रावलको रेष्टुरेन्ट क्षेत्रमा नयाँ यात्रा
नेपालगन्जमा स्वादको विविधता, मौलिक परिकार र आत्मीय भेटघाटलाई एउटै थलोमा जोड्ने लक्ष्यसहित युवा सहकारीकर्मी तेजबहादुर रावलले रेष्टुरेन्ट व्यवसायमा लगानी विस्तार गरेका छन् । वित्तीय क्षेत्रलाई करिअर बनाउँदै आएका रावलको लगानीमा ‘नेपालगन्ज जमघट रेष्टुरेन्ट एण्ड किचन’ आइतवारदेखि औपचारिक रूपमा सञ्चालनमा आएको छ ।
नेपालगन्जमा फरक स्वादको पहिचान स्थापित गर्ने उद्देश्यसहित सुरु गरिएको रेष्टुरेन्टको उद्घाटन रावलकी आमा ललितादेवी, नेपालगन्ज उद्योग वाणिज्य संघका अध्यक्ष चिरञ्जीवी ओली र होटल व्यवसायी संघ बाँके, नेपालगन्जका अध्यक्ष भीमलाल कँडेलले संयुक्त रूपमा गरे ।
रावलका लागि ‘जमघट’ केवल खानपानको थलो मात्र होइन, स्वादसँगै आत्मीयता र संवाद जोड्ने प्रयास पनि हो । ‘नेपालगन्जमा बेग्लै स्वाद पस्किने हाम्रो लक्ष्य हो,’ उनले भने, ‘यहाँ स्वादको मौलिकता र विविधताको पक्कै महसुस गराइनेछ ।’
रेष्टुरेन्टको नामले नै भेटघाट र भलाकुसारीको भाव बोकेको उल्लेख गर्दै रावलले नेपालगन्जका असल व्यक्तिहरू नियमित रूपमा भेला हुन सक्ने वातावरण बनाउने सोच रहेको बताए । उनका अनुसार, ‘जमघट’लाई खानाका पारखीले नयाँ स्वाद लिन सक्ने र साथीभाइ तथा परिचितहरूसँग आत्मीय समय बिताउन सक्ने साझा थलोका रूपमा विकास गर्न खोजिएको हो ।
वित्तीय क्षेत्रको अनुभवलाई नयाँ व्यवसायमा विस्तार गरेका रावलले आगामी दिनमा थप लगानीसँगै क्याफे विस्तार गर्ने योजनासमेत सुनाएका छन् । रावलका अनुसार, स्वाद, मौलिकता र सामाजिक भेटघाटलाई केन्द्रमा राखेर अघि बढ्न खोजिएको ‘जमघट’ले नेपालगन्जको खानपान व्यवसायमा आफ्नो छुट्टै पहिचान बनाउने लक्ष्य लिएको छ ।
