नेपालगन्ज उपमहानगरपालिका वडा नं. २२ पुरैनी बाँकेमा रहेको ह्याप्पी होप इङ्गलिस मिडियम स्कुलले सोमबार औपचारिक कार्यक्रम बीच बसन्त पञ्चमीसँगै बार्षिकोत्सव समारोहको आयोजना गरेको छ ।
विद्यालय व्यवस्थापन समितिका अध्यक्ष सागर ज्ञवालीको अध्यक्षतामा भएको कार्यक्रममा विभिन्न खेल प्रतियोगिता, उत्कृष्ट नजिजा ल्याउने विद्यार्थीको सम्मान, शिक्षक, कर्मचारी सम्मान, विद्यार्थीको सांस्कृतिक कार्यक्रम प्रस्तुति लगायतका कार्यक्रम आयोजना भएको थियो ।
विद्यालयले आयोजना गरेको १७औं बार्षिकोत्सवमा विद्यालय तथा विद्यालय बाहिर रहेका विद्यार्थीहरूलाई सम्मान गरिएको विद्यालयका प्रधानाध्यापक युवराज कोइरालाले जानकारी दिए ।
‘विद्यालयको बार्षिकोत्सवमा कबड्डि, फुटबल, क्रिकेट, १ हजार ८ सय मिटर दौड लगायतका प्रतियोगिता आयोजना गरिएको थियो’, प्रधानाध्यापक कोइरालाले बताए । विद्यालयले सैद्धान्तिकसँगै विद्यार्थीको क्षमता अभिवृद्धिका लागि अतिरिक्त क्रियाकलापमा जोड दिंदै आएको बताए । बसन्त पञ्चमीका दिन आयोजित बार्षिकोत्सवमा गत बर्ष २०८० को कक्षा ८ मा उत्कृष्ट नतिजा ल्याएका विद्यार्थीहरूलाई सम्मान गरिएको विद्यालयले जनाएको छ ।
‘वेष्ट कक्षा, शिक्षक, विद्यार्थी तथा विद्यालयमा सहयोग गर्ने सहयोग हातहरूलाई सम्मान गरिएको छ’, विद्यालयले दिएको जानकारीमा उल्लेख छ । त्यसक्रममा विद्यालयका सम्पूर्ण शिक्षक तथा कर्मचारी, कार्यालय सहयोगी देखि बसचालक, रिक्सा चालकलाई समेत सम्मान गरिएको थियो ।
बार्षिकोत्सव कार्यक्रममा विद्यार्थीहरूले सांस्कृतिक प्रस्तुति समेत राखेका थिए ।
शिक्षा विकास तथा समन्वय इकाइका अधिकृत लोक बहादुर शाहीको प्रमुख आतिथ्यतामा भएको बार्षिकोत्सव कार्यक्रममा वडा नं. २२ का वडाध्यक्ष गफ्फार हलवाईको उपस्थिति रहेको थियो ।
कार्यक्रममा विद्यालयका प्रबन्धक चेतलाल गिरी, प्रिन्सिपल युवराज कोइराला लगायत विभिन्न अतिथिहरूले बोलेका थिए । त्यसक्रममा अतिथिहरूलाई मायाको चिनो समेत प्रदान गरिएको थियो ।
१७ औं बार्षिकोत्सव मनाएको विद्यालयमा हाल १० कक्षासम्म अध्यापन हुँदै आएको छ भने ५ सय बढी विद्यार्थी रहेका छन् ।
