करिब दुई वर्षदेखि बन्द रहेको भेरी अस्पतालको सीटी स्क्यान सेवा पुनः सञ्चालनमा आएको छ । बिग्रिएको ट्युब फेर्नुपर्ने अवस्थामा रहेको उपकरणको मर्मत तथा व्यवस्थापनपछि अस्पतालले सेवा नियमित गरेको हो ।
अस्पतालका प्रमुख मेडिकल सुपरिटेन्डेन्ट डा. नवीन दर्नालका अनुसार, सीटी स्क्यान मेसिनको ट्युब बिग्रिएपछि सेवा लामो समयदेखि अवरुद्ध थियो । ट्युब खरिदका लागि गत वर्ष करिब १ करोड रुपैयाँ बजेटसमेत पठाइएको थियो । तर, अस्पतालले नयाँ ट्युब खरिद गर्नुको सट्टा पाटन अस्पतालमा सञ्चालनमा नरहेको सीटी स्क्यानको ट्युब हस्तान्तरण लिएर सेवा सुचारु गरेको हो ।
२ वर्षदेखि सीटी स्क्यानको ट्युब बिग्रिएको थियो । त्यसलाई खरिद गर्न गत वर्ष करिब १ करोड रुपैयाँ बजेट पठाइएको थियो । ‘तर, हामीले पाटन अस्पतालसँग सञ्चालनमा नरहेको सीटी स्क्यानको ट्युब हस्तान्तरण लिई ढुवानी शुल्क मात्र खर्च गरेर यो सेवा सुचारु गरेका छौं,’ डा दर्नालले दैनिक नेपालगन्जसँग भने ।
सीटी स्क्यान सेवा बन्द हुँदा अस्पतालमा उपचारका लागि आउने बिरामीले परीक्षणका लागि निजी स्वास्थ्य संस्था तथा अन्य अस्पतालमा जानुपर्ने अवस्था थियो । विशेषगरी आर्थिक रूपमा कमजोर बिरामीलाई बाहिर गएर महँगो शुल्कमा परीक्षण गराउनुपर्ने बाध्यता थियो । सेवा पुनः सञ्चालनमा आएपछि त्यस्तो समस्या कम हुने अस्पतालको अपेक्षा छ ।
अस्पतालले विशेषज्ञ चिकित्सकको सिफारिसअनुसार आवश्यक पर्ने सेवाग्राहीलाई अब सीटी स्क्यान सेवा अस्पतालबाटै उपलब्ध हुने जनाएको छ । सेवा सञ्चालनमा आएसँगै रोगको पहिचान समयमै गर्न सहज हुने र उपचार प्रक्रियासमेत प्रभावकारी बन्ने अस्पतालको विश्वास छ । बाहिर परीक्षण गराउँदा लाग्ने अतिरिक्त खर्च घट्ने भएकाले बिरामीको आर्थिक भार पनि कम हुने अपेक्षा गरिएको छ ।
भेरी अस्पतालमा सीटी स्क्यान सेवा पुनः सञ्चालन भएपछि बाँकेसँगै बर्दिया, सुर्खेत, दाङलगायत लुम्बिनी, कर्णाली र सुदूरपश्चिम प्रदेशका विभिन्न जिल्लाबाट आउने बिरामीले प्रत्यक्ष लाभ पाउने छन् । यस क्षेत्रका बिरामीका लागि भेरी अस्पताल प्रमुख उपचार केन्द्रका रूपमा रहेकाले सेवा नियमित हुँदा परीक्षणका लागि बाहिर जानुपर्ने बाध्यता घट्नेछ ।
डा दर्नालले अस्पतालमा सीटी स्क्यान सेवा नियमित र गुणस्तरीय बनाउन आवश्यक प्राविधिक व्यवस्थापनलाई थप मजबुत बनाउने बताए । स्वास्थ्य उपकरणको नियमित मर्मत, निगरानी र प्राविधिक व्यवस्थापनलाई पनि प्राथमिकतामा राखिने उनले बताए ।
’अब सेवा नियमित र गुणस्तरीय बनाउन आवश्यक प्राविधिक व्यवस्थापनलाई थप सुदृढ बनाइनेछ । स्वास्थ्य उपकरणहरूको नियमित मर्मत तथा निगरानीलाई पनि प्राथमिकतामा राखिनेछ,’ उनले भने ।
अस्पतालले सीटी स्क्यान सेवा पुनः सञ्चालनलाई आफ्नो सेवा सुधारको निरन्तरताका रूपमा लिएको छ । पछिल्ला दिनमा सेवा विस्तार, सेवा व्यवस्थापनमा सुधार, आधुनिक उपकरणको सञ्चालन, विशेषज्ञ सेवा सुदृढीकरण, बिरामीमैत्री वातावरण निर्माण तथा स्वास्थ्य सेवाको गुणस्तर अभिवृद्धिका लागि काम भइरहेको अस्पतालले जनाएको छ ।
भेरी अस्पतालले सेवाग्राहीले वर्षौंदेखि देखाउँदै आएको विश्वास, साथ र सद्भावप्रति आभारसमेत व्यक्त गरेको छ । अस्पतालका अनुसार भेरी अस्पताल उपचार गर्ने संस्था मात्र नभई जनताको विश्वासको केन्द्र हो । त्यसैले प्रत्येक बिरामीलाई सम्मानजनक, सुरक्षित, गुणस्तरीय र समयमै स्वास्थ्य सेवा उपलब्ध गराउने उद्देश्यका साथ अस्पतालले काम गरिरहेको छ ।
’भेरी अस्पताल केवल उपचार गर्ने संस्था मात्र होइन, जनताको विश्वासको केन्द्र हो । अस्पताल परिवारको उद्देश्य प्रत्येक बिरामीलाई सम्मानजनक, सुरक्षित, गुणस्तरीय तथा समयमै स्वास्थ्य सेवा प्रदान गर्नु हो,’ डा दर्नालले भने ।
उनका अनुसार, अस्पतालले पछिल्ला दिनमा सेवाग्राहीको आवश्यकता र अपेक्षालाई ध्यानमा राखेर सेवा विस्तार तथा व्यवस्थापन सुधारलाई अघि बढाएको छ । आधुनिक उपकरण सञ्चालनमा ल्याउनेदेखि विशेषज्ञ सेवा सुदृढ गर्ने र बिरामीमैत्री वातावरण बनाउने कामलाई पनि प्राथमिकतामा राखिएको छ ।
अस्पतालले आगामी दिनमा सेवाग्राहीको सुझाव, विश्वास र सहकार्यलाई आधार बनाएर सेवा सुधारलाई निरन्तरता दिने जनाएको छ । स्वास्थ्य सेवा थप प्रभावकारी, पारदर्शी र सुशासनयुक्त बनाउँदै गुणस्तरीय उपचार सेवा प्रदान गर्न अस्पताल प्रतिबद्ध रहेको जनाएको छ ।
