नेपाल–भारत सीमा क्षेत्रमा लागूऔषध तस्करी नियन्त्रणका लागि चलाइएको अभियानका क्रममा रुपईडीहा भारतीय प्रहरीले २५ ग्राम स्मेकसहित एक युवकलाई पक्राउ गरेको जनाएको छ । प्रहरी र सशस्त्र सीमा बलको संयुक्त टोलीले सीमा क्षेत्रबाट युवकलाई नियन्त्रणमा लिएर लागूऔषध बरामद गरेको हो ।
पक्राउ पर्नेमा बहराइच जिल्लाको रुपईडीहा थाना क्षेत्रअन्तर्गत मुनीरगन्ज भट्ठाका २५ वर्षीय अरशद कुरैशी रहेका छन् । उनको साथबाट २५ ग्राम अवैध स्मकसँगै एउटा एन्ड्रोइड मोबाइल फोनसमेत बरामद भएको प्रहरीले जनाएको छ । उक्त स्मैक नेपाल ल्याउँदै गरेको आशंका गरिएको छ ।
सीमा क्षेत्रमा गस्ती गरिरहेको संयुक्त टोलीले शंकास्पद अवस्थामा ती युवकलाई फेला पारेपछि नियन्त्रणमा लिएको थियो । नेपालगन्ज रोड रेलवे स्टेसन नजिकै सीमा स्तम्भ नम्बर ६५१÷२ आसपासमा उनलाई रोकेर जाँच गरिएको थियो । जाँचका क्रममा स्मक फेला परेको प्रहरीले जनाएको छ ।
पक्राउ परेका कुरैशीविरुद्ध रुपईडीहा थानामा लागूऔषधसम्बन्धी मुद्दा दर्ता गरिएको छ । बरामदगीका आधारमा उनीविरुद्ध मुद्दा नम्बर २०६÷२०२६ मा एनडीपीएस ऐनको धारा ८÷२१ अन्तर्गत कारबाही अघि बढाइएको हो ।
रुपईडीहा थानाका प्रभारी निरीक्षक हरेंद्र कुमार मिश्रले बरामद लागूऔषधका आधारमा अभियुक्तविरुद्ध कानुनी प्रक्रिया अघि बढाइएको बताए । ‘बरामदगीका आधारमा अरशद कुरैशीविरुद्ध थाना रुपईडीहामा मुद्दा नम्बर २०६÷२०२६ अन्तर्गत धारा ८÷२१ एनडीपीएस ऐनमा मुद्दा दर्ता गरिएको छ,’ उनलाई उदधृत गर्दै भारतीय पत्रकार सुरेन्द्र मधेसियाले दैनिक नेपालगन्जसँग भने ।
आवश्यक कानुनी प्रक्रिया पूरा गरेपछि कुरैशीलाई न्यायिक अभिरक्षाका लागि अदालत पठाइएको प्रहरीले जनाएको छ । पक्राउ परेका युवकबाट बरामद गरिएको स्मैक र मोबाइल फोनसमेत आवश्यक अनुसन्धानका लागि नियन्त्रणमा लिइएको छ ।
प्रहरीका अनुसार नेपालसँग जोडिएको भारतीय सीमा क्षेत्र लागूऔषध ओसारपसारका दृष्टिले संवेदनशील रहेकाले नियमित गस्ती र निगरानी बढाइएको छ । सीमा क्षेत्रमा शंकास्पद गतिविधि देखिएमा तत्काल जाँच गर्ने गरिएको प्रहरीको भनाइ छ ।
प्रहरीको अभियान लागूऔषधको ओसारपसार तथा तस्करीमा संलग्न व्यक्तिमाथि केन्द्रित रहेको छ । सीमा क्षेत्रमा हुने अवैध गतिविधि नियन्त्रणका लागि प्रहरी र सशस्त्र सीमा बलबीच संयुक्त गस्ती तथा निगरानीलाई निरन्तरता दिइने प्रहरीले जनाएको छ ।
प्रहरीका अनुसार सीमा क्षेत्रमा लागूऔषध तस्करी रोक्न अभियान निरन्तर चलाइनेछ । शंकास्पद गतिविधिमाथि विशेष निगरानी राखिने र तस्करीमा संलग्न पाइएकामाथि कडा कानुनी कारबाही गरिने प्रहरीको भनाइ छ ।
