सुर्खेतरोड भुजइगाउँदेखि देखि पार्वतीपुरसम्मको सडक खण्डमा सडक सीमा अतिक्रमण हटाउन सडक डिभिजन कार्यालयले ७२ घण्टे अल्टिमेटम दिएको छ । स्थानीयवासीका अनुसार, भौतिक पूर्वाधार तथा यातायात मन्त्रालय अन्तर्गत सडक डिभिजन कार्यालयले सार्वजनिक सूचना जारी गर्दै दिएको १५ दिनको समयसीमा सकिएपछि सोमवार सुरक्षा अधिकारीसहित पुगेको सरकारी टोलीले उक्त अल्टिमेटम दिएको हो ।
‘सडक सीमा खाली नगरे कानुनी कारबाही गरिने चेतावनीसमेत दिइएको छ,’ स्थानीयवासीले सिक्टा सिचाईंको नहरका लागि पर्याप्त क्षेत्रफल रहँदापनि सडकले जग्गा खाली गर्न खोजेको भन्दै सडक विस्तारका क्रममामात्रै यसरी अधिकारको प्रयोग गर्नुपर्ने गुनासो गरेका छन् । ‘सिक्टाले आफ्नो कामका लागि पर्याप्त क्षेत्रफल छ,’ उनीहरु भन्छन्, ‘विद्युतले पोल सारोस्, सरकारी तथा सार्वजनिक संरचना खाली गराएर व्यक्तिका घरलाई निशाना लगाउनुपर्नेमा उल्टो गरिएको छ ।’
भौतिक पूर्वाधार तथा यातायात मन्त्रालय अन्तर्गत सडक डिभिजन कार्यालयले सार्वजनिक सूचना जारी गर्दै सडक विस्तार तथा सुधार कार्य अघि बढाउन सडक सीमा भित्र परेका संरचना, टहरा, पर्खाल, पसल, ढल, नाली लगायतका अवरोध हटाउन आग्रह गरेको हो ।
सूचनाअनुसार भुजइगाउँ–पार्वतीपुर सडकखण्डको स्तरोन्नति तथा सुधार कार्यका क्रममा सडकको केन्द्रदेखि दायाँ–बायाँ २५÷२५ मिटर क्षेत्र सडक सीमा भित्र पर्ने भएकाले उक्त क्षेत्रमा निर्माण गरिएका स्थायी तथा अस्थायी संरचना हटाउनुपर्ने जनाइएको छ ।
सडक डिभिजन कार्यालयले तोकिएको समयसीमाभित्र सडक सीमा खाली नगरे सार्वजनिक सडक ऐन, २०३१ तथा प्रचलित कानुन बमोजिम सम्बन्धित संरचना हटाइने र त्यसबाट हुने क्षतिपूर्तिको दायित्व सम्बन्धित व्यक्ति स्वयंको हुने स्पष्ट पारेको छ ।
सडक विस्तार कार्य प्रभावकारी बनाउन स्थानीय बासिन्दा, व्यवसायी, घरधनी तथा सरोकारवालालाई सहयोग गर्न आग्रह गरिएको छ । ‘हामी विकास विरोधी होइनौं,’ स्थानीयवासी भन्छन्, ‘भएका घरसंरचना भत्काएर के बनाउने भन्ने कम्तिमा क्लिलियर गराएर नोक्सानी गरिदिएपनि उत्साहनै लाग्नेथ्यो ।’ कार्यालयका अनुसार, सडक सीमा खाली गरिएपछि सुर्खेत रोडको स्तरोन्नति तथा सुधार कार्य तीव्र गतिमा अघि बढाइनेछ ।
