बाँके जिल्ला स्तरीय मेयर कप अन्तर विद्यालय छात्र–छात्रा (यु–१८) फुटबल प्रतियोगितामा शनिबार युनाइटेड स्कुल र नेपालगन्ज सेन्ट जेभियर्सले प्रभावशाली प्रदर्शन गर्दै सहज जित निकालेका छन् ।
युनाइटेडका दिलिप थापा र सेन्ट जेभियर्सका महेश बुढाले समान ह्याट्रिक गर्दै आ–आफ्नो टोलीलाई विजयी गराएका हुन् । शनिबार भएका अन्य खेलमा नेपालगन्ज मोडेल एकेडेमी र निम्बल एकेडेमीले पनि पूर्ण अंक हात पारे ।
बाँके जिल्ला फुटबल संघद्वारा आयोजित प्रतियोगिताको पहिलो खेलमा युनाइटेड स्कुलले राम मावि कोहलपुरलाई ६–० गोलको फराकिलो अन्तरले हरायो। खेलको सुरुवातदेखि नै आक्रामक बनेको युनाइटेडका लागि क्रिस थापाले १२ र २६ मिनेटमा गोल गरे । दिलिप थापाले १५, ३९ र ४५ मिनेटमा लगातार तीन गोल गर्दै ह्याट्रिक पूरा गरे । अर्को एक गोल सुगम थापाले ४६ मिनेटमा थपे । उत्कृष्ट प्रदर्शन गरेका दिलिप थापा प्लेयर अफ द म्याच घोषित भए । उनलाई मध्यपश्चिम क्षेत्रीय खेलकुद विकास समितिका प्रशिक्षण विभाग प्रमुख जयन्त श्रेष्ठले पुरस्कार प्रदान गरे ।
दिनको दोस्रो खेलमा नेपालगन्ज मोडेल एकेडेमीले जनज्योति मावि कोहलपुरमाथि ३–० को जित निकाल्यो । मोडेलको जितमा सुनिल थारुले १८ मिनेटमा खाता खोले। त्यसपछि महेश शाहीले २५ मिनेटमा अग्रता दोब्बर बनाए । सुरेन्द्र महतराले ४६ मिनेटमा अर्को गोल थप्दै टोलीको जित सुनिश्चित गरे । मोडेलका सुनिल थारु प्लेयर अफ द म्याच बने। उनलाई पूर्वखेलाडी तेजविक्रम शाहले पुरस्कृत गरे ।
तेस्रो खेलमा नेपालगन्ज सेन्ट जेभियर्सले आदर्श मावि राँझाविरुद्ध ३–० को स्पष्ट जित दर्ता गर्यो । टोलीका महेश बुढा एक्लैले तीन गोल गर्दै खेलका नायक बने । उनले खेलको पहिलो मिनेटमै गोल गर्दै टोलीलाई अग्रता दिलाए। त्यसपछि तेस्रो मिनेटमा अर्को गोल थपे । ४० मिनेटमा तेस्रो गोल गर्दै उनले आफ्नो ह्याट्रिक पूरा गरे। उत्कृष्ट प्रदर्शनका कारण महेश बुढा प्लेयर अफ द म्याच घोषित भए । उनलाई बाँके जिल्ला फुटबल संघका उपाध्यक्ष टोपेन्द्र खत्री तथा न्यू डाँफे स्पोट्र्स क्लबका निवर्तमान अध्यक्ष तिलकबीर सुनारले पुरस्कार प्रदान गरे ।
शनिबारको अन्तिम खेलमा निम्बल एकेडेमीले मिसन पब्लिक स्कुललाई २–० ले पराजित गर्यो। खेलमा सुरुआती अग्रता भने मिसनले बनाएको थियो । २३ मिनेटमा तुफान सुनामले गोल गर्दै मिसनलाई अगाडि बढाए । तर त्यसपछि खेलको नियन्त्रण निम्बलले आफ्नो पक्षमा पार्यो । कृष्णबहादुर बुढाले ३७ मिनेटमा बराबरी गोल फर्काए। त्यसपछि कमल बुढाले ४५ मिनेटमा निर्णायक गोल गर्दै टोलीलाई जित दिलाए । कमल बुढा प्लेयर अफ द म्याच चुनिए । उनलाई बाँके जिल्ला फुटबल संघका सदस्य दिपेन्द्र घलेले पुरस्कार प्रदान गरे ।
नेपालगन्ज उपमहानगरपालिकाको सहयोगमा सञ्चालन भइरहेको प्रतियोगितामा जिल्लाका ३७ वटा विद्यालय सहभागी छन् । प्रतियोगिताका विजेता टोलीलाई ३१ हजार रुपैयाँ र उपविजेतालाई १६ हजार रुपैयाँ प्रदान गरिनेछ। यस्तै सर्वोत्कृष्ट खेलाडीले २ हजार ५ सय रुपैयाँ प्राप्त गर्ने एन्फाका केन्द्रीय सदस्य तथा बाँके जिल्ला फुटबल संघका अध्यक्ष भोजराज शाहीले जानकारी दिए । उनले भने, ‘प्रतियोगिताले विद्यालयस्तरको फुटबल विकासमा महत्वपूर्ण योगदान पु¥याउने विश्वास लिएका छौं ।’
यसैबीच प्रतियोगिताको छात्रातर्फको प्रतिस्पर्धामा ११ वटा विद्यालय सहभागी हुने भएका छन् । गत वर्षको विजेता नेपालगन्ज सेन्ट जेभियर्स र उपविजेता आदर्श मावि नेपालगन्जसहित सनविम मावि, मनकामना मावि, युनाइटेड एजुकेशनल, साइनिङस्टार, ज्ञानोदय मावि, नेपालगन्ज मोडेल एकेडेमी, योगिनी मावि, धम्बोझी मावि र मंगलप्रसाद मावि सहभागी रहेका छन् ।
छात्रातर्फका खेलहरू असार ४ गतेदेखि सुरु हुने तालिका छ । समूह ‘क’ मा नेपालगन्ज सेन्ट जेभियर्स, योगिनी मावि, मनकामना मावि, ज्ञानोदय मावि, युनाइटेड एजुकेशनल र मंगलप्रसाद मावि रहेका छन् । समूह ‘ख’ मा सनविम मावि, धम्बोझी मावि, साइनिङस्टार, नेपालगन्ज मोडेल एकेडेमी र आदर्श मावि नेपालगन्ज परेका छन् ।
