मोहम्मद डे अर्थात मुस्लिम धर्मावलम्बीहरुका प्रवर्तक पैगम्बर मोहम्मदको जन्म दिनको अवसर पारेर नेपालगन्जमा पीपलको बिरुवा रोपेर धार्मिक सद्भावसँगै वातावरण संरक्षणको सन्देश दिइएको छ ।
१५०१औँ मोहम्मद जयन्तीका अवसरमा आयोजित शुभकामना तथा आपसी सद्भाव आदान–प्रदान कार्यक्रममा सहभागीले वृक्षरोपणलाई सामाजिक एकता र प्रकृति संरक्षणसँग जोडेर अघि बढाउने सन्देश दिएका हुन् ।
हरित अभियानकर्ता हेमन्तराज काफ्लेले उपलब्ध गराएको पीपलको बिरुवा कार्यक्रममा रोपिएको थियो । धार्मिक पर्वको अवसरलाई वातावरण संरक्षणसँग जोड्दै गरिएको वृक्षरोपणले नेपालगन्जको सामाजिक विविधताबीच साझा अभियान अघि बढाउन सकिने सन्देश दिएको सहभागीले बताएका थिए ।
प्रतिनिधिसभा सदस्य मोहम्मद इस्तियाक राईले वातावरण संरक्षणका लागि वृक्षरोपण र पीपल संरक्षणको आवश्यकता रहेको बताए । बढ्दो वातावरण प्रदूषणका कारण रुखबिरुवा अहिले झनै आवश्यक बनेको उनको भनाइ थियो । पीपल वातावरणका लागि महत्वपूर्ण बिरुवा भएकाले गर्मी हुने नेपालजस्तो ठाउँमा ठूलो संख्यामा पीपलका बिरुवा रोप्नुपर्ने उनले बताए ।
‘स्वच्छ तथा हरित वातावरण निर्माणका लागि रुखबिरुवा अहिलेको बढ्दो वातावरण प्रदूषणका बेला निकै आवश्यक छन् । पीपल वातावरणका लागि निकै महत्वपूर्ण बिरुवा हो । नेपालजस्तो गर्मी ठाउँमा सयौँ पीपलका बिरुवा लगाउन जरुरी छ,’ सांसद राईले भने, ‘यसका लागि सबैको सहकार्य आवश्यक छ ।’
नगर प्रमुख प्रशान्त बिष्टले मोहम्मद जयन्तीलाई धार्मिक पर्वमा मात्र सीमित गरेर हेर्न नहुने बताए। उनका अनुसार यो पर्व हिन्दु–मुस्लिम भाइचारा, धार्मिक सहिष्णुता, सामाजिक सद्भाव र आपसी एकताको प्रतीक पनि हो ।
नेपालगन्जको विविधतापूर्ण सामाजिक संरचनालाई थप बलियो बनाउन सबै समुदायबीच प्रेम, सम्मान र सहअस्तित्वको भावना कायम राख्नुपर्ने बिष्टले बताए। धार्मिक तथा सामाजिक विविधतालाई एकताको आधार बनाउँदै अघि बढ्न सके नेपालगन्जको सामाजिक सम्बन्ध अझ बलियो हुने उनको भनाइ थियो ।
कार्यक्रममा मेराज अहमद हिमालयले पनि सामाजिक एकता र वातावरण संरक्षण दुवै साझा विषय भएकाले समुदाय मिलेर काम गर्नुपर्ने बताए। ‘सामाजिक एकता, सद्भाव र वातावरण संरक्षणजस्ता साझा विषयमा सबै समुदाय मिलेर अघि बढ्नुपर्छ। त्यसैले हामीले पीपलको बिरुवा लगाएका हौँ,’ उनले भने ।
मोहम्मद जयन्तीका अवसरमा गरिएको वृक्षरोपणले धार्मिक सहिष्णुता र पर्यावरणीय चेतनालाई एउटै सन्देशमा जोडेको सहभागीले बताएका थिए। एकातर्फ पीपलको बिरुवा रोपेर प्रकृति संरक्षणको सन्देश दिइएको थियो भने अर्कोतर्फ जयन्तीमार्फत हिन्दु–मुस्लिम भाइचारालाई थप बलियो बनाउने सन्देश प्रवाह गरिएको थियो ।
कार्यक्रममा नेपालगन्ज उद्योग वाणिज्य संघका पूर्वअध्यक्ष कृष्णप्रसाद श्रेष्ठ, नन्दलाल बैश्य, क्लीन एण्ड ग्रीन नेपालगन्जका संयोजक डा. विनोद कर्ण, पत्रकार सिराज खान र इरफान सिद्दिकी लगायत विभिन्न क्षेत्रका व्यक्तित्वको सहभागिता थियो । उनीहरूले धार्मिक सद्भाव, सामाजिक एकता र वातावरण संरक्षणका अभियानलाई सँगसँगै अघि बढाउनुपर्ने धारणा राखेका थिए ।
