भदौ १० गतेको विनाशकारी बाढीबाट प्रभावित नागरिकको सहयोगार्थ ब्रह्माकुमारी ईश्वरीय विश्व विद्यालय एवं राजयोग प्रशिक्षण केन्द्रले १ करोड ४३ लाख ७५ हजार ३ सय ४२ रुपैयाँ संकलन गरी प्रधानमन्त्री दैवीप्रकोप उद्धार कोषमा पठाएको छ । देशैभरि सक्रिय संस्थाको पूर्व र पश्चिम क्षेत्रबाट संकलित उक्त रकम मानवीय सहायताका लागि उपलब्ध गराइएको हो ।
त्यसक्रममा संस्थाको नेपाल क्षेत्रीय कार्यालय नेपालगन्जले बाढीपीडितका लागि यस क्षेत्रबाट मात्रै ४ लाख ३० हजार ६ सय १५ रुपैयाँ सहयोग संकलन गरेको जनाएको छ । उक्त रकम प्रधानमन्त्री दैवीप्रकोप उद्धार कोषमा जम्मा गर्न केन्द्रीय कार्यालयमा पठाइसकिएको संस्थाकी केन्द्रीय उपाध्यक्ष एवं क्षेत्रीय प्रमुख राजयोगिनी ब्रह्माकुमारी दुर्गा दिदीले जानकारी दिइन् ।
उनका अनुसार, ब्रह्माकुमारीज संस्थामार्फत पूर्व क्षेत्रबाट १ करोड १ लाख रुपैयाँ सहयोग कोषमा जम्मा भइसकेको छ । पश्चिम क्षेत्रबाट ४२ लाख ७५ हजार ३ सय ४२ रुपैयाँ संकलन भएको छ । पूर्व र पश्चिम क्षेत्रबाट गरी कुल १ करोड ४३ लाख ७५ हजार ३ सय ४२ रुपैयाँ सहयोग पठाइएको उनले बताइन् । बाढीबाट भएको अकल्पनीय जनधनको क्षतिप्रति दुःख व्यक्त गर्दै संस्थाले शोकसभा पनि आयोजना गरेको उनले जानकारी दिइन् ।
यसैबीच, ब्रह्माकुमारी ईश्वरीय विश्व विद्यालय एवं राजयोग प्रशिक्षण केन्द्र, नेपाल, क्षेत्रीय कार्यालय नेपालगन्जको ३७औँ वार्षिकोत्सव तथा स्नेह मिलन समारोह आयोजना भएको छ । संस्थाको स्थापना दिवसका अवसरमा आइतवार आयोजित समारोहमा आध्यात्मिक जागरण, नैतिक शिक्षा र सामाजिक सेवामा संस्थाले पु¥याउँदै आएको योगदानको चर्चा गरिएको थियो ।
समारोहमा शिक्षाविद् जितबहादुर शाहले ब्रह्माकुमारीजले स्थापनाकालदेखि नै आध्यात्मिक र सामाजिक सन्देश प्रवाह गर्दै आएको बताए । उनले संस्थाका गतिविधि आगामी दिनमा टोलटोल र विद्यार्थीहरूमाझ अझ व्यापक रूपमा पु¥याउनुपर्ने धारणा राखे ।
मंगलप्रसाद माध्यमिक विद्यालयका प्राचार्य सन्ध्या गुप्ताले संस्थाले प्रदान गर्दै आएको आध्यात्मिक तथा नैतिक शिक्षालाई विद्यालयका विद्यार्थीसम्म पु¥याउन सहकार्य गर्ने प्रतिबद्धता जनाइन् । उनले संस्थासँग हातेमालो गरेर अघि बढ्ने बताइन् ।
नेपालगन्ज उपमहानगरपालिकाका प्रवक्ता एवं वडा नम्बर १ का वडाध्यक्ष प्रमोद रिजालले संस्थाले गर्दै आएको सामाजिक सेवाको प्रशंसा गरे ।
समारोहमा संस्थाकी क्षेत्रीय प्रमुख राजयोगिनी ब्रह्माकुमारी दुर्गा दिदीले संस्थाको सुरुवाती चरणमा विभिन्न चुनौती सामना गर्नुपरेको स्मरण गर्दै त्यसबेला समाजमा सेतो कपडाप्रति नकारात्मक दृष्टिकोण रहेको बताइन् । अहिले भने ब्रह्माकुमारीजले गर्दै आएको योगदानलाई समाजले बुझ्न थालेको र सम्मानसमेत गर्न थालेकोमा उनले खुसी व्यक्त गरिन् ।
‘भोलेनाथको कार्यमा निमित्त भएर सेवा गर्दै आएका छौं,’ उनले भनिन्, ‘ईश्वरीय साथ र सहयोगबाट संस्थाले सफलता हासिल गर्दै लुम्बिनी, कर्णाली र सुदूरपश्चिम प्रदेशसम्म आफ्नो सेवा विस्तार गर्न सकेको छ ।’
संस्थाको आध्यात्मिक तथा सामाजिक अभियानमा साथ दिने दाजुभाइ तथा दिदीबहिनीहरूप्रति कृतज्ञता व्यक्त गर्दै उनले आगामी दिनमा पनि सबैको सहकार्य र सहयोगले संस्थाका गतिविधि अघि बढ्ने विश्वास व्यक्त गरिन् ।
समारोहमा संस्थाको स्थापनाकालदेखि आबद्ध सदस्य र नवआगन्तुक सदस्यहरूको सहभागिता थियो। विभिन्न विधामा विजयी भएकाहरूलाई कार्यक्रममा पुरस्कृतसमेत गरिएको थियो । संस्थाले आध्यात्मिक जागरण, नैतिक शिक्षा, सामाजिक सेवा र मानवीय सहयोगका क्षेत्रमा गर्दै आएका गतिविधिलाई निरन्तरता दिने प्रतिबद्धता पनि स्थापना दिवसमा व्यक्त गरेको छ ।
कार्यक्रममा संस्थाका क्षेत्रीय सचिव ब्रह्माकुमारी कृष्णबहादुर रानाभाटले स्वागत मन्तव्यसँगै कविता वाचन गरेका थिए । समारोहको सञ्चालन संस्थाकी क्षेत्रीय उपप्रमुख ब्रह्माकुमारी मुनाले गरेकी थिइन् ।
