नेपाल कम्युनिस्ट पार्टीका संस्थापक नेता पुष्पलाल श्रेष्ठको ४८औँ स्मृतिदिवसका अवसरमा बाँकेमा वामपन्थी शक्तिहरूको साझा सहभागितामा कार्यक्रम आयोजना गरिने भएको छ ।
नागरिक सरोकार मञ्च बाँकेले साउन ७ गते आयोजना हुने कार्यक्रममा जिल्लामा रहेका सबै वामपन्थी राजनीतिक दलका अध्यक्ष, जिल्ला कमिटी सदस्य, केन्द्रीय तहका नेता, विभिन्न जनवर्गीय संगठनका पदाधिकारी तथा सदस्य र बौद्धिक व्यक्तित्वहरूलाई सहभागी गराउने भएको हो ।
मञ्चका संयोजक मधुसुदन शर्मा रिजालले दिएको जानकारी अनुसार, वर्तमान राजनीतिक परिस्थितिका बीच पुष्पलालको योगदानको स्मरण गर्दै वामपन्थी शक्तिहरूबीच संवाद र सहभागितालाई सुदृढ बनाउने उद्देश्यले कार्यक्रम आयोजना गरिएको हो ।
आयोजकका अनुसार, कार्यक्रममा पुष्पलाल श्रेष्ठको राजनीतिक योगदान, विचार र वर्तमान राजनीतिक सन्दर्भबारे छलफल गरिने अपेक्षा गरिएको छ ।
सम्बन्धित राजनीतिक दलका केन्द्रीय पदाधिकारी, जिल्ला कमिटी तथा मातहतका कमिटी र जनवर्गीय संगठनका प्रतिनिधिहरूको सहभागिता हुने कार्यक्रमले राष्ट्रवादी शक्तिलाई पुनःजागृत गर्ने विश्वास लिइएको मञ्चका सदस्य दीपक बहादुर शाहीले बताए ।
