२८ स्टलमा ६५ परिकार, करिब ९ सय पारखीले लिए स्वाद
नेपालगन्जस्थित वेस्ट जोन इङ्लिस मिडियम (ई.एम.) हाई स्कूलको आयोजनामा बिहीबार ‘फुड फेस्टिबल’ कार्यक्रम भव्य रूपमा आयोजना भएको छ ।
बालबालिकामा रहेको आन्तरिक प्रतिभाको उजागर, व्यवसायिक सोचको विकास र आत्मनिर्भरतातर्फ अभिप्रेरित गर्ने उद्देश्यले विद्यालयले पहिलो पटक यो फेस्टिबल आयोजना गरेको हो ।
विद्यालय इन्चार्ज कमल रानाका अनुसार, किताबी ज्ञानसँगै व्यवहारिक सीप र सृजनशीलतालाई अगाडि बढाउने उद्देश्यले यस्तो कार्यक्रम आयोजना गरिएको हो । ‘विद्यार्थीले योजना बनाउनेदेखि परिकार तयार पार्ने, मूल्य निर्धारण र बिक्रीसम्मका काम आफैँ गरेका छन्,’ उनले दैनिक नेपालगन्जसँग भने ।
विद्यालयका तर्फबाट ‘फुड फेस्टिबल’का लागि विद्यार्थीहरूलाई आवश्यक संयोजन, सहयोग र निर्देशन दिँदै आएकी शिक्षिका आशासिंह ठकुरीले पहिलो प्रयासमै विद्यार्थी र अभिभावक दुवैको उत्साहजनक सहभागिता देखिएको बताइन् ।
‘प्रत्येक कक्षा र समूहबाट तीनदेखि पाँच प्रकारका परिकार तयार पारिएका छन् । नेवारी र थारु परिकारदेखि मम, सेलरोटी र पकौडासम्मका विविध स्वाद समेटिएका छन्, उनले दैनिक नेपालगन्जसँग भनिन् । परिकारको स्वादसँगै संस्कृतिको पहिचान गराउनु पनि कार्यक्रमको उद्देश्य रहेको उनको भनाइ छ ।
विद्यालयका प्राचार्य आर.के. गौतमका अनुसार, विद्यार्थीहरूको सिर्जनशीलता र व्यवहारिक सीपलाई पाककलासँग जोड्दै व्यवसायिक सोंच विकास गराउने लक्ष्यका साथ फेस्टिबल आयोजना गरिएको हो ।
‘विद्यार्थीहरूले पकाउनेदेखि त्यसको व्यवस्थापन र व्यवसायिक पक्षसम्म आफैँ सम्हालेका छन्, विद्यालयले आवश्यक प्रशिक्षण, भौतिक सहयोग र सहकार्य गरेको छ,’ फेस्टिबलमा उत्साहित विद्यार्थी र अभिभावकको आकर्षण नियालिरहेका प्राचार्य गौतमले दैनिक नेपालगन्जसँग भने, ‘आउँदा दिनमा यसलाई अझ आकर्षक र व्यवस्थित गर्दै लगिनेछ ।’
उनका अनुसार, वेष्टजोनका विद्यार्थी संगठित, क्रियटिभ स्टुडेन्ट क्लब र जुनियर रेडक्रस सर्कलमा आबद्ध विद्यार्थीहरूले सामाजिक तथा सामूहिक उद्देश्यका लागि आर्जन भएको रकम खर्च गर्नेछन् ।
विद्यालयका अनुसार, कक्षा ६ देखि १० सम्मका विद्यार्थीहरूले २८ वटा विभिन्न स्टलमार्फत करिब ६५ प्रकारका परिकार प्रदर्शनी तथा बिक्रीका लागि राखेका थिए । कार्यक्रममा करिब ९ सय अभिभावक, अतिथि र विद्यार्थीहरूले सशुल्क रूपमा परिकारको स्वाद लिएका थिए ।
फेस्टिबलमा अभिभावकहरूको उत्साहपूर्ण सहभागिता देखिनुका साथै विद्यार्थीहरू पनि निकै रमाएका थिए ।
‘यसखालका कार्यक्रमले विद्यालयमा सिकाइलाई जीवनोपयोगी बनाउने अभ्यासको राम्रो उदाहरण प्रस्तुत गरेको छ,’ सहभागीहरूकाबीच रमाउँदै स्वाद चाखिरहेका वडाध्यक्ष गोविन्द रेग्मीले दैनिक नेपालगन्जसँग भने ।
विद्यालय इन्चार्ज रानाका अनुसार, वेष्टजोनले किताबी ज्ञानसँगै विद्यार्थीका अन्तर्निहीत प्रतिभा विभिन्न माध्यमबाट उजागर र विकास गर्न विभिन्न अतिरिक्त कार्यक्रम आयोजना गर्दै आएको छ ।
