राजनीतिक विचार, ऐतिहासिक पृष्ठभूमि र आन्दोलनका फरक–फरक धारका व्यक्तित्वलाई एउटै सम्मानका साथ सार्वजनिक स्थलमा स्थापित गर्ने सहरका रूपमा नेपालगन्जले शनिबार अर्को सन्देश दिने भएको छ ।
विभिन्न आन्दोलनका क्रममा क्षतिग्रस्त भएका ऐतिहासिक तथा राजनीतिक व्यक्तित्वका पुनर्निर्मित सालिकहरूको अनावरण नेपालगन्ज उपमहानगरपालिकाले साउन ९ गते शनिबार बिहान हरियशनी एकादशीको दिन पारेर गरिने भएको हो ।
देश र समाजका लागि योगदान पु¥याएका विशिष्ट व्यक्तित्व, अमर शहीद तथा विभिन्न कालखण्डका राजनीतिक, सामाजिक र ऐतिहासिक व्यक्तित्वका सालिक पुनर्निर्माणको काम सम्पन्न भइसकेको नगर प्रमुख प्रशान्त विष्टले जानकारी दिए । उनका अनुसार पुनर्निर्मित सबै सालिकको अनावरण सम्बन्धित स्थानमै निर्धारित समयअनुसार गरिनेछ ।
नेपालगन्जमा पुनःस्थापना गरिएका सालिकहरूले फरक विचार र इतिहासलाई एउटै सार्वजनिक सम्मानमा समेट्ने सन्देश दिएका छन् । राजतन्त्रदेखि लोकतान्त्रिक आन्दोलनसम्मका पात्र, राजनीतिक दलका शीर्ष नेता र आन्दोलनका शहीदका सालिक एउटै सहरमा संरक्षण र सम्मानका साथ रहने अवस्था बनेको हो । विशेषगरी अन्य सालिकको पुनर्निर्माण र पुनःस्थापनामा ठूलो विवाद नदेखिए पनि स्वर्गीय वीरेन्द्र वीर विक्रम शाहको सालिक पुनःस्थापना भने केही समय चुनौतीको विषय बनेको थियो । अन्ततः त्यसको पुनर्निर्माण पनि सम्पन्न भएपछि सबै सालिक एकसाथ अनावरण गरिन लागेको हो ।
नगर प्रमुख विष्टका अनुसार, शनिबार बिहान ८ बजे स्वर्गीय सुशील कोइरालाको सालिकबाट अनावरण कार्यक्रम सुरु हुनेछ । त्यसपछि बिहान ८ः१५ बजे गणेशमान चोकमा स्वर्गीय गणेशमान सिंहको सालिक, बिहान ८ः३० बजे बीपी चोकमा स्वर्गीय विश्वेश्वर प्रसाद (बीपी) कोइरालाको सालिक, बिहान ८ः४५ बजे वीरेन्द्र चोकमा स्वर्गीय वीरेन्द्र वीर विक्रम शाहको सालिक, बिहान ९ बजे पुष्पलाल चोकमा स्वर्गीय पुष्पलालको सालिक तथा बिहान ९ः१५ बजे सेतु विक चोकमा स्वर्गीय सेतु विकको सालिक अनावरण गरिने कार्यक्रम तय गरिएको छ ।
नगर प्रमुख विष्टले सञ्चारकर्मी, जनप्रतिनिधि, सरोकारवाला र विशिष्ट व्यक्तिलाई कार्यक्रममा सहभागी हुन आग्रह गरेका छन् । उनले नगरवासीलाई आफ्नो समय र सहजताअनुसार सम्बन्धित कार्यक्रममा उपस्थित हुन आह्वान पनि गरेका छन् ।
दैनिक नेपालगन्जसँग उनले भने, ‘नगरवासीलाई जहाँ अनुकूल हुन्छ उपस्थितिका लागि अनुरोध गरिएको छ । जसको जोसँग आस्था, विश्वास र सम्मान बढी छ, आफ्नो अनुकूलता मिलाएर त्यही उपस्थितिको आह्वान गरिएको छ ।’
नगरपालिकाका अनुसार, अनावरण कार्यक्रम कुनै एक विचार वा समूहमा सीमित नभई नेपालगन्जको साझा इतिहास, लोकतान्त्रिक यात्रा र समाजले सम्मान गरेका व्यक्तित्वप्रतिको सम्मान अभिव्यक्त गर्ने उद्देश्यले आयोजना गरिएको हो । पुनर्निर्मित सालिकहरूको अनावरणसँगै नेपालगन्ज फरक विचार र फरक इतिहासका व्यक्तित्वलाई समान सम्मानका साथ स्थान दिने सहरका रूपमा थप परिचित हुने अपेक्षा गरिएको नगर प्रमुख विष्टको भनाइ छ ।
