मेहेन्दीको रंगसँगै सहकारी सचेतना, वित्तीय साक्षरताका संवाद
बहुसंख्यक महिलाले धार्मिक र साँस्कृतिक रुपमा ग्रहण गर्दै आएको श्रावण महिना र मेहेन्दी प्रचलनलाई आर्थिक सशक्तिकरणसंग जोडेर विहीवारदेखि नेपालगन्जमा ‘भरोसा मेहेन्दी उत्सव २०८२’ शुरु गरिएको छ ।
‘मेहेन्दीमा सजिएर श्रावण मनाऔं’ नारासहित भरोसा बहुउद्देश्यीय सहकारी संस्था लिमिटेडले शुरु गरेको यो उत्सवको तेस्रो संस्करण विहीवार प्रदेशसभा सदस्य, पूर्वमन्त्री कृष्णा केसी (नमूना)ले शुभारम्भ गरिन् । त्यसक्रममा उनले सहकारीको आवश्यकता र महत्वबारे धारणा राखिन् ।
भरोसा बहुउद्देश्यीय सहकारी संस्था लिमिटेडद्वारा आयोजित श्रावण ८ गतेसम्म चल्ने यो उत्सवमा महिलाहरुलाई मेहेन्दीको रंगसँगै सहकारी सचेतना, वित्तीय साक्षरताका संवाद हुनेछन् । ‘महिलाका लागि आर्थिक भरोसाको विकासलाई सचेतना दिन खोजिएको छ,’ भरोसाका सिइओ तेजबहादुर रावलले आयोजनाबारे प्रकाश पार्दै भने, ‘त्यसका लागि भरोसा मेहेन्दी उत्सवमार्फत सचेतना फैलाउन खोजिएको हो ।’
उत्सवका क्रममा सहभागी महिलाहरुलाई बचत देखि उद्यमशीलतासम्मका वित्तीय साक्षरतामा सहजीकरण गरिने रावलको भनाइ छ ।
संस्थाका अध्यक्ष बमबहादुर रावलको अध्यक्षतामा र पत्रकार सन्ध्या गैरेको सहजीकरणमा भएको उत्सव शुभारम्भ कार्यक्रममा जिल्ला सहकारी संघका अध्यक्ष प्रेम सुवेदीले स्थापनाको छोटो समयमा भरोसाले गरेको ‘भरोसायोग्य प्रगति’ले उत्साह जगाएको बताए ।
नेपालगन्ज उद्योग वाणिज्य संघ अध्यक्ष टंकप्रसाद धामी, लायन्स क्लब नेपालगन्जका अध्यक्ष यज्ञ बस्नेत, कसौंधन वैश्य समाजका अध्यक्ष सन्तोष कुमार वैश्य, कसौधन महिला मञ्चकी अध्यक्ष सरिता वैश्य, सचिव ज्योति कुमारी र सह–सचिव अनुपमा वैश्य लगायतका अतिथिहरुबीच भरोसाका सिइयो तेजबहादुर रावलले संस्थागत अवस्था पनि प्रकाश पारे ।
विगतका वर्षहरूझैँ यस वर्ष पनि महिलाहरूका लागि ‘मेहेन्दीमा सजिएर श्रावण मनाऔं’ भन्ने मूल नाराका साथ भरोसा मेहेन्दी उत्सव २०८२ आयोजना गरिएको सिइयो रावलले बताए ।
‘हामीले विभिन्न क्षेत्रका अगुवा महिलाहरुलाई एकै ठाउँमा राखेर आपसी सम्बन्ध विस्तार, आर्थिक सशक्तिकरणका अन्तक्र्रिया र मेहन्दी लगाएर रमाउने वातावरणमा सहजीकरण गरिरहेका छौं,’ सिइओ रावलको भनाइ छ ।
भरोसा बहुउद्देश्यीय सहकारी संस्था लिमिटेडले भरोसा मेहेन्दी उत्सवको पहिलो र दोस्रो संस्करणमा ५ सयबढीले उत्साहजनक सहभागिता जनाएको जानकारी दिंदै सहभागीलाई संस्थाले उपहारमार्फत खुशी बाढ्ने गरेको पनि जनाएको छ । ‘पहिलो दिननै दुईसयबढी महिलाको सहभागिताले उत्सव उत्साहजनक भएको छ,’ रावलले भने ।
