पत्रकार वीरेन्द्र जैसी परिवारले आमा विष्णादेवी जैसीको स्मृतिमा ३ लाख रुपैयाँको अक्षयकोष स्थापना गर्ने घोषणा गरेको छ । सामाजिक तथा सार्वजनिक हितका काममा उपयोग गर्ने उद्देश्यले परिवारले ‘विष्णादेवी जैसी स्मृति कोष’ स्थापना गर्ने भएको हो ।
आमा विष्णादेवीको यही भदौ १७ गते राति ५३ वर्षको उमेरमा असामयिक निधन भएको थियो । उनको निधनले परिवार स्तब्ध र मर्माहत भएको विज्ञप्तिमा उल्लेख गरिएको छ । भौतिक रूपमा उनी परिवारमाझ नरहे पनि उनले दिएका संस्कार, मार्गदर्शन र अमूल्य सम्झना सधैं जीवित रहने परिवारले जनाएको छ ।
परिवारका अनुसार, दिवंगत विष्णादेवीको स्मृतिलाई चिरस्थायी बनाउने र उनको दिव्य आत्माको शान्तिको कामना गर्दै कोष स्थापना गर्न लागिएको हो । सामाजिक तथा सार्वजनिक हितमा हुने काममा कोषको रकम उपयोग गरिनेछ । परिवारले कोषमा ३ लाख रुपैयाँ राख्ने घोषणा गरेको हो । उक्त रकम अक्षयकोषका रूपमा रहनेछ । कोषको सञ्चालन र व्यवस्थापनका लागि आवश्यक सम्पूर्ण प्रक्रिया आमा विष्णादेवीको प्रथम वार्षिक पुण्यतिथिसम्म पूरा गरिसक्ने परिवारले जनाएको छ ।
विज्ञप्तिमा भनिएको छ, ‘माताको भौतिक उपस्थिति नरहे तापनि उहाँले दिनुभएका संस्कार, मार्गदर्शन र अमूल्य यादहरू हाम्रा मनमस्तिष्कमा सदैव अमर रहनेछन् ।’ परिवारले माताको स्मृतिलाई सामाजिक सेवासँग जोड्ने उद्देश्यले कोष स्थापना गर्न लागेको जनाएको छ ।
कोष स्थापना गर्ने निर्णय स्वर्गीय विष्णादेवी जैसीका शोकसन्तप्त छोरा, छोरी, बुहारी तथा समस्त परिवारको तर्फबाट गरिएको हो । परिवारका तर्फबाट छोरा वीरेन्द्र जैसीले भदौ २४ गते जारी गरेको विज्ञप्तिमार्फत कोष स्थापनाको जानकारी सार्वजनिक गरेका हुन् ।
परिवारले कोषको रकमबाट सामाजिक तथा सार्वजनिक हितका कार्य अघि बढाउने जनाएको छ । अक्षयकोष सञ्चालनका लागि आवश्यक प्रक्रिया भने माताको प्रथम वार्षिक पुण्यतिथिसम्ममा पूरा गर्ने योजना परिवारले सार्वजनिक गरेको छ ।
