बाँकेका प्रमुख राजनीतिक दलहरूले शान्ति, सामाजिक सद्भाव, धार्मिक सहिष्णुता र कानुनी शासन कायम राख्न संयुक्त अपिल गरेका छन् । दलहरूले नागरिकलाई कुनै पनि प्रकारका अफवाह, घृणा फैलाउने अभिव्यक्ति तथा उत्तेजनात्मक गतिविधिबाट टाढा रहन आग्रह गर्दै घटनाको निष्पक्ष अनुसन्धान गरी दोषीलाई कानुनबमोजिम कारबाही गर्न सरकारसँग माग गरेका हुन् ।
मधेश प्रदेशको सुनसरीस्थित देवानगन्ज–३, कप्तानगन्जमा भएको घटनापछि देशका विभिन्न स्थानमा विकसित परिस्थितिप्रति चासो व्यक्त गर्दै शुक्रबार जारी गरिएको संयुक्त प्रेस विज्ञप्तिमा दलहरूले सामाजिक सञ्जाल वा अन्य कुनै पनि माध्यमबाट भ्रामक, भडकाउ तथा उत्तेजनात्मक सामग्री प्रसारण वा साझा नगर्न सबैलाई अपिल गरेका छन् । ‘अफवाह र उत्तेजनाले समाजमा थप तनाव सिर्जना गर्न सक्छ। त्यसैले अपुष्ट र भ्रामक सामग्रीको प्रसारणबाट सबैले टाढा रहनुपर्छ,’ विज्ञप्तिमा उल्लेख छ ।
नेपाल सरकारसँग घटनाको स्वतन्त्र, निष्पक्ष र प्रभावकारी अनुसन्धान गर्न माग गर्दै दलहरूले दोषीमाथि कानुनअनुसार कारबाही गर्न र पीडित परिवारलाई न्यायसँगै आवश्यक राहत उपलब्ध गराउन पनि आग्रह गरेका छन् ।
विज्ञप्तिमा बाँके जिल्ला धार्मिक, सांस्कृतिक तथा सामाजिक सद्भावको उत्कृष्ट उदाहरणका रूपमा परिचित रहेको उल्लेख गरिएको छ । जिल्लामा लामो समयदेखि कायम रहेको आपसी विश्वास, सहकार्य र सामाजिक एकतालाई अझ सुदृढ बनाउँदै कुनै पनि विभाजनकारी गतिविधिलाई असफल पार्न सबै पक्ष एकजुट हुनुपर्नेमा जोड दिइएको छ ।
