जथाभावी कर र अनियमित विद्युतले समस्या
कुनै समय औद्योगिक नगरीका रूपमा चिनिएको नेपालगन्जका उद्योग तथा कलकारखानाहरू हाल सरकारी नीतिका कारण गम्भीर समस्यामा परेका छन्। सम्बन्धित उद्योगीहरूका अनुसार, नेपाली उद्योगलाई प्रोत्साहन गर्नुको सट्टा निरुत्साहित गर्ने सरकारको नीतिका कारण यहाँका उद्योगहरू निरन्तर अप्ठ्यारोमा पर्दै गएका छन्। नेपालगन्ज औद्योगिक क्षेत्र उद्योग विकास संघको शनिबार आयोजित दोस्रो साधारण सभा तथा अधिवेशनका क्रममा वक्ताहरूले यस विषयमा आफ्ना धारणा व्यक्त गरेका हुन्।
संघको अधिवेशनबाट नवनिर्वाचित अध्यक्ष अब्दुल वाहिद अन्सारीले नेपाली उद्योगलाई प्रोत्साहन गर्ने सरकारी नीतिको आवश्यकतामा जोड दिएका छन्। निर्वाचित भएलगत्तै दैनिक नेपालगन्जसँग कुरा गर्दै अध्यक्ष अन्सारीले जथाभावी कर, अनियमित विद्युत आपूर्तिलगायतका तमाम समस्याका बाबजुद पनि नेपालगन्जका उद्योगहरू अगाडि बढिरहेको औँल्याए।
अधिवेशनको उद्घाटन सत्रमा संघका पूर्व अध्यक्ष तथा वरिष्ठ उद्योगी राजेश मास्केले नेपालगन्ज औद्योगिक क्षेत्रभित्र उद्योग सञ्चालन गर्न विविध चुनौतीहरू विद्यमान रहेको उल्लेख गर्दै सबै उद्योगीहरूबीच आपसी सहयोग र सहकार्यको अनिवार्यतामा जोड दिए। उनले वर्तमान अवस्थामा औद्योगिक क्षेत्रभित्र देखिएका समस्या र चुनौतीहरूलाई चिर्दै अघि बढ्न उद्योगीहरूबीच हातेमालो अपरिहार्य भएको भन्दै यस उद्देश्यका लागि एकजुट भएर काम गर्नुपर्ने आवश्यकता औँल्याए।
कार्यक्रममा औद्योगिक क्षेत्र उद्योग विकास महासंघका उपाध्यक्ष वीरेन्द्र भट्टराई, नेपालगन्ज उद्योग वाणिज्य संघका महासचिव भीम रानाभाट, नेपालगञ्ज औद्योगिक क्षेत्र व्यवस्थापन लिमिटेडका कार्यालय प्रमुख प्रदीप पराजुली, तथा वरिष्ठ उद्योगी कन्हैयालाल वैद्यलगायतका विशिष्ट व्यक्तित्वहरूले शुभकामना मन्तव्य व्यक्त गरेका थिए। उनीहरू सबैले उद्योग क्षेत्रको दिगो विकास, आपसी सहकार्य र श्रम–पुँजीको समन्वयद्वारा उत्पादनशीलता वृद्धिका लागि सबै पक्षको सकारात्मक भूमिका आवश्यक रहेको उल्लेख गरे।
नेपालगन्ज औद्योगिक क्षेत्रमा सञ्चालनमा रहेका उद्योगहरूले राष्ट्रिय अर्थतन्त्रमा उल्लेखनीय योगदान पुर्याउँदै आएका छन्। १९७३ (२०३० साल) मा स्थापित नेपालगन्ज औद्योगिक क्षेत्रभित्र शिखर प्लाइ, विजय मेटल, लक्ष्मी प्लास्टिक जस्ता प्रतिष्ठित उद्योगहरूले उत्पादन गरिएका सामग्रीहरू राष्ट्रिय स्तरमा व्यापक व्यापार गर्दै आएका छन्।
संघका नवनिर्वाचित सचिब शरद रिजाल भन्छन्, ती सामग्रीहरू आन्तरिक बजारमा मात्र सीमित नरही, केही हदसम्म अन्तर्राष्ट्रिय बजारमा समेत निर्यात भइसकेका छन्, जसले यस क्षेत्रको आर्थिक महत्त्व र सम्भावनालाई प्रस्ट पार्छ।
उद्योगीहरूको सामूहिक आह्वान छ, सरकारले उद्योगमैत्री नीतिहरू ल्याई जथाभावी कर र विद्युत अनियमितता जस्ता समस्या समाधान गर्नुपर्नेमा केन्द्रित होस्, जसले नेपालगन्ज औद्योगिक क्षेत्रको निरन्तर वृद्धि र यसको राष्ट्रिय अर्थतन्त्रमा योगदान सुनिश्चित गर्न सकोस्।
