नेपालगञ्ज उपमहानगरपालिकाले भदौ १ गतेदेखि नगर क्षेत्रका २५ वटा अस्पतालमा ९४ वटा निःशुल्क शैयासहित पूर्ण स्वास्थ्य सेवा सञ्चालनमा ल्याउने भएको छ।
उपमहानगरपालिकाले बिहीबार पत्रकार सम्मेलनमार्फत विपन्न, असहाय तथा बेवारिसे नागरिकलाई लक्षित गरी सेवा सुरु गर्न लागेको जानकारी दिएको हो।
उपमहानगरपालिकाका अनुसार निःशुल्क शैयामा भर्ना हुने सेवाग्राहीले शैयासहित सम्पूर्ण उपचार सेवा निःशुल्क प्राप्त गर्नेछन्। अस्पतालमा उपलब्ध निःशुल्क शैयाको दैनिक अवस्था तथा सेवाको स्थितिबारे नागरिकलाई सहज रूपमा जानकारी दिने व्यवस्था मिलाइएको छ।
सेवा लिन सहज होस् भन्ने उद्देश्यले प्रत्येक सम्बन्धित अस्पतालको मुख्य प्रवेशद्वार नजिकै ‘निःशुल्क स्वास्थ्य सेवा सहयोग कक्ष’ स्थापना गरिनेछ। सहयोग कक्षमा फोकल पर्सनसमेत रहनेछन्।
निःशुल्क सेवा लिन सम्बन्धित वडा कार्यालयबाट आर्थिक रूपमा विपन्न भएको सिफारिस पत्र वा नेपाल सरकारले जारी गरेको विपन्न परिचयपत्रमध्ये कुनै एक पेश गर्नुपर्नेछ। आकस्मिक अवस्थामा आवश्यक कागजात तत्काल उपलब्ध नभए स्वघोषणा फाराम भरेर पनि उपचार सेवा लिन सकिने व्यवस्था गरिएको उपमहानगरपालिकाले जनाएको छ।
सेवा प्राप्त गर्न कठिनाइ भएमा वा सम्बन्धित अस्पतालले निःशुल्क उपचार उपलब्ध नगराएमा उपमहानगरपालिकाका जनस्वास्थ्य निरीक्षक तेज वलीसँग सम्पर्क गर्न सकिनेछ।
उपमहानगरपालिकाले विपन्न, असहाय तथा बेवारिसे नागरिकलाई स्वास्थ्य सेवामा सहज पहुँच सुनिश्चित गर्ने उद्देश्यले कार्यक्रम सञ्चालन गर्न लागेको जनाएको छ।
