नेपालगन्ज उपमहानगरपालिका वडा नं. ६ मा बनाउने भनिएको क्रिकेट मैदानको निर्माण कार्य विभिन्न कारणले अघि बढ्न नसकेपनि पुनः त्यसका लागि पहल अगाडि बढाइएको छ । नेपालगन्ज उपमहानगरपालिका र बाँके क्षेत्र नं. २ का संघीय सांसद मो. इस्तियाक राईले वडा नं. ६ मा क्रिकेट मैदान बनाउनका लागि पहल थालेका हुन् । पोखरीमा क्रिकेट मैदान बनाउन लागेको भन्दै अदालत मा मुद्दा परेपछि उपमहानगरपालिकाको क्रिकेट मैदान बनाउने योजना अलपत्र परेको थियो । अदालतले जग्गा संरक्षण गर्न र अन्य कुनै संरचना निर्माण नगर्न आदेश दिएको थियो । उक्त स्थानको केही क्षेत्रमा उपमहानगरपालिकाले जग्गा संरक्षणका लागि पर्खाल लगाएको छ । अदालतले पोखरीको अतिक्रमण खाली गर्न समेत आदेश दिएको थियो । अदालतको आदेश पछि रोकिएको काम मन्त्रीपरिषद्ले निर्णय नगरी अगाडि बढ्न नसक्ने अवस्था रहेको जनप्रतिनिधि बताउँछन् । त्यसका लागि उपमहानगरपालिकाले निर्णय गरी सम्बन्धित मन्त्रालय फायल पठाएपनि त्यहाँबाट फाइल अगाडि नबढ्दा क्रिकेट मैदानका लागि बजेट विनियोजन हुन सकेको थिएन । गत बैशाख ३१ गते भएको उपमहानगरपालिकाको सार्वजनिक सुनुवाईमा क्रिकेट मैदानबारे प्रश्न उठेपछि नगर प्रमुख प्रशान्त विष्टले आगामी असारभित्र मन्त्रालयमा पुनः डेलिगेशन जानेर स्वीकृतिका लागि पहल गर्ने प्रतिबद्धता जनाएका थिए । बाँके क्षेत्र नम्बर–२ बाट निर्वाचित प्रतिनिधिसभा सदस्य मोहम्मद इस्तियाक राईले क्रिकेट रङ्गशाला निर्माण छिट्टै सुरु हुने बताएका छन् । त्यसका लागि आफुले पहल गरेको र बजेट समेत विनियोजन भैसकेको सांसद राई बताउँछन् । सांसद राईले समयमै बजेट प्राप्त भएमा डेढ वर्षभित्र क्रिकेट रङ्गशाला निर्माण सम्पन्न हुने अनुमान गरिएको बताएका छन् ।नेपालगन्जमा फुटबलका लागि अन्तर्राष्ट्रिय स्तरको भव्य मैदान रहेको छ । कर्बड हल, स्विमिङ्ग, भारोत्तोलन, सुटिङ्ग जस्ता खेलका लागि पूर्वाधार रहेका छन् । नेपालगन्जले राष्ट्रिय तथा अन्तर्राष्ट्रिय स्तरका क्रिकेट खेलाडीहरू पनि जन्माएको छ । तर, ती खेलाडीका लागि नियमित प्रशिक्षण, अभ्यास र प्रतियोगिताका खेल मैदान भने छैन ।नेपालगन्जमा हाल क्रिकेट रङ्गशाला नहुँदा गणेशपुर, विशालनगरलगायत स्थानका खुला मैदान तथा खेतमै विभिन्न स्तरका क्रिकेट प्रतियोगिता सञ्चालन गर्नुपर्ने बाध्यता रहेको छ । बर्षौैदेखि मंगल माविको खेल मैदानमा क्रिकेट प्रतियोगिता हुने गरेका छन् । तत्कालीन नगर प्रमुख डा. धवल समशेर राणाको कार्यकालमा उपमहानगरपालिकाले क्रिकेट मैदानका लागि जग्गा खोज्नका लागि तत्कालीन वडा नं. २ का वडाध्यक्ष सुनिल सिंह हमालको संयोजकत्वमा कार्यदल बनाएको थियो । कार्यदलले नगर क्षेत्रमा रहेको सरकारी जग्गाहरू पहिल्याउँदै मैदानका लागि वडा नं. ६ मा रहेको जग्गा उपयुक्त हुने टुङ्गो लगाएको थियो । फुल्टेक्रा खाली रहेको कुल १० विगाह ५ कठ्ठा २ धुर जग्गा मध्ये ५ विगाह क्रिकेट मैदानका लागि छुट्याउने सहमति गरिएपनि पछि स्थानीयले असहमति जनाएका थिए भने मुद्दा अदालतसम्म पुगेको थियो । त्यहाँ रहेको ३ विगाह जग्गामा कर्बला र बाँकी जग्गा वडा कार्यालय, हिन्दु, फराकिलो बाटो र पार्किङ्गका लागि उपयोग गर्ने गरी पोखरी सम्याउने कार्य अदालतको अन्तरिम आदेश पछि रोकिएको थियो ।
