१५ सवारीमाथि कारबाही, दुई सीज
नेपाल–भारत सीमा क्षेत्रबाट अनुमति नलिई यात्रु ओसारपसार गर्ने सवारीसाधनमाथि बहराइच प्रशासनले कडाइ गरेको छ ।
रुपईडीहा क्षेत्रमा बुधबार गरिएको संयुक्त प्रवर्तन अभियानका क्रममा नियमविपरीत सञ्चालनमा रहेका करिब १५ वटा सवारीसाधनमाथि कारबाही गरिएको छ । ‘तीमध्ये गम्भीर अनियमितता भेटिएका २ वटा सवारीसाधनलाई प्रहरीले सीज गरेको छ,’ भारतीय पत्रकार सन्तोषकुमार शुक्लले प्रहरीलाई उदधृत गर्दै दैनिक नेपालगन्जसँग भने ।
जनपद बहराइचको रुपईडीहा क्षेत्रमा क्षेत्राधिकारी राज सिंह, सहायक संभागीय परिवहन अधिकारी प्रशासन सुशील कुमार र उत्तर प्रदेश राज्य सडक परिवहन निगमका सहायक क्षेत्रीय प्रबन्धक रामप्रकाशको संयुक्त नेतृत्वमा अभियान सञ्चालन गरिएको हो । अनधिकृत रूपमा यात्रु ओसारपसार गरिरहेका साना व्यावसायिक सवारीसाधनलाई लक्षित गरी टोलीले चेकजाँच गरेको थियो ।
नेपाल सीमा हुँदै रुपईडीहाको बाटो भएर चारबाग लखनऊतर्फ यात्रु लैजाने सवारीसाधनको समेत जाँच गरिएको थियो। जाँचका क्रममा आवश्यक अनुमति, वैध कागजात तथा यातायातसम्बन्धी नियम पालना भए नभएको हेरिएको थियो । नियम उल्लंघन गरेको अवस्थामा भेटिएका करिब १५ वटा सवारीसाधनको चालान गरिएको संयुक्त टोलीले जनाएको छ ।
गम्भीर प्रकृतिका अनियमितता भेटिएपछि २ वटा सवारीसाधनलाई नियन्त्रणमा लिएर थाना रुपईडीहामा सीज गरिएको छ । अन्य कारबाहीमा परेका सवारीसाधनका चालक तथा सञ्चालकलाई पनि आवश्यक कानुनी प्रक्रिया पूरा गर्न निर्देशन दिइएको छ ।
संयुक्त टोलीले सवारीसाधन सञ्चालकलाई वैध परमिटसहित आवश्यक अभिलेख साथमा राख्न र प्रचलित यातायात नियमको पालना गर्न आग्रह गरेको छ । यात्रु ओसारपसारका लागि अनुमति नलिएका तथा नियमविपरीत सञ्चालन गरिएका सवारीसाधनमाथि कारबाही जारी रहने अधिकारीहरूले बताएका छन् ।
अधिकारीहरूले भारत–नेपाल सीमा क्षेत्रमा बिना वैध अनुमति यात्रु बोक्ने कार्यलाई कुनै पनि अवस्थामा छुट नदिने स्पष्ट पारेका छन् । ‘बिना वैध दस्तावेज र नियमविपरीत सवारी सञ्चालन गर्नेहरूमाथि आगामी दिनमा पनि सघन प्रवर्तन अभियान निरन्तर जारी रहनेछ,’ संयुक्त टोलीले जनाएको छ ।
सीमा क्षेत्रमा हुने अनधिकृत यात्री परिवहन नियन्त्रण गर्न क्षेत्रीय प्रशासन, यातायात कार्यालय र राज्य सडक परिवहन निगमबीच समन्वय गरेर अभियान अघि बढाइएको हो । बुधबारको कारबाहीलाई पनि यही समन्वयअन्तर्गतको विशेष चेकिङका रूपमा लिइएको छ ।
अधिकारीहरूले यात्रु तथा सवारी सञ्चालकलाई कानुनी प्रक्रिया पूरा गरेर मात्र यातायात सेवा सञ्चालन गर्न आग्रह गरेका छन् । सीमा क्षेत्रमा अवैध रूपमा यात्रु ओसारपसार गर्ने गतिविधि नियन्त्रण गर्न आगामी दिनमा समेत यस्ता संयुक्त चेकिङ अभियानलाई निरन्तरता दिने उनीहरूले बताएका छन् ।
