झोलुंगे पुलबाट खसेर जाजरकोटमा एकजनाको मृत्यु भएको छ । नलगाड नगरपालिका–५, ऐरारी निवासी २८ वर्षीय राजकुमार शाहीको मृत्यु भएको हो ।
भलिबल खेलाडी शाही दल्लीमा राष्ट्रपति रनिङ सिल्डमा सहभागी खेलाडीलाई प्रशिक्षण दिएर फर्किने क्रममा आइतबार राति पुलबाट खसेका हुन् । उनी नलगाड नगरपालिका–५, सिर्के र वडा नम्बर–८ जोड्ने झोलुंगे पुलबाट खसेका थिए । उनको टाउको र शरीरका विभिन्न भागमा चोट लागेको प्रहरीले जनाएको छ । दल्लीमा प्राथमिक उपचारपछि नेपालगन्ज पठाउँदै गर्दा बाटोमै उनको मृत्यु भएको जिल्ला प्रहरी कार्यालय जाजरकोका डीएसपी सन्तोष रोकाले जानकारी दिए ।
