प्रतिनिधिसभा सदस्य निर्वाचनको अन्तिम परिणामलाई स्वीकार गर्दै उम्मेदवार दिपेन्द्र बिष्टले आफ्नो राजनीतिक यात्रा नरोकिने बताएका छन् । नेकपाका उम्मेदवार रहेका बिष्टले परिणाम सार्वजनिक भएपछि वक्तव्य जारी गर्दै विजयी उम्मेदवारलाई बधाई तथा शुभकामना व्यक्त गरेका हुन् ।
बिष्टले लोकतन्त्रमा जनताको निर्णय सर्वोपरी हुने उल्लेख गर्दै निर्वाचन परिणामलाई उच्च सम्मानका साथ स्वीकार गरेको बताएका छन् । ‘आजको परिणाम मेरो पक्षमा रहेन, तर बाँकेका आम नागरिकले मप्रति देखाउनुभएको अगाध माया, अभूतपूर्व विश्वास र अटुट साथलाई मैले जीवनकै सबैभन्दा ठूलो जनअभिमत मानेको छु,’ उनले शनिवार भनेका छन् ।
उनले हार र जितलाई निर्वाचनको प्राविधिक पक्ष मात्र भएको उल्लेख गर्दै आफ्नो लक्ष्य पद प्राप्त गर्नु मात्रै नभई बाँकेको समग्र विकास र परिवर्तन ल्याउनु रहेको बताएका छन् । सो लक्ष्यप्रति आफ्नो संकल्प अझै दृढ भएको उनको भनाइ छ ।
‘परिवर्तनको यो यात्रा यहाँ रोकिएको छैन, बरु अझ सशक्त ढंगले अघि बढ्ने ऊर्जा प्राप्त भएको छ,’ बिष्टले वक्तव्यमा उल्लेख गरेका छन् ।
निर्वाचनका क्रममा आफूलाई मतदान गर्ने तथा साथ दिने सम्पूर्ण मतदाता, शुभेच्छुक र पार्टीका नेता–कार्यकर्ताप्रति उनले आभार व्यक्त गरेका छन् । साथै उनले निर्वाचित प्रतिनिधिहरूलाई बधाई दिँदै आफ्नो क्षेत्रको विकासमा सकारात्मक भूमिका निर्वाह गर्न आग्रह गरेका छन् ।
बिष्टले आफूलाई विश्वास र साथ दिने सम्पूर्ण टिम तथा मतदातालाई धन्यवाद दिँदै आगामी दिनमा पनि जनताको सेवामा निरन्तर समर्पित रहने प्रतिबद्धता व्यक्त गरेका छन् । ‘परिवर्तनको आवाज अझै बुलन्द हुनेछ,’ उनले भनेका छन् ।
