उपसभापति विश्वप्रकाश शर्मा भन्छन्– ‘देशलाई जोड्ने शक्ति कांग्रेससँग मात्रै’नेपाली कांग्रेसका उपसभापति विश्वप्रकाश शर्माले पछिल्लो ‘जेनजी आन्दोलन’ पछि नेपाली कांग्रेस संगठनात्मक र वैचारिक रूपमा रुपान्तरण भएको दाबी गरेका छन् । कांग्रेस बाँकेद्वारा मंगलबार नेपालगन्जमा आयोजित बृहत् जिल्ला भेलालाई सम्बोधन गर्दै उनले अहिले कांग्रेस नयाँ सोच, नयाँ ऊर्जा र नयाँ नेतृत्वसहित जनतामाझ आएको बताएका हुन् ।‘कांग्रेस बदलिएको देखेर अन्य दलका कार्यकर्तासमेत पार्टीमा प्रवेश गरिरहेका छन्,’ उनले भने, ‘हामी फेरि जनताको विश्वास जित्ने गरी अघि बढिरहेका छौं ।’ युवा असन्तुष्टि र विद्रोहबाट पाठ सिक्नुपर्ने युवा नेता शर्माले हालको राजनीतिक अवस्था सामान्य नभएको उल्लेख गर्दै युवापुस्तामा बढ्दो असन्तुष्टि, जेनजी आन्दोलन र त्यस क्रममा भएका जनधनको क्षतिले मुलुक गम्भीर मोडमा पुगेको बताए ।उनले भने, ‘७४ आमाको काख रित्तिएको छ, सरकारी संरचना जलेका छन्, तर त्योभन्दा ठूलो कुरा नागरिकबीचको विश्वास जलेको छ । अब त्यो विश्वास जोड्नुपर्ने आवश्यकता छ ।’निर्वाचनलाई केवल सत्ता प्राप्तिको माध्यमका रूपमा नहेरी समाज र राज्य प्रणालीबीचको भरोसा पुनःस्थापित गर्ने अवसरका रूपमा लिनुपर्ने उनको भनाइ थियो । भविष्यमा फेरि नयाँ पुस्ताको विद्रोह दोहोरिन नदिन अहिले नै जिम्मेवार राजनीति आवश्यक रहेको उनले जोड दिए । ‘देश जोड्ने इतिहास कांग्रेससँग’ शर्माले कांग्रेसको ऐतिहासिक भूमिकालाई स्मरण गर्दै विभिन्न कालखण्डमा राष्ट्रिय एकता र सहमतिको नेतृत्व कांग्रेसले नै गरेको तर्क गरे ।राणा शासनपछि संक्रमण व्यवस्थापन, २०१५ सालको समावेशी सरकार, २०४६ सालको परिवर्तन, माओवादी शान्ति प्रक्रियादेखि संविधान निर्माणसम्मका घटनालाई उदाहरण दिँदै उनले कांग्रेसले सधैं विविधता गाँस्ने काम गरेको बताए ।‘संविधान निर्माणदेखि मधेसको असन्तुष्टि समाधानसम्म कांग्रेसले समन्वय र सहमतिमार्फत देशलाई जोडेको इतिहास छ,’ उनले भने, ‘आज पनि त्यो जिम्मेवारी कांग्रेसकै काँधमा आएको छ ।’ निर्वाचन केन्द्रित अभियान घोषणा उपसभापति शर्माले पार्टीले फागुन १ देखि २१ गतेसम्म ‘जसको पदिय जिम्मेवारी जहाँ, उसले खटिने त्यहाँ’ अभियान सञ्चालन गर्ने जानकारी दिए ।आगामी प्रतिनिधिसभा निर्वाचनपछि स्थिर सरकार निर्माण र त्यसपश्चात् नियमित महाधिवेशन तथा स्थानीय तह निर्वाचन तयारीमा पार्टी जुट्ने उनले बताए । वडा तहदेखि उम्मेदवार छनोटमा आन्तरिक लोकतान्त्रिक अभ्यासलाई प्राथमिकता दिने नीति बनाइएको पनि उनले स्पष्ट पारे ।‘टिकट वितरणभन्दा अघि वडा तहमा क्रियाशील सदस्यको सूची पठाएर चुनावमार्फत उम्मेदवार चयन गर्ने तयारी छ,’ उनले भने । स्थानीय नेताहरूको पनि एकताको सन्देश कांग्रेस बाँकेका कार्यवाहक सभापति गोपालप्रसाद अधिकारीको सभापतित्वमा भएको कार्यक्रममा केन्द्रीय सदस्य डा. गोपाल दहित, लुम्बिनी प्रदेश सभापति अमरसिंह पुन, प्रदेश उपसभापति राजु खनाल, जिल्ला सभापति नारायणप्रसाद गौडेल, सचिव शुधान्सु कोइराला लगायत नेताहरूले पार्टी एकता र निर्वाचन जित्ने संकल्प व्यक्त गरेका थिए ।विशेष महाधिवेशनपछि कुडिएको काँग्रेसी मनलाई राहत पुग्ने गरि उपसभापति शर्माले गरेको सम्बोधन कार्यक्रमको सञ्चालन कांग्रेस बाँकेकी सचिवसमेत रहेकी लुम्बिनी प्रदेश सभा सदस्य सञ्जुकुमारी चौधरीले गरेकी थिइन् । भेलामा सहभागी नेताहरूले बदलिँदो राजनीतिक परिस्थितिमा पार्टीभित्रको मतभेद बिर्सेर संगठन सुदृढीकरण, युवापुस्तासँग संवाद र जनविश्वास पुनःस्थापित गर्नुपर्नेमा जोड दिएका थिए ।कांग्रेसले आगामी निर्वाचनलाई देशमा स्थिरता र भरोसा फर्काउने अवसरका रूपमा लिएको उनीहरूको धारणा थियो ।निर्वाचन अभियानमा शर्मायस्तै, उपसभापति शर्मा मंगलवार दिउँसो नेपाली कांग्रेसको उम्मेदवारसहित बर्दिया क्षेत्र नं १ को क्षेत्रीय स्तरीय भेलामा सहभागी भए ।आज बुधबार भने उपसभापति शर्मा बिहान नेपाली कांग्रेसका सबै उम्मेदवार सहित दाङ जिल्लास्तरीय वृहत भेलामा सहभागी हुनेछन् ।यस्तै, माघ २९ गते बिहान उपसभापति शर्मा सबै उम्मेदवारसहितको रुपन्देही जिल्लास्तरीय वृहत भेलामा सहभागी हुनेछन् ।२९ गते नै दिउँसो नेपाली कांग्रेस, लुम्बिनी प्रदेश, निर्वाचन परिचालन समितिको बैठकमा पनि उपसभापति शर्माले सम्बोधन गर्ने तालिका कांग्रेसले सार्वजनिक गरेको छ ।यस्तै, फागुन १ गते उपसभापति शर्माले नेपाली कांग्रेसका सबै उम्मेदवारसहितको पाल्पाको जिल्लास्तरीय वृहत भेलामा सम्बोधन गर्ने बताइएको छ ।
