहिलेकाहीँ प्रहरीलाई नै म्यानुपुलेट गरेर निर्दोषलाई फसाउने गरेका घटना आउन थालेपछि पक्राउ व्यक्तिको पृष्ठभूमि र कनेक्सन खोजिन्छ ।’
उनका अनुसार पक्राउ परेका व्यवसायीको घटनासँगको वास्तविक सम्बन्धबारे विस्तृत अध्ययन भइरहेको छ । ‘यसको विस्तृत अध्ययन भइरहेको छ,’ उनले भने ।
बाँके प्रहरी प्रमुख प्रहरी उपरीक्षक अंगुर जीसीले घटनाबारे थप अनुसन्धान भइरहेको बताए । उनले तत्कालै निष्कर्षमा पुग्न नसकिने भन्दै अनुसन्धानपछि मात्रै घटनाको वास्तविकता यकिन हुने बताए ।
‘अहिले नै केही भन्न सकिँदैन, घटनाको अनुसन्धान भइरहेकोले सबै कुरा आइहाल्छ,’ प्रहरी उपरीक्षक जीसीले भने ।
