थपियो उम्मेदवारी फिर्ता लिने समय
नेपालगन्ज उद्योग वाणिज्य संघमा सर्वसम्मत पहलको दबाब बढेको छ । आगामी भदौ ६ गते हुने निर्वाचनका लागि भएको उम्मेदवारीमा उपाध्यक्ष सहित तीन पद निर्विरोध निर्वाचित भएपनि अन्य पदहरुमा आवश्यकताभन्दा बढी उम्मेदवारी परेपछि सर्वसम्मतको दबाब बढेको हो ।
मनोनयन दर्ताका क्रममा शुक्रवार उपाध्यक्ष वाणिज्यको एक पदमा एक जनाको मात्रै उम्मेदवारी परेको हो । उपाध्यक्ष वाणिज्यमा विष्णु प्रसाद श्रेष्ठको मात्रै उम्मेदवारी परेको छ । त्यस्तै, एशोसिएट तर्फ पनि आवश्यक पद संख्या अनुसार नै दुई पदका लागि राजिव तेलंगा र अब्दुल वाहिद अन्सारीको मात्रै उम्मेदवारी परेको छ ।
विभिन्न तीन संगठनको सहमतिमा अध्यक्ष पदमा उम्मेदवारी दिएका चिरञ्जीवि ओलीलाइै सर्वसम्मत हुन धु्रव प्रसाद दाहालले रोकेका छन् । उनले पनि अध्यक्ष पदमा उम्मेदवारी दिएर प्रचार अभियान शुरु गरिसकेका हुन् ।
संघमा उम्मेदवारी विरुद्ध दाबी शनिवार र मनोनयन फिर्ता लिने समय आइतवार सकिएको पनि निर्वाचन समितिले प्राविधिक कारण देखाउँदै आज सोमवारसम्मका लागि म्याद बढाएको छ । ‘एक जना सदस्य उम्मेदवारमात्रैको नामांकन फिर्ता भएको छ,’ सोमवार अपरान्हसम्मको म्याद थप गरिएको जानकारी दिंदै निर्वाचन समितिका संयोजक, अधिवक्ता तिर्थराज ज्ञवालीले दैनिक नेपालगन्जले भने, ‘त्यसअवधीमा आफ्नो उम्मेदवारी फिर्ता लिनसक्ने व्यवस्था मिलाइएको छ ।’ कतिपयले सर्वसम्मतको दबाब बढाउँदै त्यसैको अनुकूलताका लागि समय बढाइएको भन्दै आपत्ति जनाएका छन् ।
‘उनीहरुको उद्देश्य हामी पुरा गरिदिदैछैनौं,’ फरक समूहको वकालत गरिरहेका होटल व्यवसायी संघ बाँके, नेपालगन्जका अध्यक्ष भिमलाल कंडेलले दैनिक नेपालगन्जसँग भने, ‘कसैले पनि उम्मेदवारी फिर्ता लिने अवस्था आउँदैन ।’ नजिकै रहेका महासचिव पदका उम्मेदवार दीपेन्द्रकुमार जोशीले कंडेलको समर्थन गर्दै जबर्जस्ती र कुनै कारण विना सर्वसम्मतकै दबाबका लागि समय बढाइएकोमा आक्रोश व्यक्त गरे ।
सर्वसम्मतका लागि पहलको नेतृत्व गरिरहेका संघका पूर्व अध्यक्ष कृष्ण प्रसाद श्रेष्ठले भने निर्वाचनमा नाममा हुने विकृति विसंगतिको अन्त गर्दै व्यवसायिक एकता निर्माणका लागि सर्वसम्मत नेतृत्व आवश्यक भएको बताए । उनले त्यसका लागि सबै पूर्व अध्यक्षहरु अभूतपूर्व रुपले एकै ठाउँमा उभिएको दावी गर्दै भने, ‘सबै आस्था र विचारका संगठनहरु प्नि भएकै ठाउँमा आएकाले यो मौका कुनैपनि बहानामा गुम्न दिन हुँदैन भन्ने हाम्रो जोड हो ।’
