नेपाल प्रेस युनियन बाँकेले पत्रकारहरुको स्वास्थ्य र क्षमता विकासलाई केन्द्रमा राखेर विभिन्न कार्यक्रम सञ्चालन गर्ने भएको छ । युनियनले पत्रकारका लागि निःशुल्क मिर्गौला परीक्षण शिविरसँगै महिला पत्रकारलाई लेखनवृत्ति प्रदान गर्ने निर्णय गरेको हो ।
युनियन बाँकेको आइतबार बसेको कार्यसमितिको दोस्रो बैठकले संस्थागत गतिविधिलाई थप प्रभावकारी बनाउने निर्णय गर्दै पत्रकारहरुको स्वास्थ्य परीक्षण र महिला पत्रकारको लेखन क्षमता अभिवृद्धिका कार्यक्रम तय गरेको अध्यक्ष कमल खत्रीले जानकारी दिए ।
युनियनका संस्थापक स्व. पन्नालाल गुप्त ‘चाचाजी’ को जन्मजयन्तीको अवसर पारेर भदौ २७ गते नेपालगन्जमा पत्रकारका लागि निःशुल्क मिर्गौला परीक्षण शिविर आयोजना गरिने भएको छ । पत्रकारहरुको स्वास्थ्यप्रति चासो राख्दै युनियनले शिविरमार्फत मिर्गौला परीक्षणको अवसर उपलब्ध गराउन लागेको हो । शिविरमा पत्रकारहरुले निःशुल्क स्वास्थ्य परीक्षण गराउन सक्नेछन् ।
यस्तै, हरितालिका तीजको अवसरमा भदौ महिनाभित्र महिला पत्रकारका लागि लेखनवृत्ति कार्यक्रम आयोजना गरिने भएको छ । महिला पत्रकारलाई लेखनमा प्रोत्साहित गर्ने उद्देश्यले कार्यक्रम गर्न लागिएको युनियनले जनाएको छ ।
‘रसुवामा आएको बाढीका कारण देश नै दुःखमा रहेका बेला तीजको अवसरमा गरिने अन्य कार्यक्रम भने नगर्ने निर्णय युनियनले गरेको छ,’ अध्यक्ष खत्रीले दैनिक नेपालगन्जसँग भने, ‘त्यसको सट्टा महिला पत्रकारलाई लक्षित गरी लेखनवृत्ति कार्यक्रम मात्रै सञ्चालन गरिने भएको हो ।’
बैठकले समाजमा देखिएका समसामयिक समस्या र सार्वजनिक चासोका विषयमा नियमित संवाद गर्ने उद्देश्यले ‘युनियन संवाद’ कार्यक्रम पनि सञ्चालन गर्ने निर्णय गरेको छ । ‘यस्ता संवादमार्फत समाजका समसामयिक मुद्दामाथि छलफल र बहस चलाइनेछ,’ अध्यक्ष खत्रीको भनाइ छ ।
यसअघि आइतवारनै युनियन बाँकेले आफ्नो नयाँ कार्यसमितिको कामलाई प्रभावकारी बनाउन अग्रज पत्रकार तथा पूर्व अध्यक्षहरुसँग छलफल र परामर्शसमेत गरेको थियो । संगठनलाई चलायमान र सांगठनिक रुपमा थप बलियो बनाउने उद्देश्यले आइतबार नेपालगन्जमा छलफल गरिएको हो ।
‘युनियनलाई संगठनात्मक रुपमा बलियो बनाउँदै पत्रकारहरुको व्यावसायिक क्षमता बढाउनेतर्फ पनि ध्यान दिनुपर्छ,’ छलफलमा सहभागी अग्रजहरुले जोड दिए ।
पत्रकारिता क्षेत्रमा बदलिँदो अभ्यासअनुसार युनियनमा आबद्ध पत्रकारलाई आवश्यक सीप र ज्ञान उपलब्ध गराउन नियमित प्रशिक्षण आवश्यक रहेको उनीहरुको भनाइ थियो । संगठनलाई केवल गतिविधिमा सीमित नराखी सदस्य पत्रकारको व्यावसायिक विकाससँग जोडेर अघि बढाउनुपर्ने सुझाव पनि दिइएको थियो ।
युनियन बाँकेका अध्यक्ष कमल खत्रीको अध्यक्षतामा भएको छलफल तथा परामर्श कार्यक्रममा नेपाल प्रेस युनियन लुम्बिनी प्रदेशका उपाध्यक्ष जय सिंह केसी, महासचिव नवीन गिरी, नेपाल पत्रकार महासंघ लुम्बिनी प्रदेशका अध्यक्ष शुक्रऋषि चौलागाई, महासंघ प्रदेश सदस्य निर्मल आचार्य सहभागी थिए ।
यस्तै युनियन बाँकेका पूर्व अध्यक्षहरु प्रियास्मृति ढकाल र अर्जुन ओली, युनियनका पूर्व केन्द्रीय सदस्य उमा थापा मगर तथा अग्रज पत्रकारहरु निरज गौतम, बिजय कुमार बर्मा, राकेश मिश्र, मोहम्मद आरिफ अन्सारी र रुपन ज्ञवालीले संगठनलाई थप सशक्त बनाउने विषयमा सुझाव दिए । क्रियाशील महिला पत्रकार समूह बाँकेकी अध्यक्ष साबित्री गिरीले पनि महिला पत्रकारको क्षमता विकास र संगठनको भूमिकाबारे सुझाव दिइन् ।
