नेपालगन्जको उर्दू साहित्यको उज्यालो फूलबारी ‘गुलजार–ए–अदब’ले आफ्नो ५ सय ८८औँ मासिक गजल गोष्ठी शनिबार महेन्द्र पुस्तकालयको साहित्यिक वातावरणमा आयोजना गरेको छ ।
वरिष्ठ शायर अब्दुल लतीफ ‘शौक’को अध्यक्षतामा भएको गोष्ठीमा ‘किसी भी आइने में देर तक चेहरा नहीं रहता’ भन्ने शीर्षकलाई केन्द्रमा राखेर विविध भावनाले सजिएका गजलहरू प्रस्तुत गरिएका छन् ।
नेपालगन्जका स्थापित शायरहरूदेखि नवोदित कलमधारीहरूसम्मले प्रेम, सामाजिक चेतना, अध्यात्म, आस्था र मानवताको विम्ब समेटिएका गहकिला शेरहरू सुनाए । शायर अब्दुल लतीफ ‘शौक’कोः
‘तुमही खुद टिक नहीं पाते हो अउर सब से यह भी कहते हो
किसी भी आइने में देर तक चेहरा नहीं रहता’
जस्तो शेरले दर्शकको हृदय छोएको थियो । सैय्यद अशफाक रसूल हाशमी ‘शैय्यद नेपाली’, मुस्तफा अहसन कुरैशी ‘अहसन’, अन्सर नेपाली, सैय्यद आदिल सरवर ‘सरवर नेपाली’, वशीम आलम मजहरी, इशमाइल अन्सारी, मो. आरिफ अन्सारी, मेराज अहमद ‘हिमालय’, सहबाज ‘साहीन’, र जहिरुल हक ‘जिनु’का गजलहरूले सभाहलमा गम्भीरता र भावुकता भरिदिएका थिए ।
कार्यक्रममा डा. उमेर सादिक, राशिद कमाल, बब्बु फारुकी, आसिम सरवरजस्ता साहित्य अनुरागीहरूको उल्लेखनीय सहभागिता रह्यो । सहभागीहरूका अनुसार, ‘गुलजार–ए–अदब’ले निरन्तर उर्दू साहित्य, विशेषतः गजल विधाको प्रवद्र्धनमा पु¥याइरहेको योगदान अत्यन्त प्रेरणादायी छ ।
कार्यक्रम सञ्चालन नुरुल हसन राईले गरेका थिए । आगामी गजल गोष्ठी साउन ३१ गते ‘जिन्होंने बस्ती उजाड़ डाली, कभी तो उनका हिसाब होगा’ शीर्षकमा हुने जानकारी मुस्तफा हसन कुरैशीले दिए ।
सहभागी श्रष्टा भन्छन्, ‘साहित्यको यस्तो साङ्गीतिक बहावमा डुबुल्की मार्ने अवसर फेरि आउँदैछ —शब्दहरू फेरि बोल्नेछन्, मन फेरि बोल्नेछ ।’
‘गुलजार–ए–अदब’मा नेतृत्व हस्तान्तरण
बाँकेमा रहेर उर्दू साहित्यको सेरोफेरोमा पाँच दशकदेखि सुगन्ध छरिरहेको संस्था ‘गुलजार–ए–अदब’ले शनिवार आफ्नो नेतृत्वको नयाँ अध्याय सुरु गरेको छ । पाँच दशकदेखिको यो संस्थामा नेतृत्व पुस्तान्तरण गरिएको छ ।
स्वास्थ्य कारणले अध्यक्ष पदबाट राजीनामा दिएका संस्थापक शायर अब्दुल लतीफ ‘शौक’ले नवयुगका लागि संस्था सुम्पँदै नयाँ कार्यसमितिको घोषणा गरेका हुन् । नयाँ नेतृत्व आफैमा नयाँ पुस्ता पनि हो ।
शनिवार साहित्यिक कार्यक्रमको अवसर पारेर वरिष्ठ शायर ‘शौक’ले आफ्नो दीर्घ योगदानलाई भावुक विदाइमा रूपान्तरण गर्दै आफ्ना कार्यकालका सचिव मुस्तफा अहसन कुरैशी ‘अहसन’लाई नेतृत्व सुम्पिएका हुन् । वरिष्ठ शायर अहसनको अध्यक्षतामा नुरुल हसन राई ‘नुरी’ उपाध्यक्ष र मोहम्मद आरिफ अन्सारी ‘अमन’लाई महासचिवको जिम्मेवारी प्रदान गरिएको हो ।
नवनियुक्त अध्यक्ष कुरैशीले साहित्यका विविध धारहरूलाई समेट्दै ‘गुलजार–ए–अदब’को भविष्य अझ सशक्त बनाउन संकल्प व्यक्त गरे । उनले संस्थालाई गति दिने प्रतिबद्धता व्यक्त गरे ।
साहित्यका कोमल शब्दहरू बीच गरिमामय शैलीमा भएको नेतृत्व हस्तान्तरण कार्यक्रमले गजलमय वातावरण मात्र होइन, उत्तरदायित्वको नयाँ उज्यालो पनि बोकेको अनुभूति गराएको थियो ।
‘गुलजार–ए–अदब’ विगत ५० वर्षदेखि नेपाली साहित्यिक परिवेशमा उर्दू गजल, कविता तथा बहुभाषिक साहित्यको सम्वाहक संस्था हो, जसले न केवल शब्दको साधना गरिरहेको छ, बरु संस्कृतिको संगालो पनि समेट्दै आएको छ ।
