नेपालगन्ज उद्योग वाणिज्य संघको ३४ औं र ३५ औं वार्षिक साधारण सभा भोलि शनिबार गर्ने निर्णय विरुद्ध अदालतमा परेको रिटमा आज १० बजे हुने भनिएको सुनुवाई अझै सुरु हुन सकेको छैन ।
संघका महासचिव भीम बहादुर रानाभाटले संघका तर्फबाट अधिवक्ताहरु बहसका लागि अदालत जानु भएको बताए ।
यद्यपि, अदालतमा हुने छलफल ३ बजेसम्मका लागि सरेको बताइएको छ ।
यसअघि उच्च अदालत तुलसीपुर, नेपालगन्ज इजलासले संघले आगामी साउन ३० गते शनिबार गर्ने गरी तय गरेको दुवै साधारण सभासम्बन्धी सम्पूर्ण कार्यक्रम छलफल नभएसम्म स्थगन गर्न अल्पकालीन अन्तरिम आदेश जारी गरेको थियो ।
संघका पूर्व कोषाध्यक्ष तनविर जमाल हलवाईले दायर गरेको उत्प्रेषण तथा परमादेशसम्बन्धी रिट निवेदनमा बुधवार सुनुवाइ गर्दै न्यायाधीश कोशलचन्द्र सुवेदीको एकल इजलासले यस्तो आदेश दिएको हो । अदालतले निवेदकले उठाएको विषयको प्रकृति र गम्भीरता हेर्दा दुवै पक्षलाई छलफलमा राखेर निष्कर्षमा पुग्न उपयुक्त देखिएको भन्दै तत्कालका लागि साधारण सभा रोक्न आदेश दिएको हो ।
आज छलफल पछि अदालतले अन्तरिम आदेश जारी गर्ने, नगर्ने निर्णय लिने सम्भावना रहेको छ ।
