शिक्षाविद् तथा साहित्यकार किरण आचार्यको आत्मकथा ‘आरोह अवरोह’ मंगलबार नेपालगन्जमा आयोजित एक विशेष समारोहबीच विमोचन गरिएको छ । जीवनका संघर्ष, उतारचढाव, सफलता र अनुभवलाई समेटिएको कृतिलाई वक्ताहरूले एक व्यक्तिको जीवनी मात्रै नभई समय, समाज र चेतनाको दस्तावेजका रूपमा व्याख्या गरेका छन् ।
मंगलवार एक समारोहमा लुम्बिनी प्राविधिक विश्वविद्यालयका उपकुलपति प्रा.डा. विनोद प्रसाद ढकाल, प्रा.डा. जनार्दन आचार्य, लेखक किरण आचार्य, वरिष्ठ साहित्यकार सनत रेग्मी, वरिष्ठ पत्रकार नरेन्द्रजंग पिटर, भाषा आयोगका निवर्तमान सदस्य गोपाल अस्क र प्रकाशक संस्था, असल शासन मिडियाका अध्यक्ष नमस्कार शाहलगायतले संयुक्त रूपमा विमोचन गरे ।
प्रमुुख अतिथि उपकुलपति प्राडा ढकालले आत्मकथा कुनै व्यक्तिको निजी कथा मात्र नभई समाज र समयको इतिहाससमेत हुने बताए । उनले किरण आचार्यको जीवन संघर्ष, समर्पण र निरन्तरताले भरिएको उल्लेख गर्दै ‘आरोह अवरोह’ ले शिक्षा, समाज र राष्ट्रप्रतिको जिम्मेवारीबोधलाई समेत उजागर गरेको धारणा राखे । ‘जीवनमा आउने कठिनाइसँग कसरी जुध्ने भन्ने पाठ यो पुस्तकले दिन्छ,’ उनले भने, ‘यसले आगामी पुस्तालाई प्रेरणा दिने विश्वास लिएको छु ।’
वरिष्ठ साहित्यकार सनत रेग्मीले किरण आचार्य नेपाली साहित्य र शिक्षा क्षेत्रमा स्थापित तथा सम्मानित नाम भएको बताए । उनले आत्मकथाले एक महिलाको संघर्षशील यात्रालाई संवेदनशील ढंगले प्रस्तुत गरेको उल्लेख गरे । ‘पुस्तकमा रहेका अनुभव र भोगाइले पाठकलाई भावनात्मक मात्र होइन, बौद्धिक रूपमा पनि समृद्ध बनाउँछन्,’ रेग्मीले भने, ‘साहित्य समाजको ऐना हो । यो कृतिले समकालीन समाज बुझ्न मद्दत गर्छ ।’
वरिष्ठ पत्रकार, राजनीतिक विश्लेषक नरेन्द्रजंग पिटरले आत्मकथा लेखन आफैंमा साहसको विषय भएको बताए । उनले किरण आचार्यले जीवनका आरोह–अवरोहलाई निसंकोच रूपमा प्रस्तुत गरेको उल्लेख गरे । ‘यो केवल आत्मकथा होइन,’ उनले भने, ‘यसमा देशको सामाजिक, राजनीतिक र शैक्षिक अवस्थाको प्रतिबिम्ब पनि देखिन्छ । त्यसैले यो समकालीन समयको दस्तावेज बनेको छ ।’
भाषा आयोगका निवर्तमान सदस्य गोपाल अस्कले पुस्तकको भाषा सरल, सहज र पाठकमैत्री रहेको बताए । उनले साहित्य, भाषा र समाजलाई जोड्ने काम कृतिले गरेको उल्लेख गर्दै नयाँ पुस्तालाई साहित्य र सामाजिक उत्तरदायित्वप्रति आकर्षित गर्न पुस्तक उपयोगी हुने धारणा राखे ।
साहित्यकार भोजराज शर्माले आचार्यको जीवनयात्रा धेरैका लागि प्रेरणाको स्रोत बनेको बताए । ‘उनी निडर र हक्की स्वभावकी व्यक्तित्व हुन्,’ शर्माले भने, ‘निरन्तर अध्ययन, लेखन र समाजसेवामा सक्रिय रहनु नै उनको विशेषता हो ।’ हरित अभियन्ता हेमन्तराज काफ्लेले किरण आचार्यलाई सकारात्मक सोच र मानवीय मूल्यप्रति समर्पित व्यक्तित्वका रूपमा चित्रण गरे ।
मंगल प्रसाद नमुना माध्यमिक विद्यालयका प्रधानाध्यापक सन्ध्या गुप्ताले शिक्षा क्षेत्रमा आचार्यले दिएको योगदान महत्वपूर्ण रहेको बताए । उनले शिक्षण पेशाप्रतिको समर्पण र नेतृत्व क्षमता अनुकरणीय रहेको उल्लेख गर्दै आचार्यलाई आफ्नो जीवनको रोलमोडलका रूपमा चित्रण गरिन् ।
प्रकाशक संस्था, असल शासन मिडियाका अध्यक्ष नमस्कार शाहले पुस्तकको प्रकाशन प्रक्रिया र विषयवस्तुबारे जानकारी गराउँदै ‘आरोह अवरोह’ ले जीवनका संघर्ष, अनुभव र सफलताका अनेक पाटाहरू समेटेको बताए । ‘यसले पाठकलाई जीवन बुझ्न र चुनौतीसँग जुध्न प्रेरित गर्छ,’ उनले भने ।
लेखक किरण आचार्यले आफ्नो जीवनका भोगाइ, संघर्ष, सफलता र असफलताका अनुभवलाई पुस्तकमा समेटिएको बताइन् । बाल्यकालदेखि शिक्षण पेशासम्मको यात्रा, पारिवारिक र सामाजिक चुनौती, जीवनका उतारचढाव तथा त्यसबाट सिकेका पाठ पुस्तकमा समावेश गरिएको उनले जानकारी दिइन् । ‘मेरो अनुभव समाज र आगामी पुस्तासम्म पुगून् भन्ने उद्देश्यले यो पुस्तक लेखेकी हुँ,’ आचार्यले भनिन् ।
पुस्तकमा आचार्यको बाल्यकाल, शिक्षण क्षेत्रका अनुभव, सामाजिक तथा पारिवारिक जीवन, साहित्यिक यात्रा, देशको राजनीतिक परिवेश र जीवनका विविध आरोह–अवरोह समेटिएका छन् । असल शासन मिडियाका प्रबन्ध निर्देशक मन भण्डारीले सञ्चालन गरेको कार्यक्रममा विभिन्न क्षेत्रका व्यक्तित्वहरुको सहभागिता थियो ।
