ठुलो पमिाणको अबैध लागुऔषध चेरससहित एक नेपाली भारतको बहराइच जिल्लास्थित रुपैडिहा सीमा नाकामा पक्राउ परेका छन् । भारतीय प्रहरीका अनुसार, १.५८६ किलोग्राम अवैध चरससहित एक नेपाली नागरिक पक्राउ परेका हुन् । बरामद चरसको अन्तर्राष्ट्रिय बजार मूल्य करिब १ करोड २५ लाख रुपैयाँ बराबर रहेको भारतीय प्रहरीले जनाएको छ ।
भारतीय प्रहरीका अनुसार, जाजरकोटको बारेकोट गाउँपालिका–४ निवासी ३४ वर्षीय विरेन्द्रबहादुर सिंहलाई मंगलबार दिउँसो रुपैडिहा एसएसबी चेकपोस्टमा गरिएको संयुक्त जाँचका क्रममा नियन्त्रणमा लिइएको हो । उनी नेपालबाट चरस बोकेर रुपैडिहा नाका हुँदै भारत प्रवेश गरिरहेको अवस्थामा पक्राउ परेका थिए ।
रुपैडिहा प्रहरी र सशस्त्र सीमा बल (एसएसबी)को संयुक्त टोलीले चेकजाँच अभियान सञ्चालन गरिरहेको बेला मंगलवार उनलाई शंकास्पद अवस्थामा रोकेर खानतलासी गरेको थियो । त्यसक्रममा उनको साथबाट १.५८६ किलोग्राम चरस बरामद भएको प्रहरीले जनाएको छ ।
घटनापछि विरेन्द्रबहादुर सिंहविरुद्ध रुपैडिहा प्रहरी थानामा मुद्दा नम्बर १७६÷२०२६ दर्ता गरिएको छ । उनीमाथि लागुऔषध तथा मनोप्रभावी पदार्थ नियन्त्रण ऐन (एनडिपिएस ऐन) अन्तर्गत दफा ८÷२० बमोजिम मुद्दा चलाइएको भारतीय प्रहरीले जनाएको छ । आवश्यक कानुनी प्रक्रिया पूरा गरी उनलाई अदालतमा उपस्थित गराइएको प्रहरीले उल्लेख गरेको छ ।
बहराइचका प्रहरी अधीक्षक विश्वजीत श्रीवास्तवको निर्देशनमा अपराध नियन्त्रण अभियानअन्तर्गत उक्त कारबाही गरिएको भारतीय प्रहरीले जनाएको छ । स्थानीय पत्रकार सन्तोषकुमार शुक्लका अनुसार, कारबाही अपर प्रहरी अधीक्षक (ग्रामीण) दुर्गा प्रसाद तिवारी, नानपारा क्षेत्राधिकारी पहुप सिंहको सुपरिवेक्षण तथा रुपैडिहा प्रहरी निरीक्षक रमेश सिंह रावतको नेतृत्वमा भएको थियो ।
