नेपालगन्जस्थित प्रसिद्ध शक्तिपीठ वागेश्वरी मन्दिरको संरक्षणदेखि लुम्बिनी प्रादेशिक विश्वविद्यालयलाई उच्च शिक्षाको उत्कृष्ट केन्द्रका रूपमा विकसित गर्नेसम्मका प्राथमिकता समेटिएको नीति तथा कार्यक्रम प्रदेश सरकारले आर्थिक वर्ष २०८२÷०८३ का लागि प्रस्तुत गरेको छ ।
नीति तथा कार्यक्रममा प्रदेशको दिगो, समावेशी र आत्मनिर्भर विकासलाई प्राथमिकता दिएता पनि नीति तथा कार्यक्रम महत्वाकांक्षी दस्तावेजका रूपमा आएको टिप्पणी गरिएको छ । यसमा लुम्बिनी प्रदेश राजधानीको गुरुयोजना कार्यान्वयनदेखि लुम्बिनी विकास प्राधिकरण स्थापना गर्ने योजना पनि समेटिएका छन् ।
लुम्बिनी प्राविधिक विश्वविद्यालयलाई अन्तर्राष्ट्रियस्तरको उत्कृष्ट केन्द्र बनाउने लक्ष्यसहितको नीति तथा कार्यक्रम बनाएको सरकारले नवप्रवर्तन इकाइ, इन्टर्नसिप कार्यक्रम, र विदेशी विद्यार्थीका लागि छात्रवृत्ति व्यवस्था गरिने भनेको छ ।
‘प्रदेश गौरवको आयोजनाको रूपमा रहेको लुम्बिनी प्राविधिक विश्वविद्यालयको भौतिक तथा अन्य संरचना विकास गरी प्राविधिक उच्च शिक्षाको उत्कृष्ट केन्द्रको रूपमा विकास गर्दै लगिनेछ,’ नीति तथा कार्यक्रममा भनिएको छ, ‘विदेशी विद्यार्थीलाई आकर्षित गर्न छात्रवृत्तिको समेत व्यवस्था गरिनेछ । विश्वविद्यालयबाट उत्पादित जनशक्तिलाई इन्टर्नसीप तथा स्वयंसेवाका लागि परिचालन गर्ने व्यवस्था मिलाइनेछ ।’
सोमबार प्रदेशसभा भवन देउखुरीमा प्रदेश प्रमुख कृष्णबहादुर घर्ती मगरले प्रस्तुत गरेको सरकारको आगामी आव २०८२÷०८३ को नीति कार्यक्रममा कृषि, युवाशक्ति, स्वदेशी उत्पादन, पूर्वाधार, शिक्षा, स्वास्थ्य, ऊर्जा, पर्यटन, वन, सहरीकरण, सामाजिक न्याय र वित्तीय अनुशासनका पक्षहरूलाई विशेष प्राथमिकता दिइएको छ । सरकारले नागरिकको योगदान, महिनाको एकदिन श्रमदान भन्ने नारा पनि ल्याएको छ । त्यसले विकासमा नागरिकको दायित्व जोडिने नीतिमा उल्लेख गरेको छ ।
नीति तथा कार्यक्रममार्फत सरकारले प्रदेश सरकारलाई भौतिक पूर्वाधार र मानवीय विकासका क्षेत्रमा सुदृढ बनाउँदै लैजाने, हरियालीसहितका सडक पूर्वाधार, सहरी सुन्दरताको आधार, स्वदेशी काठको प्रयोगलाई सरकारी कार्यालयमा अनिवार्यलगायतका नीति अघि सारेको छ ।
लुम्बिनी प्रदेश मानसिक स्वास्थ्य तथा मनोसामाजिक उपचार रणनीति २०८१–२०८६ लाई प्रभावकारी कार्यान्वयन गर्ने नीति अघि सारेको सरकारले आगामी वर्षदेखि मानसिक स्वास्थ्यका लागि मुख्य प्राथमिकतामा राखेर योग, ध्यान, सकारात्मक सोच विकास र सामाजिक परामर्शका कार्यक्रम गर्ने उल्लेख नीति तथा कार्यक्रममा गरेको छ । मुटुको भल्भ, क्यान्सर रोगको उपचारका लागि प्रतिव्यक्ति २ लाख सहयोग गर्ने घोषणासँगै आँखाको नानी प्रत्यारोपणका लागि पनि सरकारले सहयोग गर्ने भएको छ ।
“स्वदेशी उत्पादनको उपयोगस् समृद्ध प्रदेशमा सहयोग” भन्ने नारासहित नीति तथा कार्यक्रममा आत्मनिर्भर अर्थतन्त्रको जग बसाल्ने योजना अघि सारिएको छ । जसमा स्थानीय उद्योगलाई कच्चा पदार्थ, सुलभ कर्जा तथा बीउबिजन उत्पादनमा प्रोत्साहन दिइने भनिएको छ ।
प्रादेशिक यातायात गुरुयोजना निर्माणमा लागेको सरकारले नीति तथा कार्यक्रममा नयाँ झोलुंगे पुल, सडक मर्मत, सूचना बोर्ड स्थापना गरिने भनेको छ । आगामी नीति अनुसार, “मोबाइल हातमाः यातायात सेवा साथमा” नीति अन्तर्गत सवारी राजस्व प्रणाली पूर्ण रूपमा डिजिटल बनाइने भनिएको छ । सरकारले “मेरो विद्यालयः मेरो दायित्व”, “पढ्दै, सिक्दै, कमाउँदै”, “शिक्षासँगै सीप पनि” अभियानमार्फत शिक्षाको गुणस्तर सुधार गरिने भनेको छ ।
