जेनजी आन्दोलनका आडमा व्याप्त अराजकताका कारण नेपालमा भएको घटना क्रमलाई मध्यनजर भारतले नेपाल भारत सीमा नाका बन्द गरिएको छ ।
आन्दोलनसँगै सोमवार कडाइ गरेको भारतले मंगलवारदेखि जमुनाहा सीमा नाका पूर्णबन्द गरेको हो । नेपालगन्जमा बनेको त्रासदीपूर्ण अवस्थासँगै भारतीय सुरक्षाकर्मीहरूले रुपैडियामा माइकिङ गर्दै नेपालीहरुलाई देश फर्काउँदै नाका बन्द गरेका थिए ।
भारतीय सीमा सुरक्षा बलले नेपालबाट भारत जाने नेपाली यात्रुलाई निषेध गरिएको छ । भारतबाट आउने नेपालीलाई पनि अवस्था हेरेर जान दिइएको जनाउँदै भारतीयलाई नेपाल प्रवेश गर्न नदिइएको तथा नेपालीलाई भारत प्रवेश गर्न नदिइएको भारतीय सुरक्षा अधिकारीको भनाइ छ ।
जसले गर्दा अत्यावश्यक वस्तु आपूर्ति समेत प्रभावित बन्न पुगेको छ । भारतीयहरुका लागि भने सुरक्षा जाँचका साथ प्रवेश दिइएको छ ।
यससँगै नजिकिएको चाडबाडका लागि समेत आवश्यक सामग्री अभाव हुने देखिएको छ । बुधबार बिहानैबाट नाकामा कसैलाई पनि आवागमन गर्न नदिइएको जनाउँदै बिरामी, एम्बुलेन्स तथा अन्य आपातकालीन अवस्थाका नेपाली नागरिकलाई मात्र भारत प्रवेश गर्न दिइएको भारत रुपैडिहास्थित भारतीय प्रहरी थानाका प्रमुख रमेशसिंह रावतले बताएका छन् ।
देशभरी जेनजी विद्यार्थीले प्रदर्शन सुरु गरेपछि केन्द्रकै निर्देशनमा नेपाल भारत सीमा नाकामा भारतीय सुरक्षा पोष्टमा एसएसबीसँगै ठुलो संख्यामा सुरक्षाकर्मी तैनाथ गरेका थिए । देशका सबैजसो नेपालसँगका नाकामा यसरीनै सुरक्षा व्यवस्था मिलाइएको हो ।
प्रदर्शनकारीहरूले जमुनाहाको प्रहरी चेकपोस्ट र भन्सार यात्रु शाखामा मंगलबार दिउँसोपछि तोडफोड र आगजनी गरेपछि त्यहाँबाट हटेका सुरक्षाकर्मीहरू बुधबार बिहानमात्रै नाकामा पुगेर सुरक्षा दिन थालेका हुन् । रातभरि नाकामा नेपाली सुरक्षाकर्मीनै नरहेको अवस्था थियो ।
परिवर्तित राजनीतिक अवस्थासँगै यातायात र सीमा नाका बन्द छन् । यसले अन्तर्राष्ट्रिय व्यापार (आयात–निर्यात) ठप्प भएको छ । भदौ अन्तर्राष्ट्रिय व्यापार बढी हुने महिना हो । दशैं र तिहारका लागि लक्षित गरी बढी सामान यसै महिना आउने गर्छन् ।
मुलुकभित्र पनि अहिले सार्वजनिक तथा मालवाहक सवारीसाधन आवागमन बन्द छ ।
