वडाध्यक्षसहित ४ जना पक्राउ
भारतीय नागरिकलाई गैरकानुनी रूपमा नेपाली नागरिकता दिलाउन भूमिका खेलेको आरोपमा दाङमा वडाध्यक्षसहित ४ जनालाई प्रहरीले पक्राउ गरेको छ । राजपुर गाउँपालिका–४ का वडाध्यक्ष रामेश्वर अहिर, वडा सचिव राजेशकुमार कहर, कार्यालय सहायक मीना चौधरी र भारतीय नागरिक आलम जोल्दालाई पक्राउ गरेर अनुसन्धान अघि बढाइएको प्रहरीले जनाएको छ ।
इलाका प्रहरी कार्यालय गढवाका प्रहरी निरीक्षक डबलबहादुर बमका अनुसार, पक्राउ परेका चारै जनामाथि जिल्ला अदालत दाङबाट सोमबार ५ दिनको म्याद थप गरी अनुसन्धान भइरहेको छ । उनका अनुसार, भारतीय नागरिक आलम जोल्दालाई वंशजका आधारमा नेपाली नागरिकता दिलाउन वडा कार्यालयबाट आवश्यक कागजात तयार पार्न सहयोग गरेको आरोप उनीहरूमाथि लागेको छ ।
प्रहरीका अनुसार, आलम जोल्दाले विसं २०७५ कात्तिक २८ गते इलाका प्रशासन कार्यालय लमहीबाट नेपाली नागरिकता लिएका थिए । उनले बुवा सुनाउल्ला जोल्दाको नामका आधारमा वंशजको नागरिकता प्राप्त गरेका थिए । उक्त नागरिकतामा तत्कालीन कार्यालय प्रमुख प्रेमबहादुर खवासको हस्ताक्षर रहेको खुलेको प्रहरीले जनाएको छ ।
प्रहरी निरीक्षक बमले ‘भारतीय नागरिकले गैरकानुनी रूपमा नेपाली नागरिकता लिएको भन्ने उजुरीपछि अनुसन्धान अघि बढाइएको’ बताए । उनका अनुसार, अख्तियार दुरुपयोग अनुसन्धान कार्यालयले यस विषयमा नेपाल प्रहरीलाई पत्राचार गरेपछि अनुसन्धान प्रक्रिया सुरु गरिएको थियो ।
यस प्रकरणमा पक्राउ परेका चार जनासँगै तत्कालीन इलाका प्रशासन कार्यालय लमहीका प्रमुख प्रेमबहादुर खवास र भारतमा विवाह भएकी आयसा जोल्दाविरुद्ध पनि जेठ २० गते जिल्ला अदालत दाङबाट पक्राउ पुर्जी जारी भएको प्रहरीले जनाएको छ । तर उनीहरू हालसम्म पक्राउ परेका छैनन् । प्रहरीले खवास र आयसा जोल्दाको खोजी भइरहेको जनाएको छ । ‘उनीहरूको पनि खोजी कार्य जारी छ,’ प्रहरी निरीक्षक बमले भने ।
पक्राउ परेका राजेशकुमार कहर कपिलवस्तु जिल्लाको कृष्णनगर नगरपालिका–९ निवासी हुन् भने मीना चौधरी र वडाध्यक्ष अहिर दाङको राजपुर गाउँपालिका–४ निवासी हुन् । उनीहरूले नागरिकता सिफारिसका लागि आवश्यक प्रक्रिया मिलाइदिएको आरोपमा अनुसन्धान भइरहेको प्रहरीले जनाएको छ ।
