सुशासनकै लागि भएको जेनजी आन्दोलन र त्यसैको बलमा बनेको झण्डै दुई तिहाईको वर्तमान सरकारले सय दिन पुर्याइरहादा सुशासन थप कमजोर बन्दै गैरहेको धारणा व्यक्त गरिएको छ । सोमबार नागरिक स्तरबाट गरिएको एउटा छलफलमा सहभागी विभिन्न राजनीतिक दलका प्रतिनिधिहरूले सुशासन र जनजीविकाका सवाल झनै जटिल बन्दै गएको धारणा व्यक्त गरेका हुन् ।
‘सीमापारीबाट अहिलेपनि तस्करी र सेटिङ्गबाट फलफुल, तरकारी लगायतका मालसामान आइरहेको छ’, उनीहरूले छलफलमा भने, ‘तर सीमा नाकामा आम नागरिकका लागि विभिन्न बहानामा बन्देज गरिंदा निकै महंगो दरमा उपभोक्ताले खरिद गर्नु परिरहेको छ ।’ उनीहरूले आँपकै उदाहरण दिंदै भने, ‘पारी दुई सय नम्बरको आँप ल्याएर नेपालगन्जमा दुई सय रूपैयाँ प्रतिकेजी बिक्री भैरहेको छ ।’ ‘बाँकेका सबैजसो बगैचामा आँप उहिल्यै सकियो, अनि बजारमा अहिले बिकीरहेको आँप कहाँको हो, कसले यसको गुणस्तर र मूल्य नियन्त्रण गरिरहेको छ ?’ खजुराका जनप्रतिनिधि धनराम ओलीले छलफलमा भने ।
अहिलेपनि मालपोत, भूमिसुधार लगायतका कार्यालयहरूमा घुस नरोकिएको बरु संगठित हुँदै गएको गुनासो उनीहरूको थियो । ‘राज्यले आफुले सुरक्षा गर्न नसकेको जनताको कागजपत्र प्रतिलिपि लिन धमाधम असुली भैरहेको छ’, छलफलमा उनीहरूले भने, ‘त्यतिले पनि नपुगेर विभिन्न बहानामा घुस खाने काम भैरहेको छ ।’
कर्मचारीहरूमा अनुशासन र जिम्मेवारीपन बढेको चर्चा सरकारले गरिरहँदा छलफलमा सहभागीहरूले भने त्यसलाई अस्वीकार गरे । ‘सन्त्रास र संशय बढेको छ’, छलफलमा सहभागीको भनाइ थियो, ‘त्यसले गर्दा उनीहरू आफ्नो अवैध असुलीको बाटो घुमाउरो बनाएका छन्, अदृश्य बनाउने प्रयास गरिरहेका छन्, तर आम जनताले पाउनुपर्ने सास्ती र अवैध भु्क्तानी रोकिएको छैन ।’
वरिष्ठ पत्रकार नरेन्द्रजंग पिटरको संयोजनमा भएको छलफलमा पूर्व मन्त्री महेश्वर गहतराज (अथक), कृष्णा केसी (नमूना), नेकपा एमाले बाँकेका अध्यक्ष निरक गुरुङ्ग, नगर अध्यक्ष मोहित शाह, नेकपा जिल्ला संयोजक दिपक जिएम, जनमोर्चाका नेता कृष्ण पाण्डे लगायतले बोलेका थिए । त्यस्तै, क्रान्तिकारी कम्युनिष्ट पार्टीका पोलिटब्यूरो सदस्य दिपक शाही, समाजसेवी, लायन्स लिडर मधुसुदन शर्मा रिजाल, मध्यपश्चिम खेलकुद विकास समितिका पूर्व अध्यक्ष भीम ओली, जगदीश ढकाल लगायतले आफ्ना धारणा राख्दै सरकार गैर जिम्मेवार भैरहँदा उसलाई जिम्मेवार बनाउन नागरिक दबाबको आवश्यकतामा जोड दिए ।
