नेपाल आयल निगमले बुधबारदेखि साविककै १४ दशमलव २ किलोग्राम ग्यास भरिएको सिलिण्डर बजारमा पठाउन निर्देशन दिएको छ ।
इण्डियन आयलका विभिन्न बोटलिङ्ग प्लान्ट तथा रिफाइनरीहरूबाट एलपी ग्यासको लोलिङको अवस्थामा सुधार आएको जनाउँदै निगमले बुधबारदेखि सिलिण्डरमा १४ दशमलव २ किलो ग्यास भर्न उद्योगीलाई निर्देशन दिएको प्रवक्ता मनोज ठाकुरले जानकारी दिएका छन् ।
निगमले १४ दशमलव २ किलो ग्यासको मूल्य प्रतिसिलिण्डर रु दुई हजार ६० तोकेको छ । निगमले तत्कालीन अवस्थामा ग्यासको आपूर्ति र वितरण प्रणालीलाई सहज बनाउन गत फागुन २९ गतेदेखि अर्को निर्णय नभएसम्म आधा तौल (७ दशमलव १ किलो) ग्यास भएको सिलिण्डर बिक्री गर्न निर्देशन दिएको थियो ।
यसअघि आधार सिलिण्डर ग्याँसको आपूर्तिले उपभोक्ताले सहज रूपमा र समयमै ग्याँस पाउन सकेका थिएनन् । ग्याँस उद्योग मार्फत डिलरहरूले आधा सिलिण्डर त्यो पनि अनियमित मात्रै ग्याँस प्राप्त गरेपछि उपभोक्तालाई पूरा सिलिण्डरको सट्टा आधा–आधा सिलिण्डर मात्र वितरण गरिरहेका थिए ।
‘आधा सिलिण्डर ग्याँस आएपछि उपभोक्ताको माग दोब्बर हुन्छ, तर समयमा ग्याँस नपाउँदा उपभोक्ताको माग अनुसार तत्कालै ग्याँस उपलब्ध गराउन सकिएको छैन’, एक ग्याँस बिक्रेताले भने, ‘यो ग्याँसको अभाव भन्दा पनि आधा सिलिण्डर ग्याँसका कारण निम्तिएको समस्या हो जस्तो लाग्छ ।’
उपभोक्ताहरू भने ग्याँस अभावका कारण दैनिक जीवन प्रभावित भएको गुनासो गर्दै आएका थिए । आधा सिलिण्डरले धेरै दिन नटिक्ने भएकाले फेरि छिट्टै ग्यास खोज्नुपर्ने बाध्यता सिर्जना भएको उनीहरूको भनाइ छ ।
सरकारले पुनः पूरा सिलिण्डर ग्याँस बिक्री गर्ने निर्णय गरे ढुवानी प्रक्रिया सहज भई नियमित आपूर्ति सुरु भएपछि ग्याँस वितरण पनि सामान्य अवस्थामा फर्किने व्यवसायीले बताएका थिए ।
