नेपालगन्जस्थित महेन्द्र बहुमुखी क्याम्पस अब पूर्ण रूपमा प्रविधिमैत्री बन्ने दिशामा अघि बढेको छ । क्याम्पसमा अध्ययनरत विद्यार्थीहरूको माग र आधुनिक शिक्षा प्रणालीको आवश्कतालार्य मध्यनगर गर्दै क्याम्पस प्रशासनले आफ्नै हाताभित्र अत्याधुनिक ‘इ–लाइब्रेरी’(इलेक्ट्रोनिक पुस्तकालय) स्थापना गर्ने कार्य अगाडि बढाएको छ ।
क्याम्पस प्रशासनको निरन्तरको पहल, अर्थ मन्त्रालय तथा संघीय शहरी विकास आयोजनाको आर्थिक सहयोगमा यो योजना साकार हुन लागेको हो । क्याम्पसमा नयाँ प्रशासनिक भवन निर्माणका लागि प्राप्त बजेटको उचित व्यवस्थापन र बचतबाट इ–लाइब्रेरीका लागि छुट्टै एकतले भवन निर्माणको काम सुरु गरिएको क्याम्पस प्रमुख डाक्टर लालमणि आर्चायले जानकारी दिएका छन् ।
महेन्द्र बहुमुखी क्याम्पसमा भौतिक पुर्वाधार विकासका लागि सुरुमा संघिय शहरी विकास आयोजना अन्तर्गत एकतले प्रशासनिक भवन निर्माण गर्न १ करोड रूपैयाँ बजेट विनियोजन भएको थियो । उक्त रकमको खर्च र सञ्चालनको सम्पूर्ण दायित्व शहरी विकास आयोजनाकै रहेको थियो । तर, क्याम्पसको आवश्यकता केवल प्रशासनिक भवनमा मात्र सीमित थिएन । क्याम्पस प्रशासनले थप पुर्वाधारको आवश्यकता औल्याउँदै निरन्तर पहल गरेपछि आर्थिक वर्ष २०८२÷०८३ का लागि बजेट बृद्धि भयो । आयोजनाले बजेट बढाएर ३ करोड रूपैया पुर्याएपछि क्याम्पसले तीनतले प्रशासनिक भवनको योजना अघि बढायो ।
क्याम्पस प्रमुख डा.आचार्यले भने, ‘सोही ३ करोड रूपैयाको बजेटबाट बचत हुने रकमलाई क्याम्पसको अति आवश्यक अर्को क्षेत्र अर्थात पुस्तकालयमा लगानी गर्ने निर्णय गरियो । क्याम्पस प्रशासन,प्राध्यापक र विद्यार्थीहरूको संयुक्त अनुरोध तथा ध्यानाकर्षणपछि उक्त बचत रकमबाट इ–लाइव्रेरीका लागि छुट्टै एकतले भवन निर्माणको थालनी गरिएको हो ।’
इ–लाइब्रेरीको आवश्यकता
महेन्द्र बहुमुखी क्याम्पसको हाता भित्र वि.स.२०३४ सालमा स्थापना भएको क्षेत्रीय पुस्तकालयले लामो समयदेखि यस क्षेत्रका विद्यार्थी र पाठकहरूलाई सेवा दिदै आएको छ । तर,बदलिँदो समय र प्रविधिको तीव्र विकाससँगै परम्परागत पुस्तकालयका आफ्नै सीमा र चुनौतीहरू थपिएका छन् । ‘अहिलेको युग प्रविधिको हो । हाम्रो पुराना पुस्तकालयमा रहेका पुस्तकहरूलाई व्यवस्थापन गर्न निकै गाह्रो र अप्ठ्यारो अवस्था छ’, क्याम्पस प्रमुख डा.आचार्यले भने, ‘प्रविधिको विकाससँगै हामी पनि विद्यार्थीहरूको माग र आधुनिक सुविधायुक्त पुस्तकालयको खोजीमा थियौ । अचेल शिक्षामा सम्पूर्ण क्रियाकलाप र अध्ययन सामग्रीहरू प्रविधिमा आधारित भइसेककाले इ–लाइब्रेरीको आवश्यकता एकदमै खड्किएको थियो ।’
क्याम्पसमा इ–लाइब्रेरी स्थापना भएपछि यहाँ अध्ययनरत हजारौ विद्यार्थीहरूले विश्वभरका उत्कृष्ट पुस्तक, शोधपत्र, जर्नल र शैक्षिक सामग्रीहरू एकै क्लिकमा निःशुल्क पढ्न पाउनेछन् । यसले गर्दा पुस्तकको अभावमा अध्ययन अनुसन्धान रोकिने समस्या सधैका लागि अन्त्य हुने विश्वास गरिएको छ ।
सबैको साझा सहयोग, क्याम्पस प्रशासनको सक्रियता र सरकारी निकायको समन्वयमा महेन्द्र बहुमुखी क्याम्पसले गरेको यो जमर्कोले बाँके नेपालगन्जको मात्र नभई समग्र पश्चिम नेपालकै शैक्षिक गुणस्तर सुधार्न एउटा महत्वपूर्ण इँट्टा थप्ने प्राध्यापकहरू बताउँछन् । पूर्वाधार निर्माण सम्पन्न भएसँगै क्याम्पसलाई डिजिटल हब बनाउने योजनामा क्याम्पस प्रशासन जुटेको छ ।
