कर्णाली विकास बैंकमा तीन अर्ब २० करोड रुपैयाँभन्दा बढीको वित्तीय घोटाला भएको घटनामा प्रतिवादीहरूको बयान सकिएसँगै थुनछेक बहस सोमवार पनि जारी रहेको अदालत स्रोतले जनाएको छ ।
कर्णाली बैंक घोटाला प्रकरणमा अदालतले प्रतिवादीहरूको बयान लिने कार्य सम्पन्न गरेसँगै आइतवारदेखि थुनछेक बहस जारी राखेको हो ।
सम्बद्ध स्रोतका अनुसार, बहसको पहिलो दिन वादी नेपाल सरकारको तर्फबाट पाँच जना सरकारी वकिलले बहस गरेका थिए । सोमवार उच्च अदालत तुलसीपुर, नेपालगन्ज इजलासमा वरिष्ठतम् न्यायाधीश चन्द्रबहादुर सारु र न्यायाधीश पुनमसिंह चन्दको संयुक्त इजलासमा प्रतिवादी पशुपतिदयाल मिश्रको तर्फबाट वरिष्ठ अधिवक्ता लोकबहादुर शाहलगायतका सात जना वकिलले बहस पैरवी गरेका छन् ।
सोमवारनै अर्का प्रतिवादी वेदप्रकाश सिंह ठकुरी अधिवक्ता इश्वरी प्रसाद ज्ञवाली र चित्रबहादुर शाहीले बहस गरेका छन् ।
अदालतले अन्य प्रतिवादीहरूको तर्फबाट बहस आज मंगलवार हुने जनाएको छ । बहस सकिएपछि अदालतले प्रतिवादीहरूलाई धरौटीमा छाड्ने वा थुनामा राख्ने भन्नेबारे आदेश दिनेछ ।
संस्थापक अध्यक्ष राजेन्द्रबीर रायसहित पक्राउ परेकाहरुबारे अदालतले आइतवारदेखि बहस सुनुवाई शुरु गरेको हो । अभियुक्तसँग अदालतले विहीवारदेखि बयान शुरु गरेको थियो ।
उच्च अदालत तुलसीपुर, नेपालगन्ज इजलासका सूचना अधिकारी बलबहादुर विष्टले आइतवारदेखि थुनछेकका लागि बहस भइरहेको जानकारी दिंदै मंगलवार पनि निरन्तर हुने बताए ।
कर्णाली विकास बैंक घोटालामा १ सय ९ जनाविरुद्ध अदालतमा मुद्दा दर्ता गरिएपनि संस्थापक अध्यक्ष रायसहित ४ जनामात्रै पक्राउ गर्न सफल प्रहरीको केन्द्रीय अनुसन्धान ब्युरो (सीआईबी) ले उनीहरुविरुद्ध गरेको अनुसन्धानका आधारमा मुद्दा दायर गरेको हो ।
जिल्ला सरकारी वकिलको कार्यालय बाँकेले बुधबार रायसहित १ सय ९ जनाविरुद्ध उच्च अदालत तुलसीपुरको नेपालगन्जस्थित वाणिज्य इजलासमा मुद्दा दायर गरेको थियो । उनीहरुमध्ये अधिकाँश ऋणीसमेत छन् ।
बैंकका सञ्चालक, कर्मचारीसँगै कतिपयको मृत्यु भइसकेकाको नाममा पनि उजुरी परेको छ । ‘सीआइबीले अनुसन्धान गरेर दोषी खोजी गर्नु भन्दा भेटिएका सबैलाई एउटै डालोमा हालेर मुद्दानै कमजोर बनाएको देखिन्छ,’ बहसपैरवीमा सहभागी एक कानुन व्यवसायीले भने, ‘अब आरोप लागेकाबाटै आफु निर्दाेष रहेको प्रमाण संकलनका लागि मिहिनेत गर्नुपर्छ ।’
यस प्रकरणमा सीआइबीले ३ अर्ब २० करोड ११ लाख ५४ हजार १५७ रुपिया कुल विगो दावीसहित मुद्दा दायर गरेको छ । रायको नाममा सबैभन्दा बढी २ अर्ब ६३ करोड ३२ लाख १६ हजार रुपैयाँभन्दा बढी बिगो कायम गरिएको छ । मुद्दामा प्रतिवादी बनाइएका प्रमुख व्यक्ति बैंकका संस्थापक अध्यक्ष राय, पूर्व अध्यक्ष पशुपतिदयाल मिश्र, वित्त शाखा प्रमुख वेदप्रकाश सिंह ठकुरी, र राष्ट्र बैंकका पूर्व कर्मचारी भुवन बस्नेत पक्राउ परेका छन् । सीआइबीले बैंक घोटालाबारे केन्द्रीय बैंकलाई आन्तरिक अनुसन्धान गरि जानकारी दिने तत्कालिन अध्यक्ष डा. ओमप्रकाश मिश्रसमेतलाई अभियुक्तका रुपमा अदालत पुर्याएको छ । त्यसलगत्तै उनी फरार छन् । डा. मिश्र नेतृत्वको आन्तरिक अनुसन्धानलेनै रायको नेतृत्वमा ठुलो घोटाला भएको तथ्य राष्ट्रबैंकको उच्च नेतृत्वलाई बुझाएपछि समस्या ग्रस्त घोषणा गरि बैंक व्यवस्थापननै केन्द्रीय बैंकको नियन्त्रणमा पुगेको हो ।
यो प्रकरणमा गत साता मात्रै सीआइबीले नेपाल राष्ट्र बैंकका तत्कालिन उपनिर्देशक भुवन बस्नेतलाई पक्राउ गरेको थियो । कर्णाली डेभलपमेन्ट बैंकमा स्थलगत निरीक्षणका लागि गएको तर व्यक्तिगत लाभ लिएर बैंकको गम्भीर प्रकृतिका कैफियतलाई समेत ढाकछोप गरेको आरोप उनीमाथि छ । त्यसकै कारण संस्था नै धराशायी बनेको अनुसन्धानमा देखिएको छ ।
बस्नेतसंगै राष्ट्रबैंकका अन्य अधिकारी पनि अनुसन्धानको दायरामा आउने निश्चित भएपछि कर्णाली विकास बैंक घोटाला प्रकरण गम्भीर ढंगले अगाडी बढेको देखिन्छ । ‘यस्तो अवस्थामा अदालत अझैबढी संवेदनशील र जिम्मेवार बन्नुपर्ने अवस्था छ,’ बहसमा सहभागी अर्का कानुन व्यवसायी भन्छन्, ‘प्रहरी अनुसन्धानलाई आधार मानेर अगाडी बढ्ने अवस्थानै छैन, अदालतनै प्रो–एक्टिव भएर यो घटनालाई निष्कर्षमा पुर्याउनुपर्छ, ताकी अपराधको जरो फेला परोस् ।’
