बाँकेमा निर्वाचनका लागि सम्पूर्ण तयारी पूरा भएको छ । बाँके जिल्ला सुरक्षा समितिका अध्यक्षसमेत रहेका, बाँकेका प्रमुख जिल्ला अधिकारी दिलकुमार तामाङ भन्छन्, ‘सुरक्षा रणनीति प्रभावकारी रूपमा कार्यान्वयनमा रहेकाले कुनै जोखिम वा अवरोध छैन ।’
दैनिक नेपालगन्जसँगको संक्षिप्त संवादमा, प्रजिअ तामाङले मतपेटिका ढुवानीदेखि गणनास्थलसम्मको व्यवस्थापन स्पष्ट योजना अनुसार हुने व्यवस्था मिलाइएको बताएका छन् । प्रमुख जिल्ला अधिकारीले आम मतदातालाई ढुक्क र निर्भयताका साथ आफ्नो तोकिएको मतदान केन्द्रमा गई मतदान गर्न आग्रह गरेका छन् । दैनिक नेपालगन्जका लागि प्रजिअ तामाङसंग पत्रकार झलक गैरेले गरेको कुराकानी संक्षेप आजको अंकमा
समग्रमा बाँकेमा निर्वाचनको तयारीबारे जानकारी दिनुस् न है !
वी आर अल सेट टु गो । बिहीबार विहान ७ बजे सबै बाँकेबासी आम मतदाता दाजुभाई दिदीबहिनीहरुले मतदान स्थलमा लामबद्ध भएर आफुलाई तोकिएको मतदान स्थल, मतदान केन्द्रमा गएर मत हाल्नका लागि सम्पूर्ण वातावरण तयार भएको छ ।
सुरक्षका दृष्टि तथा सबै हिसाबले संशय छैन । एकदमै निर्भयताका साथ आफ्नो मतदान स्थलमा गएर मतदान गर्न म आव्हान गर्न चाहन्छु । कुनै खतरा छैन, कुनै सुरक्षा संवेदनशीलता छैन, निर्वाचनलाई बाधा व्यवधान छैन, ढुक्क भएर मतदान गर्नका लागि म आव्हान गर्न चाहन्छु ।
सुरक्षा रणनीति कसरी व्यवस्थापन गरिएको छ ?
बाँके जिल्लाको सुरक्षा चुनौतिलाई हामीले एकदमै गहिरो ढंगले विश्लेषण गरेर सुरक्षा रणनीति बनाएका छौं । र, त्यसको कार्यान्वयन गरिरहेका छौं । सुरक्षा रणनीतिको कार्यान्वयनबाट कुनै पनि सुरक्षाको जोखिम हामीलाई छैन । हामीले तत्काल हुने सुरक्षाका विषयहरुलाई तत्काल सम्बोधन गर्ने व्यवस्था मिलाएका छौं । नेपाली सेना, नेपाल प्रहरी, सशस्त्र प्रहरी र निर्वाचन प्रहरी गरी आठ हजार बढी सुरक्षाकर्मी तैनाथ छन् अहिले ।
व्यवस्थापकीय दृष्टिले तयारी अवस्था के हो ?
जिल्लामा रहेका १ सय ३९ वटै मतदान स्थल र ४ सय मतदान केन्द्रमा खटिएका मतदान अधिकृतहरु मतदान स्थलमा तैनाथ भएर आवश्यक निर्माण भैसकेको छ । उहाँहरुले गर्नुपर्ने औपचारिकताका कुराहरु, समन्वयका कुराहरु सबै पूरा भैसकेको छ । तीन वटै निर्वाचन क्षेत्रको मत पेटिका भण्डारण र गणना स्थल तयार भैसकेको छ ।
मत पेटिकाको सुरक्षालाई लिएर दलीय आशंका पनि गर्ने गरिन्छ । मतदान पछि बाकस पुर्याउने र त्यसको सुरक्षा गर्ने कुरा कसरी इन्स्योर गरिएको छ ?
मत पेटिका ढुवानी योजना बनेको छ । मत पेटिका ढुवानी योजना मुताबिक ठूलादेखि साना गाडी प्रयोग गर्छौ । बस, ट्रक र साना गाडीहरु प्रयोग गर्छौ । मत पेटिका सँगसँगै उम्मेदवार र दलका प्रतिनिधिहरुलाई पनि पछ्याउने, सँगसँगै रहनु कुराहरुलाई पनि व्यवस्थापन गरेर मत पेटिका भण्डारण गर्ने स्थलसम्म ल्याइन्छ । उहाँहरुको रोहवरमा राखिन्छ, शिल गरिन्छ । अनि निर्वाचन कार्यालयबाट मत गणनाको प्रक्रिया अगाडि बढाइन्छ ।
दल, उम्म्ेदवारका आचारसंहिता विपरितका कार्यहरुमा के गर्नुभएको छ ?
म प्रमुख जिल्ला अधिकारीको हिसाबले दल र उम्मेदवारको भूमिकाका प्रशंसा गर्छु । जसरी निर्वाचन प्रचारप्रसार अवधी सम्पन्न भयो । मौन अवधी सुरुवात भयो । यहाँ रहेका सबै दलका उम्मेदवारहरु, स्वतन्त्र उम्मेदवारहरु उहाँहरुको चुनावी क्याम्पेन सहज ढंगले अगाडि बढ्यो । उहाँहरु बीचको सम्बन्ध हार्दिकतापूर्ण छ । उहाँहरु कसैले कसैलाई निषेध गर्नुभएको छैन । यो अभियान सबैको हो, यो जिम्मेवारी सबैको हो त्यसो हुनाले दलहरु, उम्मेदवारहरु, स्वतन्त्र उम्मेदवारहरु आम मतदाता, मिडिया सम्पूर्णको साथ, सहयोगमा निर्वाचन स्वच्छ, निष्पक्ष र भयरहित वातावरणमा सम्पन्न हुन्छ भन्ने विश्वास छ मलाई ।
अन्त्यमा
आम बाँकेबासी मतदातालाई आफुलाई तोकेको मतदान स्थलमा सहज ढंगले गएर मतदान गर्नका लागि आग्रह गर्न चाहन्छु । कुनै पनि डर, त्रास, शंका उपशंका नगरिकन आफ्नो मतदान स्थलमा गएर मतदान गर्न आव्हान गर्दछु ।
