चोरीको मोटरसाइकलसहित अर्को युवक पनि समातियो८८
नेपालगन्जबाट लगिदै गरेको ६ किलोभन्दा बढी गाँजासहित एक जनालाई भारतीय प्रहरीले पक्राउ गरेको जनाएको छ । नेपाल सीमासँग जोडिएको भारतको रुपईडीहा क्षेत्रमा प्रहरीले गरेकोे कारबाहीमा प्रहरीले चोरीको मोटरसाइकलसहित अर्का युवकलाई पनि नियन्त्रणमा लिएको भनेको छ ।
रुपईडीहा प्रहरी र सशस्त्र सीमा बलको संयुक्त टोलीले मंगलबार राती सीमा क्षेत्रमा गस्तीका क्रममा गाँजासहित तस्करलाई पक्राउ गरेको हो । प्रहरीका अनुसार शिवपुर मोहरनिया तिराहा क्षेत्रमा नेपालतर्फबाट आइरहेको एउटा मोटरसाइकललाई रोकेर जाँच गर्दा गाँजा फेला परेको थियो ।
प्रभारी निरीक्षक रमेश सिंह रावतका अनुसार मोटरसाइकलमा राखिएको बोराको तलासी गर्दा ६ किलो ११३ ग्राम गाँजा बरामद भएको थियो । पक्राउ पर्ने व्यक्ति स्थानीय केवलपुर निवासी ४८ वर्षीय दिनेश कुमार दीक्षित रहेको प्रहरीले जनाएको छ । उनी रामफल दीक्षितका छोरा हुन् ।
प्रहरीका अनुसार दिनेशविरुद्ध यसअघि पनि लागूऔषधसम्बन्धी मुद्दा दर्ता भइसकेका छन् । विसं २०२२ र २०२५ मा समेत उनीविरुद्ध एनडिपिएस ऐनअन्तर्गत मुद्दा रहेको प्रहरीले जनाएको छ । बरामद गाँजाका आधारमा फेरि पनि एनडिपिएस ऐनअन्तर्गत मुद्दा दर्ता गरेर उनलाई न्यायिक हिरासतमा पठाइएको प्रहरी निरीक्षक रावतले बताए ।
यही क्रममा मंगलबार राति साढे १० बजेतिर रुपईडीहा प्रहरीले केवलपुर मोड नजिकै सवारी जाँचका क्रममा चोरीको मोटरसाइकलसहित अर्का युवकलाई पक्राउ गरेको छ । प्रहरीले शंकास्पद अवस्थामा मोटरसाइकल चलाएर आइरहेका युवकलाई रोकेर कागजात मागेको थियो । ‘तर, उनले मोटरसाइकलको कुनै वैध कागजात देखाउन सकेनन् । त्यसपछि उनलाई प्रहरी चौकीमा लगेर थप अनुसन्धान गर्दा मोटरसाइकल चोरीको रहेको खुलेको छ,’ प्रहरीले भनेको छ ।
प्रहरीका अनुसार जुन ९ मा मुरलीधर दंदौली निवासी रतन वर्माले आफ्नो मोटरसाइकल चोरी भएको भन्दै प्रहरीमा उजुरी दिएका थिए । सोही मोटरसाइकल कासिम शेखबाट बरामद भएको प्रहरीको भनाइ छ ।
पक्राउ पर्ने युवक २३ वर्षीय कासिम शेख रहेको प्रहरीले जनाएको छ । उनी दिलदारका छोरा तथा सीतापुरवा निवासी हुन् । उनीविरुद्ध मुद्दा दर्ता गरेर बहराइच अदालत पठाइएको प्रहरीले जनाएको छ ।
