अन्तर्राष्ट्रिय युवा दिवस २०२६ को अवसरमा बर्दियाको मधुवन नगरपालिकामा विद्यार्थी तथा युवालाई लक्षित गर्दै लागुऔषधविरुद्ध सचेतना कार्यक्रम गरिएको छ । लागुऔषध दुव्र्यसनका कारण, त्यसले पार्ने असर र रोकथामका उपायबारे विद्यार्थीलाई जानकारी दिइएको हो ।
मधुवन नगरपालिकाको आयोजना तथा बाँके युनेस्को क्लब र जिल्ला प्रहरी कार्यालय, बर्दियाको समन्वयमा कार्यक्रम भएको हो । ‘फरक सन्दर्भ, साझा आकांक्षा’ भन्ने मूल भावका साथ आयोजित कार्यक्रममा शुक्र माध्यमिक विद्यालय, भृकुटी माध्यमिक विद्यालय र धर्मज्योति माध्यमिक विद्यालयका विद्यार्थी सहभागी थिए ।
कार्यक्रममा लागुऔषध प्रयोगका प्रमुख कारण, यसको शारीरिक तथा मनोसामाजिक असर, शिक्षा र पारिवारिक जीवनमा पर्ने प्रभाव तथा लागुऔषधसम्बन्धी कानुनी व्यवस्थाबारे जानकारी दिइएको थियो । त्यसैगरी दुव्र्यसनबाट जोगिने उपाय र आवश्यक पर्दा प्राप्त गर्न सकिने सहयोग तथा सेवाका विषयमा पनि छलफल गरिएको थियो ।
जिल्ला प्रहरी कार्यालय, बर्दियाका प्रहरी निरीक्षकले मुख्य सत्र सञ्चालन गरेका थिए। सत्रमा विद्यार्थीले लागुऔषध दुव्र्यसनबाट उत्पन्न हुने जोखिम र त्यसबाट बच्ने उपायबारे जानकारी लिएका थिए । युवालाई सचेत, स्वस्थ, जिम्मेवार र सकारात्मक जीवनशैलीतर्फ प्रेरित गर्नु कार्यक्रमको मुख्य उद्देश्य रहेको थियो ।
कार्यक्रममा सहभागी विद्यार्थी तथा युवालाई परिवार र समुदायमा सकारात्मक भूमिका निर्वाह गर्नसमेत प्रोत्साहित गरिएको थियो । लागुऔषध दुव्र्यसनसँगै मानव बेचबिखन र बाल संरक्षणसँग जोडिएका चुनौती समाधानमा पनि युवा पुस्ता सक्रिय हुनुपर्नेमा जोड दिइएको थियो ।
मधुवन नगरपालिकाका नगर प्रमुख तेजबहादुर भाटले युवालाई विकासका लाभग्राहीका रूपमा मात्र हेर्न नहुने बताए । उनीहरू सामाजिक रूपान्तरणका महत्वपूर्ण साझेदार र परिवर्तनका संवाहक रहेको उल्लेख गर्दै लागुऔषधको कुलतबाट युवालाई जोगाउन आवश्यक रहेकोमा उनले जोड दिए ।
कार्यक्रममा सहभागीहरूले बालबालिका तथा युवाका लागि सुरक्षित, सहयोगी र समावेशी वातावरण निर्माण गर्न स्थानीय सरकार, विद्यालय, सुरक्षा निकाय, परिवार, समुदाय तथा नागरिक समाजबीच सहकार्य आवश्यक रहेको बताएका थिए । उनीहरूले लागुऔषधमुक्त वातावरण निर्माणका लागि सामूहिक प्रतिबद्धतासमेत व्यक्त गरे ।
कार्यक्रममा मधुवन नगरपालिकाकी महिला, बालबालिका शाखा प्रमुख इन्द्रा चुनारा, शिक्षा शाखा प्रमुख नारायण खनाल, वडाध्यक्ष हर्कबहादुर बस्नेत, दिलिप गुरुङ, वडा सचिव शोभा शर्मा, बाँके युनेस्को क्लबका परियोजना संयोजक ईश्वर बीके, फिल्ड सुपरभाइजर सबित्रा भाटसहित शिक्षक र विद्यार्थीको सहभागिता थियो ।
कार्यक्रमले लागुऔषध दुव्र्यसनका दीर्घकालीन असरबारे विद्यार्थी तथा युवामा सचेतना बढाउन सहयोग पुगेको आयोजकले जनाएको छ । युवाको ज्ञान, सीप, सिर्जनशीलता र नेतृत्व क्षमतालाई सकारात्मक काममा प्रयोग गर्न सके बालबालिका तथा युवासँग सम्बन्धित चुनौती सामना गर्न सहज हुने सन्देश पनि कार्यक्रमबाट दिइएको थियो ।
