बर्दियाको ठाकुरबाबा नगरपालिकामा पाटे बाघको आक्रमणबाट एक महिलाको ज्यान गएको छ । मुक्तिपुर सामुदायिक वन किनारकाे चरिचरण क्षेत्रकाे चाैरमा बाख्रा चराउन जानुभएकी ठाकुरबाबा नगरपालिका ७ कि महिलाको पाटे बाघको आक्रमणबाग ज्यान गएको हो ।
ठाकुरबाबा नगरपालिका वडा नम्बर ७ शुन्दरपुर गाउँकी ४० वर्षिया पदमकला थापाकाे पाटे बाघको आक्रमणबाट ज्यान गएको ठाकुरबाबा नगरपालिका वडा नम्बर ७ का वडा अध्यक्ष कलम विष्टले जानकारी दिनुभयो ।
ठाकुरबाबा नगरपालिकाका मेयर तिकराम लम्सालले बर्दिया राष्ट्रिय निकुञ्जका कर्मचारी, नेपाली सेना, नेपाल प्रहरी र स्थानीय सहितकाे टाेलि लिएर बाघले आक्रमण गरेकाे ठाउँदेखि झन्डै ७ मिटर भित्र गएर शव ल्याएकाे वडा अध्यक्ष विष्टले बताउनुभयो ।
पाटे बाघले आक्रमण गरी घिसार्दै लैजाने क्रममा ओराही खाेला नजिकबाट हाेहल्ला गर्दै टाेलीले शव ल्याएका हुन् । शव पाेष्टमार्टमका लागि सदरमुकाम गुलरिया लैजाने तयारी भइरहेको प्रहरीले जनाएको छ ।
बकुवा नजिक मुक्तिपुर सामुदायिक वन किनारकाे चरिचरण क्षेत्र चाैरमा बाख्रा चराउने क्रममा आज दिउँसो पाटे बाघले उहाँलाई आक्रमण गरेको थियो ।
बर्दिया राष्ट्रिय निकुञ्जका वरिष्ठ प्रमुख संरक्षण अधिकृत डा. अशाेक रामका अनुसार बाघ नियन्त्रणमा लिन सामुदायिक वनमा हात्ती सहित प्राविधिक टाेली खटिसकेकाे छ । ढाट लगायतका अन्य प्रविधिको प्रयाेगबाट बाघलाई नियन्त्रणमा लिने प्रयास भइरहेको उहाँले बताउनुभयाे ।
यस आर्थिक वर्षको अवधिमा अहिलेसम्म बर्दिया निकुञ्ज मध्यवर्ती क्षेत्रमा पाटे बाघको आक्रमण परि २ जनाकाे ज्यान गएकाे राष्ट्रिय प्रकृति संरक्षण काेषका प्रमुख अजित तुम्बाहाम्फेले जानकारी दिनुभयो । गएको भदाै महिनामा पाटे बाघको आक्रमणबाट बाँसगढिमा एक महिलाकाे ज्यान गएको थियाे । यस्तै गैँडा र हात्तीको आक्रमणबाट यस आर्थिक वर्षमा २ जनाकाे ज्यान गएको छ ।
पछिल्लो समय पाटेबाघले घाँस दाउरा लिन गएका तथा सामुदायिक वन किनारका स्थानीयलाई आक्रमण गर्नुका साथै गाउँमै पसेर पनि पाटेबाघले स्थानीयको ज्यान लिने गरेको छ ।
