लुम्बिनी प्रदेश सभाको बैठक मुख्यमन्त्री चेतनारायण आचार्यको विशेष सम्बोधनपछि पुनः सुचारु भएको छ । प्रमुख प्रतिपक्ष दलसहित अन्य प्रतिपक्षी दलले बैठक बहिष्कार गरेपछि आधा घण्टाका लागि स्थगित भएको बैठक मुख्यमन्त्री आचार्यले प्रतिपक्षले उठाएका विषयमा सरकारको धारणा सार्वजनिक गरेपछि सञ्चालनमा आएको हो ।
बैठकमा सम्बोधन गर्दै मुख्यमन्त्री आचार्यले बजेट विनियोजनका क्रममा छुटेका तथा अपुग भएका योजनालाई विभिन्न माध्यमबाट सम्बोधन गर्दै सरकार अघि बढ्ने प्रतिबद्धता व्यक्त गर्नुभयो । महत्वपूर्ण आयोजनामा आवश्यक बजेट थप गर्ने, क्रमागत योजनामा रकमान्तरमार्फत स्रोत व्यवस्थापन गर्ने तथा आवश्यक आयोजनालाई बहुवर्षीय योजनामा समावेश गरेर कार्यान्वयन गरिने उहाँले बताउनुभयो ।‘जुन महत्वपूर्ण आयोजनाहरुमा बजेटको कमी भएको छ । ति आयोजनाहरुलाई सम्वोधन गरेर सरकार अगाडी बढ्ने कुरामा म यहाँहरुलाई विश्वास दिलाउन चाहन्छु । जहाँ निर्वाचन क्षेत्रमा अग्लो, होचो हुन पुगेको छ । त्यो ठाउँहरुलाई पनि विभिन्न माध्यमबाट क्षतीपुर्ती गर्न हामी सक्छौं’उहाँले भन्नुभयो,‘अन्य प्रदेशहरुमा पनि त्यसैगरी अगाडी बढेको अवस्था छ । कतिपय क्रमागत योजनाहरुलाइ रकमान्तरण गरेर हामी परिपुर्ती गर्न सक्छौं । कतिपय आयोजनाहरु बहुबर्षियमा लगेर हामी सम्वोधन गर्न सक्छौं । यहाँहरुले जाहेर गरेको चिन्ता र चासो सबैको साझा बिषय हो । यसमा सरकार नजरअन्दाज गरेर अगाडी बढ्ने पक्षमा छैन ।’
निर्वाचन क्षेत्रका आधारमा कतै योजना कम वा बढी परेको भए त्यसलाई पनि विभिन्न माध्यमबाट सन्तुलन मिलाइने उल्लेख गर्दै मुख्यमन्त्री आचार्यले अन्य प्रदेशहरूले समेत यही अभ्यास अपनाएको बताउनुभयो । साना तथा अत्यावश्यक योजनालाई मर्मत सम्भार कार्यक्रममार्फत अघि बढाउने र मन्त्रालयबाट छुटेका योजनालाई समेत सम्बोधन गर्ने तयारी सरकारको रहेको उहाँको भनाई छ ।
प्रतिपक्षी दलले उठाएका चासो र चिन्ता सरकारका लागि पनि साझा विषय भएको उल्लेख गर्दै उहाँले सरकारले सदनमा व्यक्त गरेका प्रतिबद्धता पूर्ण रूपमा कार्यान्वयन गर्ने विश्वास दिलाउनुभयो । सरकार कुनै पनि विषयलाई नजरअन्दाज गरेर अघि नबढ्ने उहाँको भनाइ थियो ।
मुख्यमन्त्री आचार्यले प्रादेशिक अस्पताल तथा प्रदेश गौरवका आयोजनालाई सरकारले उच्च प्राथमिकतामा राखेको बताउनुभयो । प्राविधिक विश्वविद्यालय स्थापनाका लागि जग्गा प्राप्तिको प्रक्रिया अन्तिम चरणमा पुगेको र आवश्यक बजेटसमेत विनियोजन गरिएको जानकारी दिँदै उहाँले लुम्बिनी प्रादेशिक अस्पतालका लागि दुई अर्ब रुपैयाँ बजेट छुट्याइएको बताउनुभयो ।
रामपुर–कपुरकोट सडक आयोजनाको काम बहुवर्षीय ठेक्कामार्फत अघि बढिरहेको उल्लेख गर्दै उहाँले बाँकी खण्डको कामलाई पनि सरकारले निरन्तरता दिएको बताउनुभयो । प्रदेश गौरवका सबै आयोजनालाई प्राथमिकताका साथ कार्यान्वयन गरिने उहाँले स्पष्ट पार्नुभयो ।
प्रतिपक्षी सांसदहरूले उठाएका सुझाव र ध्यानाकर्षणलाई सरकारले गम्भीरतापूर्वक लिएको उल्लेख गर्दै मुख्यमन्त्री आचार्यले सदनमा व्यक्त गरिएका सबै प्रतिबद्धता कार्यान्वयन गर्न सरकार दृढ रहेको बताउनुभयो ।
