कपडा व्यापारको आवरणमा अवैध रूपमा सुन धितो राखेर वित्तीय कारोबार सञ्चालन गरेको आरोपमा सुर्खेत प्रहरीले वीरेन्द्रनगरका एक व्यापारीलाई ठूलो परिमाणको सुनचाँदीका गरगहनासहित पक्राउ गरेको छ । प्रहरीले वीरेन्द्रनगर नगरपालिका–६ स्थित गोप्य कार्यालयमा सोमवार छापा मारेर करिब ३ करोड रुपैयाँ बराबरका सुनचाँदीका गरगहना बरामद गरेको मंगलवार जानकारी दिएको हो ।
जिल्ला प्रहरी कार्यालय सुर्खेतका अनुसार, पक्राउ पर्नेमा ६३ वर्षीय श्यामसुन्दर अग्रवाल रहेका छन् । उनी ‘बालाजी’ नामबाट समेत परिचित रहेको प्रहरीले जनाएको छ । उनको स्थायी ठेगाना बाँकेको नेपालगन्ज उपमहानगरपालिका–१० रहेको र हाल वीरेन्द्रनगर–६ मा बसोबास गर्दै आएको प्रहरीले उल्लेख गरेको छ ।
प्रहरीले जेठ १८ गते वीरेन्द्रनगर नगरपालिका–६ राजाचोक नजिक रहेको ‘शिव इम्पोरियम’ नामक कपडा पसल तथा त्यससँग जोडिएको गोप्य कार्यालयमा खानतलासी गरेको थियो । भारतीय रुपैयाँ र सुनका गरगहना धितो राखेर अवैध रूपमा ब्याजमा रकम लगानी गरिरहेको विशेष सूचनाका आधारमा प्रदेश प्रहरी कार्यालय र जिल्ला प्रहरी कार्यालय सुर्खेतको संयुक्त टोलीले छापा मारेको जनाएको छ ।
जिल्ला प्रहरी कार्यालय सुर्खेतका सूचना अधिकारी तथा प्रहरी नायब उपरीक्षक कविन्द्रसिंह बोहराले विभिन्न बट्टा, पोका र डिब्बामा राखिएका १८५ थान सुन तथा चाँदीका गरगहना बरामद गरिएको जानकारी दिए । उनका अनुसार, बरामद गरगहनाको अनुमानित बजार मूल्य करिब ३ करोड रुपैयाँ रहेको छ ।
प्रहरीले अग्रवालको साथबाट २ लाख १९ हजार ५०० नेपाली रुपैयाँ र ८ लाख ११ हजार ९०० भारतीय रुपैयाँसमेत बरामद गरेको छ । नगद रकम गन्न प्रयोग गरिने एक मेसिन पनि फेला परेको प्रहरीले जनाएको छ । ‘विभिन्न किसिमका सुनचाँदीका गरगहना र नगदसहित उनलाई नियन्त्रणमा लिएर अनुसन्धान अघि बढाइएको छ,’ डिएसपी बोहराले भने ।
प्रहरीका अनुसार सोमबार अपराह्न करिब ४ बजेतिर वीरेन्द्रचोकबाट करिब १० मिटर उत्तरतर्फ भाडामा लिइएको कोठामा बनाइएको कार्यालयमा छापा मारिएको हो । उक्त स्थानमा ठूलो परिमाणमा अवैध बैंकिङ कारोबार भइरहेको र सुन भण्डारण गरिएको गोप्य सूचना प्रहरीलाई प्राप्त भएको थियो । घटनापछि थप अनुसन्धानका लागि प्रदेश प्रहरी कार्यालयको टोली र राजस्व कार्यालयको टोलीसमेत खटिएको छ ।
प्रहरी स्रोतका अनुसार, अग्रवालले लामो समयदेखि कपडा पसलको आवरणमा सुन धितो राखेर ऋण दिने, भारतीय रुपैयाँ साट्ने तथा ब्याजमा रकम परिचालन गर्ने काम गर्दै आएको आशंका गरिएको छ । सुरुमा उनको व्यापारिक संस्था ‘बालाजी वस्त्रालय’ नाममा रहेको र पछि ‘शिव इम्पोरियम’ मा रूपान्तरण गरिएको बताइएको छ ।
उनी भारतीय मूलका व्यापारी रहेको र उनका बुबाले नेपाल आएर कपडा व्यवसाय सुरु गरेको स्थानीयहरू बताउँछन् । प्रहरी स्रोतका अनुसार, २०६२÷०६३ को जनआन्दोलन र तत्कालीन द्वन्द्वकालपछि उनले नेपालगन्जबाट नेपाली नागरिकता लिएको चर्चा स्थानीय स्तरमा हुने गरेको छ । नेपालगन्जमा पनि उनलाई चिन्ने जान्ने ‘सर्कल’ नदेखिंदा चर्चाले प्राथमिकता पाएको हो । यद्यपि यस विषयमा प्रहरीले औपचारिक पुष्टि गरेको छैन ।
सुर्खेतमा अग्रवाललाई नजिकबाट चिन्ने एक व्यक्तिका अनुसार, उनले दसैं–तिहारजस्ता चाडपर्वमा भारतबाट आउने नेपालीहरूको भारतीय रुपैयाँ साट्ने कामबाट यस्तो कारोबार सुरु गरेका थिए । ‘भारु साटेबापत ३ देखि ५ प्रतिशतसम्म कमिसन लिने गर्थे,’ स्रोतले भन्यो । पछि उनले गाउँका सर्वसाधारणदेखि व्यापारीसम्मलाई सुन धितो राखेर मासिक ३ देखि ५ प्रतिशतसम्म ब्याज असुल्ने गरेको दाबी गरिएको छ ।
स्थानीय स्रोतका अनुसार, बैंक तथा वित्तीय संस्थाको प्रक्रिया झन्झटिलो हुने र तत्काल ऋण नपाइने अवस्थालाई उपयोग गर्दै उनी धेरैका लागि ‘अघोषित बैंक’ जस्तै बनेका थिए । प्रहरीले अहिले उनको कारोबार सञ्जाल, लगानीको स्रोत र अन्य संलग्न व्यक्तिबारे पनि अनुसन्धान गरिरहेको जनाएको छ ।
प्रहरी स्रोतले निष्पक्ष अनुसन्धान भए वीरेन्द्रनगरका अन्य केही प्रभावशाली व्यक्तिको नामसमेत यस प्रकरणमा जोडिन सक्ने आशंका व्यक्त गरेको छ । केही व्यक्तिले आफ्नो कालोधन लुकाउन र ब्याजमा लगानी गर्न अग्रवालमार्फत रकम परिचालन गरेको हुनसक्ने अनुमानसमेत गरिएको छ । यद्यपि यसबारे प्रहरीले औपचारिक धारणा सार्वजनिक गरेको छैन ।
