नेपालगन्ज उद्योग वाणिज्य संघको आसन्न निर्वाचनका लागि अध्यक्ष पदका उम्मेदवार चिरञ्जीवि ओली नेतृत्वको संयुक्त प्यानलले सोमबार सचिवालय सञ्चालनमा ल्याएको छ ।
संयुक्त प्यानलको सचिवालय उद्घाटनका क्रममा बोल्दै निर्वाचन परिचालन समितिका संयोजक ललित कुमार रौनियारले विभाजित मानसिकताले उद्योगी, व्यवसायीको हित नहुने आशय व्यक्त गरे । उनले अहिले सबैको भावना समेटेर एक भएर अगाडि बढेको उल्लेख गर्दै आगामी दिनका लागि यसले आम व्यवसायीका लागि संघमा प्रतिनिधित्व सुनिश्चित हुने आधार हुने बताए ।
कार्यक्रमका प्रमुख अतिथि नेपालगन्ज उद्योग वाणिज्य संघका अध्यक्ष टंक धामीले संयुक्त प्यानल संघमा विजयी हुने विश्वास व्यक्त गर्दै त्यसले संघले गर्न बाँकी रहेको कार्यहरू अगाडि बढाउने बताएका थिए । उनले साझा प्यानलका उम्मेदवारहरूलाई प्यानलको निर्देशन अनुसार अगाडि बढ्न सुझाव दिंदै सबै मिलेर अघि बढेकाले सफल हुने विश्वास व्यक्त गरे ।
संयुक्त प्यानलबाट अध्यक्ष पदका उम्मेदवार चिरञ्जीवि ओलीले सबैलाई समेटेर अगाडि बढ्ने बताएका थिए । उनले व्यवसायी माझ घरदैलो गर्न छोटो समय रहेको उल्लेख गर्दै व्यवसायीका समस्याहरू टिपिरहेको बताएका थिए । ‘व्यवसायीका समस्या कार्यान्वयनका लागि सम्बन्धित निकायसम्म पुर्याउँछौं’, अध्यक्ष पदका उम्मेदवार ओलीले भने । उनले संघमा विभिन्न पदको जिम्मेवारी सम्हालिसकेको अनुभव रहेकाले व्यवसायिक हितमा काम गर्ने प्रतिबद्धता जनाएका थिए । ‘व्यवसायीका साझा समस्या समाधानका लागि सरकारको ढोका घच्घच्याउँछौं’, उनले भने ।
कार्यक्रमका वक्ताहरूले सर्वसम्मत नेतृत्व चयनको प्रयास गरेपनि उम्मेदवारी परेपछि मतदानमा जानुपर्ने अवस्था आएको बताएका थिए । कार्यक्रममा प्यानलका तर्फबाट संघमा निर्विरोध निर्वाचित भएका उपाध्यक्षद्वयले प्यानलको पुरै टिम विजयी गराउन र त्यसपछि एक भएर व्यवसायिक हितमा काम गर्ने बताएका थिए ।
सचिवालय उद्घाटनका क्रममा संघका निवर्तमान अध्यक्ष अब्दुलवाहिद मन्सुरी, पूर्व अध्यक्ष कृष्ण प्रसाद श्रेष्ठ, नन्दलाल वैश्य लगायतले बोलेका थिए ।
कार्यक्रमको सञ्चालन गर्दै भीम बहादुर रानाभाटले १ सय ५१ सदस्यीय निर्वाचन परिचालन समिति गठन गरिएको जानकारी दिए । उनले निर्वाचन तयारीका लागि बसन्त लामिछानेको संयोजकत्वमा सात सदस्यीय सचिवालय गठन गरिएको बताए । त्यस्तै रानाभाटको संयोजकत्वमा ५ सदस्यीय घोषणा पत्र तयारी समिति पनि गठन भएको छ ।
