नेपाली काँग्रेसका नेता किशोरसिँह राठौरले देश, लोकतन्त्र र नेपाली काँग्रेस इतिहासकै संकटपूर्ण अवस्थामा रहेको बताउनु भएको छ ।
बर्दियाको ठाकुरबाबा नगरपालिका वडा नम्बर ३ मा आज आयोजित चुनावी भेला तथा पार्टी प्रवेश कार्यक्रमलाई सम्वोधन गर्नुहुँदै नेता राठौरले फाल्गुण २१ गते हुने प्रतिनिधिसभाको निर्वाचन मुलुकलाई संकटबाट निकाल्ने र ७ दशक लामो अथक मेहनतबाट प्राप्त राजनीतिक व्यवस्था जोगाउने प्रमुख उपाय भएकाले निर्वाचन सफल पार्नतिर सबैको ध्यान केन्द्रित हुनुपर्ने बताउनु भयो ।
नेपाली काँग्रेसले नै अगुवाई गरेर नेपाली जनतालाई दक्षिण एशियामा सबैभन्दा बढी अधिकारसम्पन्न बनाएको, विभिन्न विकासका कार्य अघि बढाएको र काँग्रेसका नेता कार्यकर्ताकै त्याग र बलिदानबाट मुलुकमा शान्ति शान्ति स्थापना भएको उल्लेख गर्नुहुँदै नेता राठौरले अब पनि नेपाली काँग्रेसकै नेतृत्वमा मुलुकका बाँकी कार्यभार अघि बढाइने बताउनु भयो । जनताप्रति उत्तरदायी पार्टी नेपाली काँग्रेसलाई आगामी निर्वाचनबाट थप बलियो बनाउन काँग्रेसका नेता कार्यकर्ता र शुभचिन्तक एकजुट भै गम्भीरतासाथ लाग्नु पर्ने उहाँ
ले बताउनु भयो । भए गरेका कामको यथार्थ मूल्याँकन गरी काँग्रेसलाई मत दिन उहाँले जनतालाई पनि आग्रह गर्नुभयो ।
उहाँले बर्दियाको विकासमा विगतदेखि आफूले थालेका योजना तथा कार्यक्रमलाई निष्कर्षमा पुर्याउन तथा नयाँ योजना र कार्यक्रममार्फत् विकासमा हातेमालो गर्न आफूले यसपटक बर्दियाको क्षेत्र नम्बर २ बाट उम्मेदवारी दिएको बताउनु भयो ।
कार्यक्रममा तत्कालीन माओवादी केन्द्रका वडा अध्यक्षका उम्मेदवार कलिराम थारुसहित एमाले तथा अन्य विभिन्न दलका स्थानीय नेता कार्यकर्ता गरी २ दर्जन व्यक्तिहरु काँग्रेस प्रवेश गरेका छन् । नेता राठौरले नवप्रवेशीहरुलाई पार्टी सदस्यता, खादा, मालासहित काँग्रेसमा स्वागत गर्नुभयो ।
