देशभर मनसुनी प्रणाली सक्रिय रहेकाले आज काठमाडौँ उपत्यकासहित अधिकांश स्थानमा मेघगर्जन तथा चट्याङसहित हल्कादेखि मध्यम वर्षाको सम्भावना रहेको छ ।
जल तथा मौसम विज्ञान विभागका अनुसार कोशी, मधेस, बागमती, गण्डकी, लुम्बिनी, कर्णाली र सुदूरपश्चिम प्रदेशका अधिकांश सहरी क्षेत्रमा दिनभर बदली रही वर्षा हुने पूर्वानुमान छ ।
विभागले सार्वजनिक गरेको सहरगत मौसम पूर्वानुमानअनुसार काठमाडौँ उपत्यकासहित देशका अधिकांश प्रमुख सहरमा आज दिनभर र रातिको समयमा पनि वर्षाको सम्भावन छ । विशेषगरी काठमाडौँ, पोखरा, ओखलढुङ्गा, ताप्लेजुङ, जिरी तथा डडेलधुरामा मेघगर्जन र चट्याङसहित मध्यम वर्षाको सम्भावना छ ।
यस्तै, विराटनगर, धरान, धनकुटा, भैरहवा, घोराही, वीरेन्द्रनगर, जुम्ला, दीपायल तथा सिमरामा ४० प्रतिशत वर्षाको सम्भावना रहेको विभागले जनाएको छ । जनकपुर, नेपालगञ्ज र जोमसोममा भने हल्का वर्षाको सम्भावना ३० प्रतिशत रहेको छ ।
राजधानी काठमाडौँमा आज अधिकतम तापक्रम २९ देखि ३१ डिग्री सेल्सियस रहने अनुमान गरिएको छ । रातिको न्यूनतम तापक्रम २० देखि २२ डिग्री सेल्सियस रहनेछ भने दिन र राति दुवै समयमा मेघगर्जन तथा चट्याङसहित मध्यम वर्षाको सम्भावना रहेको छ ।
पर्यटकीय सहर पोखरामा अधिकतम तापक्रम ३१ देखि ३३ डिग्री सेल्सियस पुग्ने अनुमान गरिएको छ । त्यहाँ दिन र राति दुवै समयमा मध्यम वर्षाको सम्भावना ६० प्रतिशत छ । ओखलढुङ्गा, ताप्लेजुङ र जिरीमा पनि निरन्तर वर्षा हुने सम्भावा रहेकाले पहाडी सडकमा यात्रा गर्दा विशेष सावधानी अपनाउन विभागले आग्रह गरेको छ ।
पूर्वी तराईका विराटनगर, धरान र जनकपुरमा मेघगर्जनसहित वर्षा हुने सम्भावना रहे पनि अधिकतम तापक्रम ३३ देखि ३७ डिग्री सेल्सियस रहने हुँदा गर्मीको प्रभाव पनि कायमै रहने अनुमान छ ।
पश्चिम नेपालका धनगढी, नेपालगञ्ज, भैरहवा र घोराहीमा हल्कादेखि मध्यम वर्षाको सम्भावना रहे पनि अधिकतम तापक्रम ३५ देखि ३८ डिग्री सेल्सियससम्म पुग्न सक्ने भएकाले वर्षासँगै गर्मी पनि बढ्ने सम्भावना छ । त्यस्तै धनगढी र नेपालगञ्जमा रातिको समयमा पनि हल्का वर्षा हुने अनुमान गरिएको छ ।
हिमाली क्षेत्रका जुम्ला, जोमसोम र ताप्लेजुङमा पनि मेघगर्जन तथा चट्याङसहित वर्षाको सम्भावना रहेको छ । ती क्षेत्रमा लगातारको वर्षाले पहिरोकाकारण सडक यात्रामा जोखिम बढ्न सक्ने भएकाले आवश्यक सतर्कता अपनाउन विभागले सुझाव दिएको छ ।
विभागका अनुसार सक्रिय मनसुनी प्रणालीका कारण केही स्थानमा छोटो अवधिमै मध्यमदेखि भारी वर्षा हुन सक्ने भएकाले नदी, खोला तथा खोल्सामा आकस्मिक बहाव बढ्न सक्छ । पहाडी तथा हिमाली जिल्लामा पहिरो र गेग्रान बहाव तथा सहरी क्षेत्रमा डुबानको जोखिमलाई ध्यानमा राख्दै सतर्क रहन सर्वसाधारणलाई आग्रह गरिएको छ ।
मौसमविद् सञ्जीव अधिकारीले मेघगर्जन र चट्याङको समयमा खुला स्थान, अग्ला रुख, बिजुलीका पोल तथा नदी किनारमा नबस्न तथा अत्यावश्यकबाहेक यात्रा नगर्न विभागका तर्फबाट सबैमा आग्रह गर्नुभयो ।उहाँले स्थानीय प्रशासन र मौसम विभागबाट जारी हुने अद्यावधिक सूचना नियमित रूपमा पालना गर्न पनि अनुरोध गर्नुभएको छ ।
–––
